रोझ, आल्फ्रेड : (जल्म : 5 ऑगस्ट, हळदोणें – बार्दे).
पुराय नांव रुझारियो आल्फ्रेड फेर्नांदीश. ताचें मुळावें शिकप मुंबय सेंट झेवियर हायस्कुलांत जालें. मुंबयचे ग्रिंडलेस बँकेंत नोकरी करता आसतनाच स्त्री. ए.आय.बी. हें बँकिंगचें प्रशिक्षण पुराय केलें. नोकरेंत मन लागना जाल्ल्यार इकरा वर्सां नोकरी करून नोकरेचो राजिनामो दिवन तो भायर सरलो. भुरगेपणासावन ताका गायनाचो छंद आशिल्लो. तोच वेवसाय करपाचें ताणें थारयलें. आपूण रचून कांतारां गावंक लागलो. 1962त आवाजाचें प्रशिक्षण घेवपाखातीर तो लंडनाक गेलो. 1962 ते 70 मेरेन अबुधाबीक नॅशनल सिटी बँकेंत इम्पोर्ट एक्सपोर्ट विभाग मुखेली म्हणून ताणें चाकरी केली. ह्याचवेळार तणें बैरूट, जर्मनी, इजिप्त, पॅरीसाची भोंवडी केली. 1978त ताणें कोंकणी गितांची व्हड कॅसेट काडली. आयजमेरेन ताच्यो अशो 15 कॅसेटी भायर सरल्यात, तशेंच चार व्हड ध्वनीमुद्रिका आनी 50 ल्हान रेकॉर्डीय आयल्यात. ताचीं गितां (कांतारां) आकाशवाणी, दूरदर्शनावयल्यानय वाजतात. बगलांट ह्या सिनेमाचीं पदां, ताणेंच रचल्यांत, तशेंच तांकां संगीतय ताणेंच दिलां. ताच्या कांतारांक खूब नामना मेळ्ळी. मुंबय, बेळगांव, गोंय तेच प्रमाण लंडनाक ताणें स्टेज शो केल्यात. ओडलायणी उतरावळ, संगीत आनी काव्य हांकां लागून ताच्या कांतारांनी लोक धादोशी जातात. ताची घरकान्न रीटा रोझय ताका ह्या कामांत आदार दिता. एरोप्लेनाक उजो, गुपीत मोग, दोतोराचो दोतोर, ट्रेन आनी बस आक्शिनेत हीं ताची बरींच गाजिल्लीं कांतारां. बरो गीतकार, बरो संगीतकार आनी बरो गावपी अशी ताची किर्त आसा.
-कों. वि. सं. मं
रोटरी इंटरनॅशनल : उद्देगधंद्यांत नामना मेळयल्या व्यक्तींनी वेगवेगळ्या क्षेत्रांत, समाजाची सेवा करची आनी अशी सेवा करप्यांक प्रोत्साहन दिवचें म्हणून स्थापणूक केल्ली एक आंतरराश्ट्रीय नागरी संस्था. भूतदया, मानवतावादी आनी शैक्षणिक प्रकल्प हांच्या माध्यमांतल्यान वेगवेगळ्या राश्ट्रांतल्या नागरिकांमदीं इश्टागत जावंची हो रोटरी संस्थेचो मुखेल उद्देश मानतात.
पयलीं वेगवेगळ्या सभासदांच्या कार्यालयांत क्लबाची बसका जाताली. ताचेवयल्यान ह्या क्लबाक ‘रोटरी’ म्हळ्यार ‘घुंवतो’ क्लब अशें नांव पडलें. पयलो रोटरी क्लब 23 फेब्रुवारी 1905 दिसा शिकागोक पॉल पर्सी हॅरिस ह्या वकिलान स्थापलो. तेउपरांत 1910 वर्सा ‘द नॅशनल असोसिएशन ऑफ रोटरी क्लब्स’ ही संघटना स्थापन जाली. फुडें कॅनडा, आयर्लंड, ग्रेट ब्रिटन ह्या देशांनी क्लबाचे फांटे जाले आनी 1912 वर्सा क्लबाचें नांव ‘रोटरी इंटरनॅशनल’ अशें दवरलें हें संस्थेचें संवसारीक मुख्यालय अमेरिकेच्या इलिनॉय राज्यांतल्या एव्हॅन्स्टनाक आसा.
1919 वर्सा रोटरी क्लब आशिया खंडांत मनिला (फिलिपिन्सयय) आनी कलकत्यांत (भारतांत) सुरू जालो. 1929 वर्सा मुंबय आनी चेन्नई (मद्रास) ह्या क्लबाची स्थापणूक जाली. रोटरी इंटरनॅशनल डिस्ट्रिक्ट 314 ची स्थापना महाराष्ट्रांत 1 जुलय 1970 वर्सा जाली. रोटरीच्या वांगड्यांक ‘रोटेरियन’ म्हण्टात. रोटरी इंटरनॅशलाचे वट्ट 18 संचालक आसतात आनी ताचे अध्यक्ष 12 वेगवेगळे महासंघ नेमतात. वट्ट डिस्ट्रिक्ट गव्हर्नर 485 आसून ते आपापल्या डिस्ट्रिक्टाखातीर संचालक नेमतात. प्रत्येक रोटरी क्लबाचो अध्यक्ष आपआपले वांगडी नेमता. रोटरी इंटरनॅशनलचें इंग्लीश मुखपत्र रोटेरियन (स्पेनी आवृत्ती ‘रिव्हिस्ता रोतेरिआ’) हें शिकागोच्यान उजवाडा येता. अमेरिकेंत शिकागोंत संस्थेचें सचिवालय आसून ताची विभागीय कार्यालयां झुरिक (स्वित्झर्लंड), लंडन (ग्रेट ब्रिटन) आनी मुंबयंत आसात. हुशार विद्यार्थ्यांक उंचेल्या शिक्षणाखातीर शिश्यवृत्यो दिवप, ग्रंथालयां उबारप, उद्येग घंद्याचें प्रशिक्षण दिवप, ग्रामविकासांत अर्थीक आदार करप, कुड्या – थोंट्यांक सुविधा मेळोवन दिवप, अशीं सेवेचीं कामां भारतांत आनी हेर देशांनी ही संस्था करता. 19 – 63 आनी 1991-92 ह्या वर्सा रोटरीचें संवसारीक अधिवेशन भरून, तातूंत संवसारीक अध्यक्ष वेंचून काडटात.
रोटरी इंटरनॅशनलाच्या 1917 वर्सा ॲटलांटांत (जॉर्जिया राज्य) भरिल्ले आतंरराश्ट्रीय परिशदेंत धर्मादायी, परोपकारी आनी शैक्षणिक उपक्रमांक चालन दिवपाच्या हेतून ‘रोटरी फाउंडेशन’ नांवाचो निधी उबारलो. ह्या प्रतिश्ठानाक मेळपी देणग्यो, आनी तांची वेवस्था, प्रशासन हांची जबाबदारी पांच विश्र्वस्तांचेर सोंपयतात. ह्या रोटरी इंटरनॅशनलच्या संचालक मंडाळान 1962 वर्सा ‘इंटरॅक्ट’ नांवाची जगांत माध्यमिक शाळांतल्या विध्यार्थ्यांखातीर एक संघटना स्थापन केली. तरणाट्यांमदले नेतृत्वगूण, तशेंच आंतरराश्ट्रीय सेवेचो आनी
