मनोगत
कोंकणी विश्वकोशाचो हो चवथो आनी निमणो खंड प्रकाशीत करतना आमकां खूब आनंद जाता.
कोंकणी भाशेची उदरगत करप हो गोवा विद्यापिठाचो एक मुखेल उद्देश आसा. ह्या उद्देशाक धरून गोवा विद्यापिठान कोंकणी विश्वकोश निर्मितीचो संकल्प केल्लो. कोंकणी भाशेंतल्या ह्या पयल्या वयल्या विश्वकोशाची निर्मिती यशस्वीपणान करून गोवा विद्यापिठान केल्लो संकल्प आयज सार्थकी जाला. म्हजे उपकुलगुरू पदाचे कारकिर्दींत दुसरो,तिसरो आनी चवथो अशे तीन खंड प्रकाशीत जाले हें हांव म्हजें परम भाग्य समजतां.
सर्वसादारण कोंकणी मनशाक, तशेंच विद्वानाक ताचे निजाचे भाशेंतल्यान संवसारांतल्या गिन्यानाची सोंपेपणी वळख करून दिवपाच्या उद्देशान गोवा विद्यापिठान कोंकणी विश्वकोशाची निर्मिती करूंक घेतली. जाका आपली आवयभास सोडून दुसरी भास येना तो गिन्याना पासून वंचीत उरचो न्ही, तशेंच जाका हेर भासो येतात ताचे खातीर ताचे निजाचे भाशेंतल्यान खाशेलें गिन्यान मेळचें अशो दोट्टी अपेक्षा सफल करपी हो विश्वकोश कोंकणी खातीर आदर्श असो शास्त्रीय संदर्भ ग्रंथ आसा.
निकतीच वयर सरूंक लागिल्ले कोंकणी भाशेंतलो विश्वकोश निर्माण करप हो भोव कश्टांचो वावर. अपुरीं साधनां आनी अपुरें मनीसबळ घेवन संपादक मंडळान हो वावर पुराय केलो, ते खातीर हांव तांची तोखणाय करून तांकां शाबासकी दितां. विशेश करून, विश्वकोशाचे संपादक डॉ.तानाजी हळर्णकार हांणि दिल्लें योगदान गोवा विद्यापिठाच्या इतिहासांत नमूद करपा सारकें आशिल्ल्यान हांव तांकां खेरीत धन्यवाद दितां.
पयल्या तीन खंडां सारकेंच ह्या चवथ्या खंडाचेंय कोंकणी मनशाकडल्यान उत्स्फूर्त स्वागत जातलें अशी आशा बाळगितां.
गोवा विद्यापीठ ताळगांव-गोंय. २६ ऑक्टोबर २०००.
डॉ.बाळकृष्ण सोंदे उपकुलगुरू
