तंपुरान कुचिक्कुट्टन: (जल्म : १८६४ कोडंगल्लूर, केरळ; मरण:१९०८).
केरळांतलो एक कवी. ताचें खरें नांव रामवर्मा आशिल्लें.पूण आवय – बापूय ताका अपुरबायेन कुचिक्कुटन अशें म्हण्टाले. फुडें तो केरळव्यास ह्या नांवान नामनेक पावलो.
संस्कृत पंडीत, कला-शास्त्र ह्या विशया6नी निपूण अशा कोडंगल्लूरच्या राजघराण्यांत तंपुरानचो जल्म जालो.ताचो मामा व्हड विद्वान आशिल्लोल. ताचेकडल्यान ल्हानपणांतूच तंपुरानान तर्कशास्त्र, व्याकरण, अलंकार, काव्य नाटक ह्या विशयांचें शिक्षण घेतलें.
ताणें संस्कृत आनी मळ्याळम ह्या भासांनी वट्ट ५० पुस्तकां बरयलीं. स्यमन्तकम, सीतास्वयंवरम हीं नाटकां ताणें बरयलीं .संस्कृत शब्द वापरिनासतना ताणें मळ्याळम भाशेंत दक्षयागम, तुप्पलकोलांपी हीं काव्यां रचलीं हें ताचें खाशेलपण. ताणें बरयली हेर बरपावळ तशेंच काव्यांत खूब आसात. महाभारताची ताणें केल्लो वृत्तानुवृत्त अणकार हो ताचो म्हत्वाचो ग्रंथ. हो अणकार तानें ८७४ दिसांनी पुराय केलो. हाकाच म्हत्वाचो ताका ‘केरळव्यास’ ही उपाधि मेळ्ळी.
ताका इतिहासाचीय खूब आवड आशिल्ली. ताणें केरळ नांवाचें एक इतिहासीक काव्य बरोवपाक सुरवात केल्ली. पूण ताका मरण आयिल्ल्यान तें काव्य बरोवपाक सुरवात केल्ली. पूण ताका मरण आयिल्ल्यान तें काव्य अर्देंच उरलें. ह्या काव्यांत ताणें केरळचे उत्पत्तीसावन शंकराचार्याच्या अवतारामेरेनचो इतिहास बरोवपाक घेतिल्लो.
तंपुरान एक बरो गद्य लेखकूय आशिल्लो. रसिकरंजिनी नांवाच्या एका मासिकाचो तो संपादक आशिल्लो.बुध्दिबळ हो ताचो आवडटो खेळ खेळटना कविता रचपाची ताका आशिल्ली. -कों.वि.सं.मं.
तंबाकू: (मराठी: तंबाखू; हिंदी,गुजराती,बंगाली:तमाकू;कन्नड:होगेसोप्पू; इंग्लीश: टोबॅको; लॅटीन: निकोटियाना टाबॅकम आनी निकोटियाना रस्टिका; कूळ : सोलॅनसी).
हे वनस्पतीचे मुखेल दोन प्रकार आसात. १)निकोटियाना टाबॅकम २)निकोटियाना रस्टिका. टाबॅकम ह्या प्रकारच्या तंबाकूचें रोंप एक वर्सभर जगता, १-३ मी. वाडटा. ताचीं पानां सुमार १ मी. लांबायेचीं आसतात. ह्या रोंपाक लेव तांबडीं वा धवीं फुलां येतात आनी १५.२० मिमी.व्यासाचीं वाटकुळीं फळां येतात.रस्टिका प्रकारच्या तंबाकूचें रोंप ०.५ ते १.५ मी. ऊंच वाडटा.पानांची लांबाय ३० सेंमी. जाल्यार रूंदाय २० सेंमी.आसता. फुलां हळडुवीं १.२ ते १.५ सेंमी. लांब,फळ वाटकुळें ७.१६ मिमी. व्यासाचें,भितल्ल्यो बियो ०.७ ते १.१ मिमी. व्यासाच्यो आनी तपकिरी रंगाच्यो आसतात.
तज्ञांच्या मतान तंबाकूचो उगम अमेरिकेक जाला आसूंक जाय. बाराव्या शेंकड्यांत आशिया खंडांट तंबाकूचो वापर करताले म्हणपाचे उल्लेख सांपडटात. भारतांत तंबाकू आदल्या तेंपार सावन पिकयतात.रामायणासारक्या पुराणीक ग्रंथांनी तंबाकूचो उल्लेख मेळटा. पूण भारतांत पुर्तुगेज लोकांनी ह्या पिकाचो व्हड प्रमाणांत प्रसार केलो. चीन, अमेरिका, इंडोनेशिया, तुर्कस्थान, बल्गेरिया, ब्राझील,रशिया, आर्जेण्टीना, थायलॅंड,फिलिपिन्स ह्या देशांनी तंबाकूची लागवड मोट्या प्रमाणांत करतात. भारतांत आंध्र प्रदेश, उत्तर प्रदेश,ओरिसा,कर्नाटक, गुजरात, महाराष्ट्र, अस्तंत बंगाल, ह्या राज्यांनी तंबाकूची व्हड प्रमाणांत लागवड जाता.
तयार केल्ल्या तंबाकूचे कांय प्रकार आसात ते अशे: सिगार तंबाकू, जत्ती(जाती) तंबाकू,मोतीहारी तंबाकू, हुक्का तंबाकू, विडी तंबाकू आनी खावपाचो तंबाकू. तंबाकूच्यो कितल्योशोच जाती आसात त्यो ह्यो: बोहरी(बोन्हरी), चुरीया, कवनिया(कोन्निया), देशला, पुरबी, नाकी (नोकी), काका(कक्का), घोरा, गिद्री, गोभी, पचकड(पुचक्कड).
तंबाकूचे लागवडीक सरासरी २७ सॅ. तापमानी गरज आसता. हें तापमान ३५ सॅ. परस चड आसल्यार पानां करपतात आनी उत्पन्नाचेर परिणाम जाता. तंबाकूच्या त्या त्या प्रकाराचेर जमनीची निवड करतात. देखीक- विडी तंबाकूखातीर हलकी जमीन चलता, जाल्यार सिगार तंबाकूची लागवड करपाखातीर सुपीक जमनीची गरज आसता.
तंबाकुची लागवड बियांपसून करतात आनी हॅक्टराक ५०० ग्राम बीं पुरो जाता. सुरवातेक गांदी वाफ्याचेर रोंपयो किल्लून काडटात आनी उपरांत ५०-६० दिसांनी शेतांत लायतात. रोंप लावंचे पयलीं जमीन नांगरून तातूंत हॅक्टराक ७० (बैल) गाड्यो शेणखत भरशितात. वेगवेगळ्या राज्यांनी तंबाकू लावपाचो काळ वेगवेगळो आसता.चडशा राज्यांनी सप्टेंबर-ऑक्टोबर ह्या तेंपार लागवड करतात. जाल्यार कांय राज्यांनी जानेवारी म्हयन्यांत लागवड करतात. रोंप लावपाखातीर १ x १ मी. अंतराचेर १०-१५ सेंमी. खोल फोंडकुलां मारतात. विडी तंबाकूची लागवड २०x२० सेंमी.अंतराचेर करतात. रोंपांमदली नडणी वेळोवेळ काडची पडटा. तअहेंच, तंबाकूच्या प्रकाराचेर सा-याची गरज थारता. सादारणपणान हॅक्टराक २५ कि.नत्र,५० कि.स्फुरद आनी २५ कि.पलाश इतलें सारें दिवंचें पडटा.
विडी तंबाकूक तयार जावपाक सुमार १४० दीस लागतात, जाल्यार चिरूट तंबाकू ९०-१०० दिसांनी तयार जाता. तंबाकूचें उत्पन्न हें जातीचेर आदारून आसता. सरासरी हॅक्टेरी १००० ते १५०० किलो तंबाकूचें उत्पन्न मेळटा.तंबाकूचीं पानां जशीं जशीं सुकतात तशीं तशीं तीं काडटात. तंबाकूचीं पानां काडटकच तांचेर वेगवेगळ्यो प्रक्रिया करून तरेकवार तंबाकू तयार करतात.
तंबाकूच्या पिकाक रोग आनी किडीचो बरोच त्रास जाता. ‘मर’, पानांवयले थिपके, पिठ्याचितो हे कांय म्हत्वाचे रोग तंबाकूचें लुकसाण करतात. चड करून सुकुंडो, खोडकिडो ह्या दोन किडींची तंबाकूक लागण जाता.
भारतांत सात लाख लोक तंबाकूची लागवड करतात आनी पाँच लाख लोक तंबाकूचेर प्रक्रिया करपाच्या कामांत आसात.सुमार तीस लाख लोक तंबाकूपसून वेगवेगळे पदार्थ तयार करतात, हातूंतले २० लाख लोक विडी कामगार आसात.तंबाकूचो वापर सिगार,विडी,चिरूट,हुक्को,चिलीम हातूंत करतात. खावपाच्या पानांनीय कांय लोक तंबाकूचो वापर करतात. दाँत घांसपाखातीरय तंबाकूचो वापर करतात.तंबाकूच्या उदकाचो कीडनाशक म्हणून वापर करतात. बियांपसून तेल काडटात आनी हें तेल खावपाक वा रंग तयार करपाक वापरतात. तशीच, ही पेण शेताक सारें म्हणून वापरतात.
तंबाकूंत ‘निकोटीन’हो विखारी पदार्थ आसता, ताका लागून तंबाकू खावप जावं ओडप हें भलायकेक अपायकारक आसता. -विश्राम गांवकार
