रुद्रिगीश, मायकल डी.डी. : (जल्म : ? ; मरण : 1964). बेळगांवचो पयलो गोयकार धर्म गुरू. ताचो मूळ गांव चिंबल इल्हास. पूण धर्मीक शिक्षण घेतले उपरांत 1918 वर्सा पाद्री म्हणून ताची नेमणूक जाली. 1953 वर्सा तो धर्मगुरू जालो. -कों. वि. सं. मं.
रुद्रिगीश, मारियु: (जल्म : 1923, केळशी-साश्ट; मरण: 22 एप्रिल 1981).
सुटकेझुजारी. भुरगेपणांत ताका 1945चे नवाल म्युटिनी, मुबंय; सुभाषचंद्र बोसाची आझाद हिंदी सेना आनी देशांतली राश्ट्रीय जागृताय हाचेपसून स्फूर्त मेळून ताका सुटकेझुजाविशीं उर्बा मेळ्ळी. तो ब्रिटिश हवाई दलांत काम करतालो. थंयच्यान मेकळो जातकच 1964त तो गोंयांत आयलो आनी सविनय कायदेभंग चळवळीखातीर वावर करूंक लागलो. एवाग्रीय जॉर्ज हाचेवांगडा तो मडगांव मिरवणुकांनी वांटो घेतलो. ताका लागून पुलिसांनी ताका धरलो आनी दोन दीस मडगांव पुलीस ठाण्यार दवरलो. अहिंसात्मक चळवळीपरस ताचो कल क्रांतीकारी चळवळीकडेन चड आशिल्लो. 1947 वर्सा तो आझाद गोमंतक दल संघटनेचो वांगडी जालो. भूंयगत वावर करूंक तो हांगा –थंय पांयानी वतालो आनी सुटकेझुजाऱ्यांक बातम्यो, पत्रकां पावयतालो. ताच्या ह्या वावराखातीर सप्टेंबर 1948 मुंबय, थंयच्या गोंयकार रहिवांशांनी ताचो विश्वनाथ ना. लवंदे वांगडा सत्कार केलो. 1953 वर्सा ताणें वजऱ्यां गनिमी झुजाचें प्रशिक्षण घेतल्लें. 1954 वर्सा तो गोवन पिपल्स पार्टीचो वांगडी जालो. नगर हवेलीचे सुटके वेळार थंयचे जायते गांव तशेंच खांडवेलची सुटका करून घेवंक ताणें मोलादीक वावर केल्लो. 1955त पणजे पालासींत बाँब स्फोट घडोवन हाडपाच्या कटांत ताचो वांटो आशिल्लो. ताका 22 वर्सां बंदखणीची ख्यास्त फर्मायल्ली. भारत सरकारान ताम्रपत्र दिवन ताचो भोवमान केलो.
-कों. वि. सं. मं.
रुद्रिगीश, सुनीत एफ्. : (जल्म : 19 सप्टेंबर 1933,मुंबय).
एक भारतीय लश्कर प्रमुख. ताच्या बापायचें नांव फ्रांसिस्क आनी आवयचें नांव आयडा. ताणें एम्. एस्सी. मेरेन शिक्षण घेतलें. हाचेभायर डिफेन्स सर्वीस ऑफ स्टाफ कॉलेज, वेलींगटन आनी रॉयल कॉलेज ऑफ डिफेन्स स्टडीज, इंग्लडं हांगा ताणें लश्कराचें शिक्षण घेतलें. 1949 वर्सा तो भारतीय सैन्याच्या कक्षांत काम करूंक लागलो. 1952 वर्साच्यान तो तोफखान्याचो अधिकारी जालो. 1970-71 ह्या वर्सा ताका जनरल स्टाफ ऑफिसर ग्रेड – 1 हें जद मेळेळें. 1971-75 ह्या काळांत ताची माऊंटन ब्रिगेडची कमांडर (गिर्यारोहक) म्हूण नेमणूक जाली. हे मोहिमेंतली ताची कामगिरी पळोवन रॉयल कॉलेज ऑफ डिफेन्स स्टडीज (U.k) हांगा आर्मीचो प्रशिक्षक म्हूण नेमणूक जाली. थंयच्यान आयले उपरांत तो डिफेन्स सर्व्हीस स्टाफ कॉलेज, वेंलिंगटन हांगा मुखेल मार्गदर्शक जालो, हाचेभायर 1983-85 ह्या काळांत डायरेक्टर जनरल मिलिटरी ट्रेनिंग (आर्मी हेडक्वार्टर्स), 1985त जन्मु आनी काश्मीरचो आर्मी कमांडर,1986 वर्सा आर्मीचो उपमुखेली तशेंच 1990 वर्सा चीफ ऑफ आर्मी स्टाफ (लश्कराचो मुखेली) अशीं वेगवेगळीं पदां भुशयली. तशेंच तीन फावट वेगवेगळ्या भारतीय झुजांनी वांटो घेतलो.
1988 वर्सा ताका परम विशिश्ट सेवा मॅडल आनी उपरांत विशिश्ट सेवा मॅडल फाव जालें.
निवृत्त जाल्या उपरांत तो सद्या गोंयांत स्थायीक जाला. तो गोंय विद्यापीठ, इंटरनॅशनल सेंटर, माजी लश्कर अधिकारी संघटना आनी हेर सामाजीक, संस्कृतीक संस्थाच्या कारभारांत सक्रीय आसा.
-कों. वि. सं. मं.
श्री रुदेश्र्वर देवस्थान – हरवळें : दिवचल म्हालांतल्या सांखळी वाठारांतल्या श्रीक्षेत्र हरवळ्यां आशिल्लें नामनेचें देवस्थान. ह्या थळाची इतिहासीक वा पुराणीक म्हायती मेळना. पूण थंयच्या घटनात्मक नेमावळींत जी म्हायती मेळटा ताचेवयल्यान हें देंवस्थान पुर्विल्ल्या काळांत नायक भंडारी समाजान स्थापन केलें आनी थंय देवूळ बांदलें म्हणपाचें कळटा . हें श्रीरुद्रेश्र्वर देवस्थान ज्या जाग्यार आसा त्या वाठाराक आगर देवळाकडलें थळ ह्या नांवान वळखतात. ह्या देवळांत मुखेल दैवत श्रीरुद्रेश्र्वर शिवलिंग आसून ताचे अस्तंतेकडेन पांडवांच्यो व्होंवऱ्यो आनी पुर्वाचारी तशेंच उदेंतेकडेन निराकारी हिं अनुषंगिक दैवतां आसात.
ह्या तीर्थथळार व्हड जात्रा भरता. तशेंच महाशिवरात्रेच्या दुसऱ्या दिसा सकाळीं रथोत्सव जाता. त्या देवस्थानाचे सगळे म्हाजन नायक भंडारी समाजाचे आसात. श्री रुद्रेश्र्वर देवस्थानची घटनात्मक नेमावळ तेन्ना तयार जावन त्या देवस्थानाच्या म्हाजनांची नांवां आसात. रायबंदर, पणजी, करमळी, कुंमारजुंवें, सांतान, कुडका, पाळें, मोवळें, मेरशी, ताळगांव, कालापूर, नुवें, म्हापशें, वेरें, निल्ला, कांदोळी, हळदोणें, शिरगांव, मयें, नानोडें, वांयगिणी, पिळगांव, सांखळी, परयें, मोरियें, कारापूर, कुडणें, विर्डी, गांवठण, गावणें, वाघुर्में, खांडोळें, हडकोळण, दुर्भाट, करझोल, म्हाड्डोळ, भोम, वळवय, केरी-पेडणें, हरमल, खोर्जुवें मांद्रें अशा 42 गांवांनी हे म्हाजन पातळिल्ले आसात.
पिरायेचीं अठरा वर्सां पुराय जाल्ल्या फकत नायक भंडारी समाजाच्याच खंयच्याय मनशाक ह्या देवस्थानाच्या म्हाजनांचे वळेरेंत
