Social Council): अर्थीक आनी भौशिक मळाचेर बारीकसाणेन अभ्यास करून उदरगतीखातीर योग्य त्यो सुचवण्यो करप ही ह्या मंडळाची मुखेल जापसालदारकी. आमसभा मतदान करून ह्या मंडळाचे 54 वांगडी वेंचून काडटा. तांचो कार्यकाळ तीन वर्सांचो आसता. ह्या मंडळाच्यो वर्सांतल्यान उण्यात उण्यो दोन बसका जावपाक जाय. संयुक्त राश्ट्रसंघटनेच्या हेर खाशेल्या संस्थांच्या वावराचेरय हें मंडळ लक्ष दवरता.
विश्वस्त मंडळ(Trusteeship Council): विश्वस्त प्रदेशांचो कारभार पळोवपी हेर संस्थांचेर हें मंडळ देखरेख दवरून तांकां योग्य ती सुचोवणी करता. आमसभेच्या फुडारपणाखाल हें मंडळ चलता. 1980 मेरेन सगळे विश्वस्त प्रदेश स्वतंत्र जाल्ल्यान ह्या मंडळा फाटलो मुखेल हेत पुरायपणान सोंपला.
संयुक्त राश्ट्रसंघटनेच्यो हेर कांय खाशेल्यो संस्था-
1)अन्न आनी शेतकी संस्था (Food and Agriculture Organization) : शेतकी पिकावळ, तशेंच रान आनी नुस्तें उत्पन्न वाडोवन तांची योग्य पुरवण करप हे संस्थेचो मखेल वावर.
2)आंतरराश्ट्रीय अणूऊर्जा एजन्सी (International Atomic Energy Agency) : अणूऊर्जेची जतनायेन आनी शांतीपुर्वक उदरगत घडोवन हाडपाखातीर उपेग करप ही हे एजन्सीची मुखेल मोख.
3)विश्व बँक (World Bank) : ही बँक संघटनेच्या विकासशील वांगडी राश्ट्रांक अर्थींक उदगरत घडोवन हाडपाखातीर रीण दिता.
4)आंतरराश्ट्रीय मौद्रीक निधी (International Monetary Fund) : अडचणीच्या वेळार मौद्रीक स्थीरता हाडप आनी आंतरराश्ट्रीय स्थराचेर मौद्रीक सहयोग घडोवन हाडप ही हे संस्थेची मुखेल मोख.
5)आंतरराश्ट्रीय संचारण सेवा (International Telecommunication Union) : रेडिओ, टेलिग्राफ, टेलिफोन आनी अंतराळ-रेडिओ संचारण ह्यो सुविधा आंतरराश्ट्रीय मळाचेर उपलब्ध करून दिवप हो ह्या संस्थांचो मखेल वावर.
6) संयुक्त राश्ट्रसंघटनेची शिक्षणीक, विज्ञानीक आनी संस्कृतीक संस्था (United Nations Educational, Scientific and Cultural Org.) : शिक्षण, विज्ञान आनी संस्कृती हांचे वतीन वेगवेगळ्या राश्ट्रांभितर मेळ घडोवन हाडप ही हे संस्थेची मुखेल मोख.
7)संयुक्त राश्ट्रसंघटनेचो बाल निधी (United Nations Childrens Fund) : ही संस्था विकासशील राश्ट्रांमदल्या भुरग्यांची भलायकी राखपाक, तांकां शिक्षण आनी योग्य अन्न दिवपाक, तशेंच आवयांक आपल्या भुरग्यांची फाव ती जतनाय घेवपाक मार्गदर्शन करता.
8)जागतीक भलायकी संस्था (World Health Organization) : वेगवेगळ्या रोगांचें निदान करून तांचेर वखदां सोदून काडप आनी तांची पुरवण करून रोग आळाबंदा हाडप ही ह्या संस्थेची मुखेल मोख.
राश्ट्रसंघटनेच्यो ह्यो स्वायत्त्य संस्था आसून, तांचो वावर आनी भितरलो कारभारय स्वतंत्रपणान चलता. ह्यो वेगवेगळ्यो संस्था आपआपले मोखीप्रमाण क्षेत्रीय अभ्यास करून राश्ट्रसंघटनेक योग्य त्यो सुचोवण्यो करता.
-प्रा.राजय पवार
संवत्सरः महाकालाचो एक भाग. संवत्सराची व्याख्या अशी आसा-‘सम्यग् वसन्ति मासादयोSस्मन्’ म्हळ्यार जातूंत म्हयने बी सारकिल्या कालविभागांचो वेवस्थित आस्पाव जाता, ताका संवत्सर अशें म्हणटात.
भारतीय पंचांगांत शालिवाहन शकावांगडा एक संवत्सर दिल्लें आसता. तें साठ वर्सांचें एक चक्र आसा. ह्या साठ संवत्सरांचीं नांवां अशीं आसात – प्रभव, विभव, शुक्ल, प्रमोद, प्रजापती, अंगिरा, श्रीमुख, भाव, युवा, धाता, ईश्र्वर, बहुधान्य, प्रमाथी, विक्रम, वृष, चित्रभानू, सभानू, तारण, पार्थिव, व्यय, सर्वजित्, सर्वधारी, विरोधी, विकृती, खर, नंदन, विजय, जय, मन्मथ, दुर्मुख, हेमलंब, विलंबी, विकारी, शर्वरी, प्लव, शुभकृत, शोभन, क्रोधी, विश्र्वावसू, पराभव, प्लवंग, कीलक, सौम्य, साधारण, विरोधकृत, परिधावी, प्रमादी, आनंद, राक्षस, अनल, पिंगल, कालयुक्त, सिध्दार्थी, रौद्र, दुर्मती, दुंदुभी, रूधिरोद्गारी, रक्ताक्ष, क्रोधन आनी क्षय.
बारा म्हयन्यांच्या काळाक संवत्सर अशें नांव आसा. म्हयन्यांचे जे तरेन चांद्र सावन आनी सौर अशे भेद आसात, तशेच संवत्सराचेय चांद्र, सावन आनी सौर अशे तीन प्रकार आसात. चैत्र शुध्द पाडव्यासावन फाल्गुन उमाशेमेरेनचो काळ, ताका चांद्र संवत्सर अशें म्हणटात. चांद्र संवत्सर तीनशें चौपन्न दिसांचो मानला. तीनशें साठ दिसांच्या काळाक सावन संवत्सर अशें नांव आसा. मेष राशींत सूर्यान प्रवेश केल्ल्या दिसासावन मीन राशींतल्यान तो भायर सरता त्या दिसामेरेनचो काळ, तें सौर वर्स. सौर वर्स तीनशें पासश्ट दिसांचें आसता. केन्नाय संवत्सराचे बार्हस्पत्य आनी नाक्षत्र अशे आनीक दोन प्रकार मानल्यात. बार्हस्पत्य संवत्सरांत तीनशें एकसश्ट दीस आसतात. तीनशें चोवीस दिसांचें नाक्षत्र संवत्सर आसता.
नर्मदा न्हंयेच्या दक्षिणेकडल्या भारताच्या सगळ्या वाठारांनी कलियुगाचें पयलें वर्स प्रमाथी संवत्सर आशिल्लें अशें मानतात आनी दर वर्सा चैत्र शुध्द पाडव्यासावन संवत्सराचो आरंभ धरतात. अशे तरेन एक चक्र पुराय जातकच परतून प्रभव संवत्सरापसून आरंभ करतात. पूण नर्मदेच्या उत्तरेकडल्या भारतांत, कलियुगाचे सुरवातेक
