KRONIEK
꧋ꦏꦧꦂꦮꦂꦤꦶꦮꦂꦤꦶ꧉
꧋ꦥꦼꦛꦶꦏ꧀ꦏꦤ꧀ꦱꦏꦶꦁꦱꦼꦫꦠ꧀ꦱꦼꦫꦠ꧀ꦏꦧꦂꦱꦤꦺꦱ꧀꧉
꧋ꦱꦼꦫꦠ꧀ꦏꦧꦂ Loc. ꦩꦂꦠꦺꦴꦱ꧀ꦱꦏꦼꦤ꧀꧇ꦤꦭꦶꦏꦩꦊꦩ꧀ꦗꦸꦩꦸꦮꦃꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏ꧈ꦲꦶꦁꦔꦪꦺꦴꦓꦾꦏꦂꦠꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦥꦉꦥꦠ꧀ꦠꦤ꧀꧈ꦲꦶꦁꦏꦁꦱꦼꦢꦾꦤꦶꦥꦸꦤ꧀ꦧꦝꦺꦔꦼꦢꦼꦒ꧀ꦒꦏꦼꦤ꧀ꦥꦏꦼꦩ꧀ꦥꦭ꧀ꦭꦤ꧀ꦠꦸꦩꦿꦥ꧀ꦲꦤꦁꦒꦸꦭꦁꦔꦶꦠꦶꦤ꧀ꦢꦏ꧀ꦏꦶꦥꦸꦤ꧀ꦭꦶꦤ꧀ꦠꦃꦝꦫꦠ꧀꧈ꦩꦼꦁꦒꦃꦧꦝꦺꦥꦤꦶꦤ꧀ꦢꦏ꧀ꦏꦶꦥꦸꦤ꧀ꦏꦢꦺꦴꦱ꧀ꦢꦺꦤꦺꦥꦏꦼꦩ꧀ꦥꦭ꧀ꦭꦤ꧀ꦩꦏꦠꦼꦤ꧀ꦲꦶꦁꦨꦤ꧀ꦝꦸꦁ꧉ꦏꦭꦧꦶꦏꦏ꧀ꦏꦶꦁꦥꦉꦥꦠ꧀ꦠꦤ꧀ꦏꦛꦃꦥꦫꦲꦶꦁꦏꦁꦱꦩꦶꦲꦚ꧀ꦗꦼꦤꦼꦁꦔꦶ꧉ꦢꦺꦤꦺꦥꦫꦥꦔꦒꦼꦁꦲꦶꦁꦏꦁꦱꦩꦶꦫꦮꦸꦃ꧇ꦥꦢꦸꦏꦠꦸꦮꦤ꧀ꦫꦺꦱꦶꦝꦺꦤ꧀꧈ꦮꦮꦏꦶꦭ꧀ꦢꦊꦩ꧀ꦲꦶꦁꦏꦁꦯꦶꦤꦸꦲꦸꦤ꧀ꦲꦶꦁꦔꦪꦺꦴꦓꦾꦏꦂꦠ꧈ꦏꦁꦗꦼꦁꦒꦸꦱ꧀ꦠꦶꦥꦔꦺꦫꦤ꧀ꦲꦢꦶꦥꦠꦶꦲꦂꦪꦦꦏꦸꦄꦭꦩ꧀꧈ꦭꦤ꧀ꦥꦶꦤ꧀ꦠꦼꦤ꧀ꦥꦶꦤ꧀ꦠꦼꦤ꧀ꦥꦫꦄꦩ꧀ꦠꦼꦤꦂꦥꦔꦿꦺꦃꦥꦿꦗ꧉ꦤꦭꦶꦏꦱꦩꦤ꧀ꦠꦼꦤ꧀ꦲꦶꦁꦏꦁꦏꦥꦶꦭꦶꦃꦢꦢꦺꦴꦱ꧀ꦥꦔꦿꦺꦃ꧈ꦲꦶꦁꦒꦶꦃꦥꦸꦤꦶꦏ꧇ꦥꦔꦂꦱ꧇ꦠꦸꦮꦤ꧀ Fris ꦏꦺꦴꦤ꧀ꦠꦿꦺꦴꦭꦶꦂ B.B.꧈ ꦥꦤꦶꦠꦿ꧇ꦠꦸꦮꦤ꧀ Schwencke꧈ꦏꦺꦴꦤ꧀ꦠꦿꦺꦴꦭꦶꦂꦲꦒꦿꦫꦶꦱꦼꦱꦏꦼꦤ꧀꧈ꦲꦂꦢꦤ꧇ꦠꦸꦮꦤ꧀ Van Hombacht꧈ꦄꦢ꧀ꦩꦶꦤꦶꦱ꧀ꦠꦿꦠꦸꦂ Volkscredietbank꧈ꦥꦤꦶꦠꦶ꧇ꦠꦸꦮꦤ꧀ Mr. Icken ꦭꦤ꧀꧈ꦧꦤ꧀ꦢꦫꦥꦔꦺꦫꦤ꧀ꦲꦂꦪꦯꦸꦂꦪꦢꦶꦤꦶꦔꦿꦠ꧀꧉ꦢꦺꦤꦺꦲꦶꦁꦏꦁꦱꦩꦶꦭꦸꦩꦼꦧꦼꦠ꧀ꦢꦢꦺꦴꦱ꧀ꦮꦂꦒ 33꧈ꦮꦂꦒꦱꦠꦸꦁꦒꦭ꧀ꦱꦧꦼꦤ꧀ꦮꦸꦭꦤ꧀ꦏꦼꦢꦃꦲꦩ꧀ꦧꦪꦂꦏꦺꦴꦤ꧀ꦠꦿꦸꦧꦶꦱꦶꦱꦏꦼꦝꦶꦏ꧀ꦏꦼꦝꦶꦏ꧀ꦏꦶꦥꦸꦤ꧀ f 0.50꧈ꦥꦿꦤꦠꦤꦶꦥꦸꦤ꧀ꦥꦏꦼꦩ꧀ꦥꦭ꧀ꦭꦤ꧀ꦱꦩ꧀ꦥꦸꦤ꧀ꦢꦶꦥꦸꦤ꧀ꦠꦩ꧀ꦥꦶ꧈ꦱꦲꦲꦸꦒꦶꦧꦝꦺꦏꦱꦸꦮꦸꦤ꧀ꦤꦏꦼꦤ꧀ꦫꦺꦃꦥꦼꦂꦱꦸꦤ꧀꧉ꦱꦩ꧀ꦥꦺꦪꦤ꧀ꦢꦊꦩ꧀ꦲꦶꦁꦏꦁꦯꦶꦤꦸꦲꦸꦤ꧀ꦏꦁꦗꦼꦁꦯꦸꦭ꧀ꦠꦤ꧀꧈ꦱꦲꦏꦁꦗꦼꦁꦒꦸꦱ꧀ꦠꦶꦥꦔꦺꦫꦤ꧀ꦲꦢꦶꦥꦠꦶꦲꦂꦪꦦꦏꦸꦄꦭꦩ꧀ꦱꦩꦶꦏꦠꦼꦠꦼꦥ꧀ꦥꦏꦼꦤ꧀ꦢꦢꦺꦴꦱ꧀ꦮꦂꦒꦩꦶꦤꦸꦭꦾ꧉
꧋ꦢꦺꦫꦺꦁꦢꦔꦸꦥꦸꦤꦶꦏꦥꦸꦭꦶꦱꦶꦲꦶꦁꦨꦤ꧀ꦠꦸꦭ꧀(ꦔꦪꦺꦴꦓꦾꦏꦂꦠ)ꦲꦚꦼꦥꦼꦁꦱꦠꦸꦁꦒꦶꦭ꧀ꦭꦶꦁꦠꦶꦪꦁꦥꦿꦶꦧꦸꦩꦶꦲꦱ꧀ꦭꦶꦱꦏꦶꦁꦝꦸꦱꦸꦤ꧀ꦦꦼꦝꦼꦱ꧀꧈ꦲꦩꦂꦒꦶꦏꦊꦥꦠ꧀ꦠꦤ꧀ꦲꦩꦼꦚ꧀ꦕꦂꦫꦏꦼꦤ꧀ꦲꦂꦠꦠꦭꦺꦤ꧀ꦏꦼꦛꦶꦥ꧀ꦥꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦥꦼꦏꦼꦤ꧀꧉ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦠꦶꦪꦁꦮꦲꦸꦱꦭꦃꦱꦠꦸꦁꦒꦶꦭ꧀ꦭꦶꦁꦮꦂꦒꦱꦏꦶꦁꦥꦏꦼꦩ꧀ꦥꦭ꧀ꦭꦤ꧀ꦤꦶꦁꦠꦶꦠꦶꦪꦁꦲꦶꦁꦏꦁꦱꦩꦶꦲꦢꦩꦼꦭ꧀ꦲꦂꦠꦥꦭ꧀ꦱꦸ꧉ꦥꦿꦏꦮꦶꦱ꧀ꦱꦶꦥꦸꦤ꧀ꦱꦩꦁꦏꦺꦱꦮꦼꦒ꧀ꦢꦶꦥꦸꦤ꧀ꦲꦸꦫꦸꦱ꧀꧉
꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈ꦧꦶꦭꦶꦃꦤꦺꦴꦤꦃ Gobee ꦲꦶꦁꦒꦶꦃꦥꦸꦤꦶꦏꦤꦺꦴꦤꦃꦲꦶꦁꦏꦁꦲꦔꦸꦮꦲꦺꦴꦱ꧀ꦱꦶꦠꦺꦴꦏꦺꦴꦧꦫꦁꦧꦫꦁꦏꦒꦸꦤꦤ꧀ꦗꦮꦶꦲꦶꦁꦔꦪꦺꦴꦓꦾ꧈ꦧꦝꦺꦲꦩ꧀ꦧꦶꦏꦏ꧀ꦥꦝꦱꦂꦫꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦯꦲꦆꦒꦺꦴꦤ꧀꧈ꦲꦶꦁꦏꦁꦧꦝꦺꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦧꦺꦚ꧀ꦗꦶꦁꦠꦁꦒꦭ꧀ 17 ꦮꦸꦭꦤ꧀ꦥꦸꦤꦶꦏ꧉ꦏꦭꦢꦶꦤ꧀ꦠꦼꦤ꧀ꦗꦸꦩꦸꦮꦃꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏꦱꦩ꧀ꦥꦸꦤ꧀ꦲꦔꦁꦏꦠ꧀ꦠꦏꦼꦤ꧀ꦠꦸꦏꦁꦗꦮꦶꦏꦏꦭꦶꦃꦏꦤ꧀ꦛꦶꦲꦩ꧀ꦧꦼꦏ꧀ꦠꦧꦫꦁꦧꦫꦁꦏꦒꦸꦤꦤ꧀ꦗꦮꦶꦲꦱꦭ꧀ꦱꦏꦶꦁꦔꦪꦺꦴꦓꦾꦝꦠꦼꦁꦯꦲꦆꦒꦺꦴꦤ꧀꧉
꧋ꦯꦼꦢꦾꦠꦩꦲꦩꦂꦠꦺꦴꦱ꧀ꦱꦏꦼꦤ꧀꧇ꦧꦺꦚ꧀ꦗꦶꦁꦮꦸꦭꦤ꧀ꦗꦤꦸꦮꦫꦶꦔꦗꦼꦁꦥꦸꦤꦶꦏ(ꦲꦸꦠꦮꦶꦩꦭꦶꦃꦱꦢꦺꦫꦺꦁꦔꦶꦥꦸꦤ꧀)ꦱꦼꦫꦠ꧀ꦏꦧꦂ꧇ꦲꦧꦶꦥꦿꦪ꧈ꦎꦂꦒꦤꦶꦥꦸꦤ꧀ꦥꦏꦼꦩ꧀ꦥꦭ꧀ꦭꦤ꧀ P.E.B. ꦧꦒꦺꦪꦤ꧀ꦠꦶꦪꦁꦱꦶꦠꦶ꧈ꦧꦝꦺꦒꦼꦱꦁꦩꦭꦶꦃ꧉ꦢꦺꦤꦺꦲꦶꦁꦏꦁꦧꦝꦺꦩꦤ꧀ꦝꦺꦒꦤ꧀ꦤꦶꦱꦼꦫꦠ꧀ꦏꦧꦂꦮꦲꦸ꧇ꦫꦢꦺꦤ꧀ꦥꦚ꧀ꦗꦶꦟꦠꦲꦤꦭ꧉
꧋ꦏꦧꦂꦫꦶꦥꦸꦤ꧀ꦥꦏꦼꦩ꧀ꦥꦭ꧀ꦭꦤ꧀ꦩꦸꦃꦲꦩ꧀ꦩꦢ꧀ꦢꦶꦪꦃꦄꦥ꧀ꦝꦺꦭꦶꦁꦨꦪꦭꦭꦶꦒꦝꦃꦱꦼꦢꦾꦧꦝꦺꦔꦼꦢꦼꦒ꧀ꦒꦏꦼꦤ꧀ꦥꦩꦸꦭꦁꦔꦤ꧀ꦗꦮꦶꦲꦺꦴꦁꦏꦏꦭꦶꦃꦩꦮꦶꦝꦼꦝꦱꦂꦲꦒꦩꦶꦆꦱ꧀ꦭꦩ꧀꧈ꦮꦺꦴꦤ꧀ꦠꦼꦤ꧀ꦲꦶꦁꦎꦤ꧀ꦢꦼꦂꦝꦶꦱ꧀ꦠꦿꦶꦏ꧀ꦯꦩ꧀ꦧꦶ꧉
꧋ꦮꦺꦴꦤ꧀ꦠꦼꦤ꧀ꦏꦧꦂ꧈ꦥꦏꦼꦩ꧀ꦥꦭꦤ꧀ꦩꦸꦃꦲꦩ꧀ꦩꦢ꧀ꦢꦶꦪꦃꦲꦶꦁꦨꦪꦭꦭꦶ꧈ꦧꦺꦚ꧀ꦗꦶꦁꦠꦁꦒꦭ꧀ 27 ꦉꦗꦼꦧ꧀꧈ꦲꦶꦁꦒꦶꦃꦥꦸꦤꦶꦏꦲꦔ꧀ꦭꦼꦉꦱ꧀ꦱꦶꦩꦶꦏꦿꦢ꧀ꦢꦊꦩ꧀ꦏꦁꦗꦼꦁꦤꦧꦶꦩꦸꦲꦩꦢ꧀ꦲ꧉ꦮ꧀꧉ꦧꦝꦺꦲꦢꦩꦼꦭ꧀ꦲꦫꦏ꧀ꦲꦫꦏ꧀ꦏꦤ꧀꧉
꧋ꦥꦔꦸꦫꦸꦱ꧀ꦩꦸꦃꦲꦩ꧀ꦩꦢ꧀ꦢꦶꦪꦃꦧꦒꦶꦪꦤ꧀ꦠꦩꦤ꧀ꦥꦸꦱ꧀ꦠꦏꦲꦶꦁꦯꦸꦫꦏꦂꦠ꧈ꦩꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦏꦭꦲꦶꦁꦮꦸꦭꦤ꧀ꦎꦏ꧀ꦠꦺꦴꦧꦼꦂ꧇꧑꧙꧒꧗꧇ꦔꦼꦢꦭ꧀ꦭꦏꦼꦤ꧀ꦏꦭꦮꦂꦠꦶꦏꦸꦂꦄꦤ꧀ꦗꦮꦺꦤ꧀꧉ꦭꦤ꧀ꦲꦶꦁꦮꦸꦭꦤ꧀ꦗꦤꦸꦮꦫꦶꦔꦗꦼꦁꦥꦸꦤꦶꦏꦧꦝꦺꦔꦼꦢꦭ꧀ꦭꦏꦼꦤ꧀ꦏꦭꦮꦂꦠꦶꦩꦭꦶꦃꦤꦩꦲꦢꦶꦱ꧀ꦗꦮꦺꦤ꧀꧈ꦉꦒꦶꦤꦶꦥꦸꦤ꧀ꦱꦠꦲꦸꦤ꧀ꦱꦩꦶꦔꦭꦶꦃꦫꦸꦥꦶꦪꦃ꧉
꧋ꦥꦔꦿꦺꦃꦒꦼꦩꦶꦤ꧀ꦠꦼꦲꦶꦁꦯꦸꦫꦧꦪ꧈ꦢꦩꦼꦭ꧀ꦲꦸꦱꦸꦭ꧀ꦝꦠꦼꦁꦫꦢ꧀꧈ꦮꦶꦮꦶꦠ꧀ꦠꦸꦩꦥꦏ꧀ꦏꦶꦥꦸꦤ꧀ꦠꦲꦸꦤ꧀꧇꧑꧙꧒꧘꧇ꦔꦗꦼꦁꦥꦸꦤꦶꦏ꧈ꦥꦲꦺꦴꦱ꧀ꦥꦼꦂꦥꦺꦴꦤ꧀ꦝꦼꦁꦒꦼꦩꦶꦤ꧀ꦠꦼꦯꦸꦫꦧꦪꦢꦶꦥꦸꦤ꧀ꦢꦺꦏꦺꦏ꧀ꦏꦤꦮꦼꦮꦃꦲꦤ꧀ꦲꦶꦤ꧀ꦛꦶꦭ꧀ꦭꦤ꧀ 20 ꦥꦽꦱꦺꦤ꧀꧉
꧋ꦠꦲꦸꦤ꧀ꦔꦗꦼꦁꦥꦸꦤꦶꦏꦥꦩꦸꦭꦁꦔꦤ꧀ꦥꦩꦸꦭꦁꦔꦤ꧀ꦗꦮꦶꦓꦸꦥꦼꦂꦩꦺꦤ꧀ꦎꦁꦏ II ꦧꦝꦺꦢꦶꦥꦸꦤ꧀ꦮꦼꦮꦃꦲꦶꦏ꧀ꦭꦱ꧀ꦱꦶꦥꦸꦤ꧀ꦔꦤ꧀ꦠꦺꦴꦱ꧀ꦢꦸꦩꦸꦒꦶꦏ꧀ꦭꦱ꧀ 6 ꦱꦂꦠꦧꦺꦚ꧀ꦗꦶꦁꦧꦝꦺꦏꦭꦗꦼꦁꦔꦏꦼꦤ꧀ꦢꦸꦩꦸꦒꦶꦏ꧀ꦭꦱ꧀ 7꧉ꦮꦼꦮꦃꦲꦶꦁꦏ꧀ꦭꦱ꧀ꦮꦲꦸꦢꦶꦥꦸꦤ꧀ꦮꦶꦮꦶꦠ꧀ꦠꦶꦱꦏꦶꦁꦥꦩꦸꦭꦁꦔꦤ꧀ꦲꦶꦁꦏꦁꦱꦩ꧀ꦥꦸꦤ꧀ꦩꦗꦼꦁ꧈ꦱꦲꦏꦛꦃꦩꦸꦫꦶꦢ꧀ꦢꦶꦥꦸꦤ꧀꧉ꦢꦢꦺꦴꦱ꧀ꦕꦼꦛꦤꦶꦥꦸꦤ꧀꧈ꦧꦺꦴꦠꦼꦤ꧀ꦱꦧꦼꦤ꧀ꦥꦩꦸꦭꦁꦔꦤ꧀ꦎꦁꦏ II ꦭꦗꦼꦁꦢꦶꦥꦸꦤ꧀ꦮꦼꦮꦃꦲꦶꦏ꧀ꦭꦱ꧀ꦱꦶꦥꦸꦤ꧀ꦢꦢꦺꦴꦱ꧀ 6꧉
꧋ꦱꦏꦶꦁꦔꦪꦺꦴꦓꦾꦏꦂꦠꦏꦮꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦥꦔꦿꦺꦃꦲꦒꦼꦁꦥꦏꦼꦩ꧀ꦥꦭ꧀ꦭꦤ꧀꧇ꦄꦲꦆꦯꦃ꧈ꦲꦶꦁꦒꦶꦃꦥꦸꦤꦶꦏꦕꦧꦁꦔꦶꦥꦸꦤ꧀ꦥꦏꦼꦩ꧀ꦥꦭ꧀ꦭꦤ꧀ꦩꦸꦃꦲꦩ꧀ꦩꦢ꧀ꦢꦶꦪꦃꦧꦒꦶꦪꦤ꧀ꦮꦤꦶꦠ꧈ꦧꦺꦚ꧀ꦗꦶꦁꦮꦸꦭꦤ꧀ꦗꦤꦸꦮꦫꦶꦔꦗꦼꦁꦥꦸꦤꦶꦏꦧꦝꦺꦔꦼꦢꦼꦒ꧀ꦒꦏꦼꦤ꧀ꦥꦩꦸꦭꦁꦔꦤ꧀ H.I.S. ꦠꦸꦩꦿꦥ꧀ꦭꦫꦺꦲꦺꦱ꧀ꦠꦿꦶ꧈ꦥꦥꦤ꧀ꦤꦶꦁꦥꦩꦸꦭꦁꦔꦤ꧀ꦮꦲꦸꦮꦺꦴꦤ꧀ꦠꦼꦤ꧀ꦲꦶꦁꦏꦩ꧀ꦥꦸꦁꦗꦓꦁ꧉
꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈ꦧꦶꦭꦶꦃꦲꦶꦁꦏꦁꦨꦸꦥꦠꦶꦦꦩꦭꦁ꧇ꦏꦁꦗꦼꦁꦫꦢꦺꦤ꧀ꦠꦸꦩꦼꦁꦒꦸꦁꦯꦸꦢꦫꦯꦱꦿꦲꦢꦶꦏꦸꦱꦸꦩ꧈ꦏꦥꦫꦶꦁꦔꦤ꧀ꦒꦚ꧀ꦗꦂꦫꦤ꧀ꦱꦼꦱꦼꦧꦸꦠꦤ꧀꧇ꦲꦢꦶꦥꦠꦶ꧉
꧋ꦭꦸꦭꦸꦱ꧀ꦌꦏ꧀ꦱꦩꦼꦤ꧀ꦤꦶꦥꦸꦤ꧀ꦏꦁꦒꦺꦝꦺꦴꦏ꧀ꦠꦼꦂꦲꦶꦤ꧀ꦢꦾꦲꦶꦪꦧꦒꦶꦪꦤ꧀ꦲꦶꦁꦏꦁꦏꦥꦶꦱꦤ꧀꧉ꦲꦶꦁꦥꦩꦸꦭꦁꦔꦤ꧀ꦝꦺꦴꦏ꧀ꦠꦼꦂꦲꦶꦤ꧀ꦢꦶꦪ(Stovia)ꦲꦶꦁꦮꦺꦭ꧀ꦠꦼꦥꦿꦺꦝꦼꦤ꧀꧇ꦠꦸꦮꦤ꧀ G.M. Loemban Toebing ꦲꦱ꧀ꦭꦶꦱꦏꦶꦁꦡꦫꦸꦠꦸꦁ꧈ꦭꦤ꧀ꦫꦢꦺꦤ꧀ ꦫꦸꦱ꧀ꦠꦩ꧀ꦩꦗꦶ꧈ꦲꦱ꧀ꦭꦶꦱꦏꦶꦁꦦꦸꦂꦮꦏꦼꦂꦠ꧉
꧋ꦲꦁꦱꦭ꧀ꦝꦶꦥ꧀ꦭꦺꦴꦩꦃꦝꦺꦴꦏ꧀ꦠꦼꦂꦲꦶꦤ꧀ꦢꦶꦪ꧇ꦠꦸꦮꦤ꧀ Oesman Saleh gelar Soetan Temanggoeng꧈ꦲꦱ꧀ꦭꦶꦱꦏꦶꦁꦦꦝꦁ꧉
