Page:Kajawen 50 1927-12-15.pdf/9

ꦮꦂꦤꦺꦤ꧀ꦲꦧꦿꦶꦠ꧀ꦲꦧꦿꦶꦠ꧀ꦠꦼꦩ꧀ꦠꦸ​ꦒꦩ꧀ꦧꦶꦫ꧈​ꦲꦩꦶꦭ​ꦱꦉꦁ​ꦢꦶꦥꦸꦤ꧀ꦲꦛꦸꦁ​ꦔꦶ​ꦲꦶꦁ​ꦲꦧꦿꦶꦠ꧀ꦲꦧꦿꦶꦠ꧀ꦮꦲꦸ꧈​ꦲꦶꦁ​ꦒꦶꦃ​ꦭꦗꦼꦁ​ꦠꦼꦫꦸꦱ꧀ꦢꦶꦥꦸꦤ꧀ꦱꦿꦸꦢꦸꦒ꧀꧈​ꦲꦤꦔꦶꦁ​ꦱꦏꦶꦁ​ꦏꦥꦿꦶꦒꦼꦭ꧀ꦭꦤ꧀ꦤꦶꦥꦸꦤ꧀꧈​ꦠꦶꦪꦁ​ꦲꦶꦁ​ꦏꦁ​ꦏꦱꦿꦸꦢꦸꦒ꧀ꦮꦲꦸ​ꦭꦗꦼꦁ​ꦲꦺꦤ꧀ꦝ꧈​ꦱꦲ​ꦲꦩꦭꦶꦏ꧀ꦲꦧꦿꦶꦠ꧀ꦲꦧꦿꦶꦠ꧀ꦠꦶꦥꦸꦤ꧀ꦭꦶꦤꦶꦤ꧀ꦠꦸ​ꦲꦶꦁ​ꦏꦁ​ꦕꦼꦩꦼꦁ​꧈​ꦩꦏꦠꦼꦤ꧀ꦱꦭꦗꦼꦁ​ꦔꦶꦥꦸꦤ꧀ꦔꦤ꧀ꦠꦺꦴꦱ꧀ꦊꦩ꧀ꦧꦸ​ꦢꦢꦺꦴꦱ꧀ꦩꦸꦫꦶꦁ​ꦩꦸꦫꦶꦁ​ꦱꦪꦼꦏ꧀ꦠꦺꦴꦱ꧀꧉​ꦩꦤꦮꦶ​ꦊꦩ꧀ꦧꦸ​ꦱꦩ꧀ꦥꦸꦤ꧀ꦏꦠꦶꦔꦭ꧀ꦩꦸꦫꦶꦁ​ꦩꦸꦫꦶꦁ​ꦱꦔꦼꦠ꧀꧈​ꦩꦼꦁ​ꦱꦃ​ꦲꦶꦁ​ꦏꦁ​ꦤꦸꦩ꧀ꦥꦏ꧀ꦏꦥꦭ꧀ꦭꦗꦼꦁ​ꦝꦠꦼꦁ​ꦲꦩꦸꦫꦸꦒ꧀ꦒꦶ​ꦏꦭꦪꦤ꧀ꦚꦺꦴꦧꦶ​ꦚꦸꦢꦸꦏ꧀ꦊꦩ꧀ꦧꦸ​ꦩꦮꦶ​ꦥꦼꦝꦁ​ꦔꦶꦥꦸꦤ꧀ꦲꦁ​ꦒꦂ꧉​

꧋ꦩꦼꦁ​ꦒꦃ​ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦲꦧꦼꦤ꧀ꦲꦧꦼꦤ꧀ꦮꦲꦸ꧈​ꦩꦤꦮꦶ​ꦩꦼꦁ​ꦱꦃ​ꦲꦶꦁ​ꦏꦁ​ꦤꦸꦩ꧀ꦥꦏ꧀ꦏꦥꦭ꧀ꦥꦚ꧀ꦕꦺꦤ꧀ꦥꦿꦶꦒꦼꦭ꧀ꦭꦤ꧀ꦥꦿꦪꦶꦠ꧀ꦤ꧈​ꦲꦶꦁ​ꦒꦶꦃ​ꦠꦸꦩꦸꦤ꧀ꦠꦼꦤ꧀ꦱꦒꦼꦢ꧀ꦲꦩꦼꦗꦃꦲꦶ​ꦊꦩ꧀ꦧꦸꦤꦶꦥꦸꦤ꧀꧉​ꦲꦤꦔꦶꦁ​ꦩꦤꦮꦶ​ꦭꦺꦤ꧈​ꦱꦒꦼꦢ꧀ꦕꦶꦭꦏ​ꦥꦶꦪꦩ꧀ꦧꦏ꧀ꦗꦭꦂꦫꦤ꧀ꦏꦱꦿꦸꦢꦸꦒ꧀ꦲꦶꦁ​ꦊꦩ꧀ꦧꦸꦤꦶꦥꦸꦤ꧀ꦮꦲꦸ꧉​

꧋ꦏꦗꦮꦶ​ꦥꦸꦤꦶꦏ​ꦮꦺꦴꦤ꧀ꦠꦼꦤ꧀ꦩꦭꦶꦃ​ꦲꦶꦁ​ꦏꦁ​ꦩꦼꦁ​ꦱꦃ​ꦊꦩ꧀ꦧꦸ​ꦮꦲꦸ​ꦧꦺꦴꦠꦼꦤ꧀ꦩꦮꦶ​ꦤꦸꦩ꧀ꦥꦏ꧀ꦏꦥꦭ꧀꧈​ꦤꦩꦸꦁ​ꦝꦫꦠ꧀ꦏꦺꦩꦮꦺꦴꦤ꧀ꦱꦂꦠ​ꦲꦶꦁ​ꦒꦶꦃ​ꦲꦩ꧀ꦧꦼꦏ꧀ꦠ​ꦢꦢꦩꦼꦭ꧀ꦥꦼꦝꦁ​ꦲꦁ​ꦒꦂ꧉​ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦠꦶꦪꦁ​ꦮꦲꦸ​ꦱꦪ​ꦲꦩ꧀ꦧꦧꦪꦤ꧀ꦤꦶ꧈​ꦩꦶꦭ​ꦧꦶꦭꦶꦃ​ꦔꦤ꧀ꦠꦺꦴꦱ꧀ꦭꦺꦤ​ꦱꦏꦼꦝꦶꦏ꧀ꦏꦺꦩꦮꦺꦴꦤ꧀꧈​ꦗꦶꦮꦤꦶꦁ​ꦠꦶꦪꦁ​ꦮꦲꦸ​ꦠꦼꦩ꧀ꦠꦸ​ꦱꦒꦼꦢ꧀ꦏꦧꦸꦂ​ꦢꦺꦤꦶꦁ​ꦱꦶꦔꦠ꧀ꦠꦶꦁ​ꦊꦩ꧀ꦧꦸ꧈​ꦩꦶꦂꦱꦤ꧀ꦤꦤ​ꦒꦩ꧀ꦧꦂ​ꦲꦶꦁ​ꦏꦁ​ꦏꦕꦼꦛ​ꦲꦶꦁ​ꦱꦶꦱꦶꦃ​ꦥꦸꦤꦶꦏ꧉​

꧋ꦩꦺꦴꦁ​ꦒ​ꦥꦫ​ꦩꦲꦺꦴꦱ꧀꧈​ꦏꦸꦭ​ꦲꦠꦸꦂꦫꦶ​ꦩꦁ​ꦒꦭꦶꦃ꧈​ꦥꦸꦤꦥ​ꦧꦺꦴꦠꦼꦤ꧀ꦲꦁ​ꦒꦸꦩꦸꦤ꧀ꦤꦏꦼꦤ꧀꧈​ꦲꦶꦁ​ꦔꦠꦱ꧀ꦱꦶꦥꦸꦤ꧀ꦗꦩꦤ꧀ꦱꦩꦁ​ꦏꦺ​ꦠꦼꦏ​ꦠꦏ꧀ꦱꦶꦃ​ꦮꦺꦴꦤ꧀ꦠꦼꦤ꧀ꦠꦶꦠꦶꦔꦭ꧀ꦭꦤ꧀ꦲꦸꦠꦮꦶ​ꦏꦱꦼꦤꦼꦁ​ꦔꦤ꧀ꦲꦶꦁ​ꦏꦁ​ꦲꦩ꧀ꦧꦧꦪꦤ꧀ꦤꦶ​ꦠꦸꦮꦶꦤ꧀ꦱꦶꦪ​ꦱꦶꦪ​ꦩꦏꦠꦼꦤ꧀꧈​ꦲꦮꦶꦠ꧀ꦥꦸꦤꦥ​ꦲꦶꦁ​ꦒꦶꦃ​ꦧꦺꦴꦠꦼꦤ꧀ꦲꦔꦼꦉꦱ꧀ꦲꦼꦉꦱ꧀ꦱꦶ​ꦩꦤꦃ꧈​ꦢꦺꦤꦺ​ꦥꦼꦗꦃꦲꦶꦁ​ꦊꦩ꧀ꦧꦸ​ꦮꦲꦸ​ꦥꦿꦱꦱꦠ꧀ꦢꦶꦥꦸꦤ꧀ꦫꦚ꧀ꦗꦩ꧀꧉​ꦥꦸꦤꦥꦢꦺꦤꦺ​ꦏꦥꦭ꧀꧈​ꦭꦁ​ꦏꦸꦁ​ꦩꦭꦶꦃ​ꦠꦶꦪꦁ​ꦔꦶꦥꦸꦤ꧀ꦲꦶꦁ​ꦏꦁ​ꦤꦸꦩ꧀ꦥꦏ꧀ꦏꦶ꧈​ꦩꦤꦮꦶ​ꦥꦼꦗꦃꦲꦶꦥꦸꦤ꧀ꦮꦲꦸ​ꦗꦭꦂꦫꦤ꧀ꦏꦱꦸꦤ꧀ꦝꦁ​ꦲꦶꦁ​ꦊꦩ꧀ꦧꦸ꧈​ꦒꦺꦏ꧀ꦏꦢꦺꦴꦱ꧀ꦥꦸꦤꦥ​ꦏꦺꦩꦮꦺꦴꦤ꧀ꦏꦸꦩꦼꦱꦂ​ꦲꦸꦠꦮꦶ​ꦏꦸꦩꦼꦥꦾꦸꦂꦫꦶꦁ​ꦩꦤꦃꦲꦶꦥꦸꦤ꧀ꦲꦶꦁ​ꦏꦁ​ꦱꦩꦶ​ꦤꦶꦔꦭ꧀ꦭꦶ꧉​

꧋ꦲꦺꦮꦱꦩꦤ꧀ꦠꦼꦤ꧀ꦲꦶꦁ​ꦠꦤꦃ​ꦗꦮꦶ​ꦲꦶꦁ​ꦒꦶꦃ​ꦮꦺꦴꦤ꧀ꦠꦼꦤ꧀ꦲꦧꦼꦤ꧀ꦲꦧꦼꦤ꧀ꦲꦶꦁ​ꦏꦁ​ꦱꦲꦺꦩ꧀ꦥꦼꦂ​ꦥꦸꦤꦶꦏ꧈​ꦲꦤꦔꦶꦁ​ꦲꦶꦁ​ꦏꦁ​ꦩꦏꦠꦼꦤ꧀ꦮꦲꦸ​ꦱꦩ꧀ꦥꦸꦤ꧀ꦏꦭ​ꦲꦶꦁ​ꦗꦩꦤ꧀ꦏꦶꦤ꧈​ꦲꦶꦁ​ꦒꦶꦃ​ꦥꦸꦤꦶꦏ​ꦩꦶꦠꦸꦫꦸꦠ꧀ꦕꦫꦶꦪꦺꦴꦱ꧀ꦱꦶꦁ​ꦱꦼꦫꦠ꧀ꦧꦧꦢ꧀ꦢꦼꦩꦏ꧀꧈​ꦤꦭꦶꦏ​ꦏꦶ​ꦲꦒꦼꦁ​ꦲꦶꦁ​ꦯꦼꦱꦺꦭ​ꦭꦸꦩꦼꦧꦼꦠ꧀ꦧꦝꦺ​ꦢꦢꦺꦴꦱ꧀ꦥꦿꦗꦸꦫꦸꦠ꧀ꦠꦩ꧀ꦠꦩ​ꦲꦶꦁ​ꦢꦼꦩꦏ꧀꧈​ꦥꦸꦤꦶꦏ​ꦏꦥꦿꦮꦶꦫꦤ꧀ꦤꦶꦥꦸꦤ꧀ꦭꦗꦼꦁ​ꦏꦢꦢꦂ​ꦱꦫꦤ​ꦢꦶꦥꦸꦤ꧀ꦲꦧꦼꦤ꧀ꦏꦭꦶꦪꦤ꧀ꦧꦤ꧀ꦛꦺꦁ​꧉​ꦱꦊꦧꦼꦠ꧀ꦠꦶꦥꦸꦤ꧀ꦥꦺꦴꦚ꧀ꦕꦏꦫ​ꦧꦤ꧀ꦛꦺꦁ​ꦥꦼꦗꦃ​ꦠꦶꦤꦼꦩ꧀ꦥꦶꦭꦶꦁ​ꦉꦩꦸꦏ꧀ꦱꦶꦫꦃꦲꦶꦥꦸꦤ꧀꧉​ꦲꦺꦮꦢꦺꦤꦺ​ꦏꦾꦒꦼꦁ​ꦯꦼꦱꦺꦭ​ꦧꦺꦴꦠꦼꦤ꧀ꦱꦒꦼꦢ꧀ꦏꦠꦩ꧀ꦥꦺꦤ꧀ꦥꦱꦸꦮꦶꦠꦤ꧀ꦤꦶꦥꦸꦤ꧀꧈​ꦗꦭꦂꦫꦤ꧀ꦏꦒꦭꦶꦃ​ꦲꦗꦿꦶꦃ​ꦲꦶꦁ​ꦥꦼꦗꦃ꧈​ꦱꦧꦧ꧀ꦤꦭꦶꦏ​ꦩꦸꦚ꧀ꦕꦿꦠ꧀ꦠꦶꦁ​ꦲꦼꦫꦃꦲꦶꦥꦸꦤ꧀ꦧꦤ꧀ꦛꦺꦁ​꧈​ꦏꦾꦲꦶ​ꦲꦒꦼꦁ​ꦩꦺꦔꦺꦴ꧈​ꦏꦸꦮꦠꦺꦴꦱ꧀ꦩꦤꦮꦶ​ꦏꦕꦶꦥꦿꦠ꧀ꦠꦤ꧀꧉​

꧋ꦮꦺꦴꦤ꧀ꦠꦼꦤ꧀ꦩꦭꦶꦃ​ꦤꦸꦁ​ꦒꦶꦭ꧀ꦗꦩꦤ꧀꧈​ꦲꦶꦁ​ꦒꦶꦃ​ꦥꦸꦤꦶꦏ꧇​ꦏꦭ​ꦲꦶꦁ​ꦢꦼꦩꦏ꧀ꦏꦝꦠꦼꦁ​ꦔꦤ꧀ꦩꦲꦺꦱ​ꦔꦩꦸꦏ꧀꧈​ꦱꦲ​ꦲꦶꦁ​ꦏꦁ​ꦭꦗꦼꦁ​ꦲꦔꦿꦶꦱꦏ꧀ꦤꦱꦏ꧀ꦏꦏꦼꦤ꧀꧉​ꦱꦫꦺꦃꦤꦶꦁ​ꦩꦲꦺꦱ​ꦮꦲꦸ​ꦠꦼꦒꦸꦃ​ꦠꦶꦩ꧀ꦧꦸꦭ꧀꧈​ꦧꦺꦴꦠꦼꦤ꧀ꦠꦼꦝꦱ꧀ꦢꦶꦥꦸꦤ꧀ꦢꦢꦩꦼꦭ꧀ꦭꦶ꧈​ꦱꦶꦤꦸꦲꦸꦤ꧀ꦲꦶꦁ​ꦢꦼꦩꦏ꧀ꦭꦗꦼꦁ​ꦱꦪꦼꦩ꧀ꦧꦫ꧇​ꦱꦶꦤ꧀ꦠꦼꦤ꧀ꦲꦶꦁ​ꦏꦁ​ꦱꦒꦼꦢ꧀ꦲꦚꦶꦂꦤꦏ꧀ꦲꦏꦼꦤ꧀ꦩꦲꦺꦱ​ꦥꦸꦤꦶꦏ꧈​ꦲꦒꦼꦁ​ꦒꦚ꧀ꦗꦂꦫꦤ꧀ꦤꦶꦥꦸꦤ꧀꧉​ꦲꦶꦁ​ꦮꦸꦱꦤ​ꦩꦲꦺꦱ​ꦲꦸꦒꦶ​ꦥꦼꦗꦃ​ꦢꦺꦤꦶꦁ​ꦫꦢꦺꦤ꧀ꦗꦑ​ꦠꦶꦁ​ꦏꦶꦂ꧉​

꧋ꦢꦢꦺꦴꦱ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦲꦶꦁ​ꦏꦁ​ꦩꦏꦠꦼꦤ꧀ꦥꦸꦤꦶꦏ꧈​ꦲꦶꦁ​ꦔꦿꦶꦏꦶ​ꦱꦤꦗꦤ꧀ꦏꦭ​ꦲꦶꦁ​ꦗꦩꦤ꧀ꦏꦶꦤ​ꦲꦶꦁ​ꦒꦶꦃ​ꦢꦺꦢꦺ​ꦧꦁ​ꦱꦤꦶꦁ​ꦏꦱꦼꦤꦼꦁ​ꦔꦤ꧀ꦏꦢꦺꦴꦱ꧀ꦢꦺꦤꦺ​ꦕꦫꦤꦶꦥꦸꦤ꧀ꦠꦶꦪꦁ​ꦲꦶꦁ​ꦯꦼꦥꦚꦺꦴꦭ꧀ꦮꦲꦸ꧈​ꦲꦤꦔꦶꦁ​ꦲꦸꦥꦩꦶ​ꦗꦩꦤ​ꦱꦩꦁ​ꦏꦺ꧈​ꦱꦩꦶꦤꦶꦥꦸꦤ꧀ꦭꦫꦺ​ꦱꦼꦏꦺꦴꦭꦃ​ꦢꦶꦥꦸꦤ꧀ꦌꦏ꧀ꦱꦩꦼꦤ꧀꧉​