हाचेफुडलें पुरायपणान भारतीय बांदावळीचें दुसरें लडायेचें विमान मरूत-एच्.एफ्.-२४ हें आसा.१९६३ वर्सा भारत-रशिया करार जावन रशियेन मिग-२१ जातीचीं सामकीं आर्विल्लीं लडायेचीं विमानां भारताक दिवपाचें तशेंच ह्या विमानांचें भारतांतच हाचेंफुडें उत्पादन जावंचें म्हणून भारतीय विज्ञानिकांक फावो तें प्रशिक्षण दिवपाचेंय मान्य केलें.हिंदुस्तान अॅरक्राफ्ट कारखानो(बेंगळूर)हाचेकडल्यान ह्या विमानाची निर्मणी भारतात तीनकडेन जाता.विमानाचो सांगाडो ओझर(महाराष्ट्र),शक्तिसंयंत्र(पावर प्लाण्ट) कोरापूट(ओरिसा) आनी उडपाची यंत्रसामुग्री(एविओनिक्स)बालानगर (हैदराबाद-आंध्र प्रदेश)ह्या सुवातींचेर तयार करतात.मिग-२१ त १९६३ उपरांत ब-योच सुदारणा जाल्यो.रशियेच्या परवान्याखाला आतां मिग-२३ ह्या अदीक आर्विल्ल्या विमानाचें उत्पादन भारतांत सुरू जालां.हाचेभायरे रशियेन भारताक मिग-२७ आनी मिग-२९ हीं विमानां दिवन भारतीय वायुसेनेचें दक्षिण आशियांतलो वर्चस्व अबादीत राखपाक आदार केला.
नॅट विमानावांगडाच सुदारिल्ल्या मिगाचो वापर १९६५ आनी १९७१ च्या भारत-पाक झुजांत आनी बांगलादेश आघाडेचेर केला.भारतात १९६८ त रशियेवांगडा सुखोय-७ एर्विल्ल्या भुंवयेर मारो करपी लडायेच्या विमानाखातीर कबलात करून ताचींच स स्कॉड्रनां विकतीं घेतली.पूण हीं विमानां आतां निवृत्त जाल्लीं आसून,तांचेपरस अदीक तांकीचीं अशीं मिग-२७,जॅग्वार आनी मिराज्य-२००० ह्या विमानांनी तांची सुवात घेतल्या. सद्या भारतीय वायुसेनेंत ६० स्कॉड्रनांवयर विमानां आसून हे यंत्रणेंत अधिकारी आनी हवाई शिपाई मेळून सुमार १,१०,००० अशें तांचें संख्या बळ आसा.
पूरक नोंद :वातयान
विमो:(पळेयात भारतीय आयुर्विमा निगम).
विरासन:(पळेयात आसन).
विर्जिनकार,मोहनदास नारायण:(जल्म:२ जानेवारी १९३३ मडगांव-साश्ट).
सुटकेझुजारी.ताणें बी.एस्सी.मेरेन शिक्षण घेतलें.तो नॅशनल काँग्रेस गोवा हे संघटनेचो वांगडी आशिल्लो.सुटके चळवळीच्या काळांत भूंयगत वावरांनी वांटो घेवप,राश्ट्रीय पत्रकां छापप आणि तीं क्रांतीका-यांमदीं वांटप,क्रांतीका-यांक गोंयांत तशेंच गोंयाभायर वचपाक आदार दिवप,असलीं कामां तो करतालो.७ एप्रिल १९५५ ह्या दिसा पोलिसांनी ताका धरलो आनी पणजे ठाण्याचेर दवरलो.उपरांत प्रादेशिक लश्करी न्यायालयामुखार उबो करून दोन वर्सां खर बंदखणीची ख्यास्त फर्मायली.तेचपरी १५ वर्सांखातीर ताच्या राजकीय हक्कांचेर बंद हाडली.३१ डिसेंबर १९५७ ह्या दिसा बंदखणीमतल्यान ताची सुटका जाली.गोंय सुटके उपरांत इंडियन नॅशनल काँग्रेसीच्या मडगांव शार मंडळाचो अध्ययन म्हूण ताका वेंचून काडिल्लो.१९७२ वर्सा भारत सरकारान ताम्रपत्र दिवन ताचो भोवमान केलो.
विवेकसिंधू:अव्दैत वेदान्ताचें प्रतिपादन करपी मराठी भाशेंतलो आद्द ग्रंथ.मुकुंदराज हो ह्या ग्रंथाचो कर्तो.ह्या ग्रंथाचे पुर्वार्ध आनी उत्तरार्ध अशे दोन भाग आसात.पयल्या भागांत विश्र्वाची उभारणी आनी दुस-या भागांत स्वरूपसमावेशन ,स्वानुभवदृढीकरण,तत्वसृश्टीक्रम,ईश्र्वरतनुत्रय,त्वंपदकारणलिंगदेह,स्थूलदेह आनी सर्व ब्रह्म ह्या विशयाचें विवेचन केल्लें आसा.दुस-या भागांत संहाराखातीर पिंडब्रह्मांडाचे स्थूलदेह,लिंगदेह,कारणदेह आणि महाकारणदेह हांचें विवरण आनी उपरांत निरसन आसा.फुडें पंचप्रलयाचें स्वरूप आणि तत्पदार्थांचें शोधन सांगिल्लें आसा.जीवात्मो आनी परमात्मो हांचें तादात्म्य सिध्द करून मुक्तिस्वरूप स्पश्ट केल्लें आसा.ताच्याउपरांत अध्यात्माविशीं उत्पन्न जाल्ल्या वेगवेगळ्या प्रस्नांचें खंडन करून अव्दैत प्रतिपादन केल्लें आसा.ह्या विशयावयल्यानच सत्-चीत्-आनंद ह्या पदत्रयाचेर प्रवचन आसा.सगळ्यांत निमाणें गुरूमाहात्म्य दिल्लें आसा.
ह्या विशयांभायर खांय हेर विशयांचेंय विवेचन ह्या ग्रंथांत आयिल्लें आसा.तातूंत मराठीचें व्हडपण,ग्रंथाचो उद्देश,ताचें फळ,गुरू-शिश्यलक्षणां आदी विशय आसात.
विवेकानंद:(जल्म:१२ जानेवारी १८६३,कलकत्ता,मरण:४ जुलय १९०२,बेलूर).
आर्विल्ल्या काळांतलो एक म्हान वेदान्तमार्गी राश्ट्रसंत आनी थोर विचारवंत.बंवगालांतल्या दत्त आडनांवाच्या एका गिरेस्त आणि प्रतिश्ठीत अशा कायस्थ घराण्यांत ताचो जल्म जालो.ताच्या बापायचें नाव विश्वनाथ दत्त आनि आवयचें नांव भुवनेश्वरी देवी.विवेकानंदाचो बापूय,आजो आनी पणजो हे सगळे कलकत्याच्या सर्वोच्च न्यायालयामत नामनेचे वकील म्हणून गाजले.पणज्यासावन,तांच्या घरांत अस्तंती विद्देचोय व्यासंग चलतालो.विवेकानंदाचो आजो दुर्गाचरण हो सुरवेकसावन अध्यात्ममार्गी आनी विरक्त वृत्तीचो आशिल्ल्यान एक भुरगो जल्माक येनाफुडें संन्यास घेतलो आनी काशीक गेलो.ताचो आध्यात्मिक वारसो उपरांत ताचो नातू विवेकानंदान
