Page:Kajawen 43 1927-10-27.pdf/4

꧋ꦫꦲꦺꦴꦱꦶꦁ​ꦠꦤꦃ​ꦗꦮꦶ

꧋ꦠꦸꦩꦿꦥ꧀ꦠꦶꦪꦁ​ꦲꦶꦁ​ꦏꦁ​ꦏꦸꦭꦶꦤ​ꦔꦿꦲꦺꦴꦱ꧀ꦱꦏꦼꦤ꧀ꦝꦠꦼꦁ​ꦮꦸꦗꦸꦢ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦁ​ꦱꦮꦁ​ꦔꦤ꧀ꦏꦺꦴꦢꦿꦠ꧀ꦲꦶꦁ​ꦔꦭꦩ꧀ꦢꦺꦴꦚ꧈​ꦥꦸꦤꦶꦏ​ꦱꦒꦼꦢ꧀ꦤꦸꦮꦸꦃꦲꦏꦼꦤ꧀ꦒꦒꦱ꧀ꦱꦤ꧀ꦲꦔꦼꦭꦔꦸꦠ꧀꧉​ꦩꦏꦠꦼꦤ꧀ꦲꦸꦒꦶ​ꦠꦸꦩꦿꦥ꧀ꦠꦶꦪꦁ​ꦲꦶꦁ​ꦏꦁ​ꦲꦃꦭꦶ​ꦔꦿꦲꦺꦴꦱ꧀ꦱꦏꦼꦤ꧀ꦱꦸꦫꦲꦺꦴꦱ꧀ꦱꦶꦁ​ꦲꦸꦏꦫ​ꦱꦲꦺ꧈​ꦲꦶꦁ​ꦏꦁ​ꦩꦼꦩꦼꦛ​ꦏꦮꦺꦴꦤ꧀ꦠꦼꦤ꧀ꦤꦤ꧀꧈​ꦭꦭꦩ꧀ꦥꦃꦲꦤ꧀ꦠꦸꦮꦶꦤ꧀ꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀꧈​ꦥꦸꦤꦶꦏ​ꦒꦼꦱꦁ​ꦔꦶꦁ​ꦲꦸꦏꦫ​ꦮꦲꦸ​ꦲꦸꦒꦶ​ꦭꦗꦼꦁ​ꦱꦒꦼꦢ꧀ꦤꦸꦮꦸꦃꦲꦏꦼꦤ꧀ꦥꦁ​ꦒꦩ꧀ꦧꦂꦫꦶꦁ​ꦒꦒꦱ꧀ꦱꦤ꧀꧈​ꦔꦤ꧀ꦠꦺꦴꦱ꧀ꦕꦸꦩꦶꦛꦏ꧀ꦮꦺꦴꦤ꧀ꦠꦼꦤ꧀ꦲꦶꦁ​ꦫꦲꦺꦴꦱ꧀꧉​ꦲꦶꦁ​ꦏꦗꦮꦺꦤ꧀ꦩꦼꦤ꧀ꦠꦱ꧀ꦔꦼꦩꦺꦴꦠ꧀ꦥꦔꦸꦢꦫꦲꦺꦴꦱ꧀ꦱꦶꦥꦸꦤ꧀ꦱꦁ​ꦥꦸꦗꦺꦴꦁ​ꦒ​ꦲꦒꦸꦁ​ꦡꦒꦺꦴꦫꦺ꧈​ꦥꦔꦸꦢꦫꦲꦺꦴꦱ꧀ꦮꦲꦸ​ꦩꦮꦶ​ꦲꦩꦼꦩꦼꦛ​ꦝꦠꦼꦁ​ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦁ​ꦠꦤꦃ​ꦗꦮꦶ꧈​ꦔꦤ꧀ꦠꦺꦴꦱ꧀ꦱꦒꦼꦢ꧀ꦔꦶꦤ꧀ꦝꦏ꧀ꦲꦏꦼꦤ꧀ꦲꦶꦗꦼꦩ꧀ꦩꦶꦁ​ꦮꦤ​ꦲꦶꦁ​ꦏꦁ​ꦤꦼꦩ꧀ꦧꦺ​ꦏꦼꦠꦶꦔꦭ꧀;ꦏꦢꦺꦴꦱ꧀ꦫꦶꦩꦺꦴꦁ​ꦔꦶꦁ​ꦮꦶꦢꦢꦫꦶ꧈​ꦏꦼꦠꦶꦔꦭ꧀ꦲꦶꦗꦼꦩ꧀ꦫꦶꦪꦸ​ꦫꦶꦪꦸ꧈​ꦲꦢꦩꦼꦭ꧀ꦱꦼꦁ​ꦱꦼꦩ꧀ꦩꦶꦁ​ꦥꦤ꧀ꦢꦸꦭꦸ꧉​ꦥꦸꦤꦶꦏ​ꦩꦼꦁ​ꦒꦃꦲꦶꦁ​ꦥꦔꦿꦲꦺꦴꦱ꧀꧈​ꦱꦤꦢꦾꦤ꧀ꦠꦸꦩꦿꦥ꧀ꦠꦶꦪꦁ​ꦲꦶꦁ​ꦏꦁ​ꦢꦺꦫꦺꦁ​ꦱꦸꦩꦼꦉꦥ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦁ​ꦠꦤꦃ​ꦗꦮꦶ꧈​ꦲꦸꦒꦶ​ꦭꦗꦼꦁ​ꦱꦒꦼꦢ꧀ꦲꦁ​ꦒꦩ꧀ꦧꦂꦫꦏꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁ​ꦥꦔꦿꦲꦺꦴꦱ꧀ꦱꦶꦥꦸꦤ꧀꧉​ꦥꦁ​ꦒꦩ꧀ꦧꦂꦫꦶꦥꦸꦤ꧀ꦮꦲꦸ​ꦱꦤꦢꦾꦤ꧀ꦢꦺꦫꦺꦁ​ꦩꦼꦱ꧀ꦛꦶ​ꦥ꧀ꦭꦼꦏ꧀꧈​ꦤꦔꦶꦁ​ꦱꦩ꧀ꦥꦸꦤ꧀ꦮꦺꦴꦤ꧀ꦠꦼꦤ꧀ꦮꦸꦗꦸꦢ꧀ꦢꦶꦥꦸꦤ꧀꧉​ ​ ꧋ꦲꦶꦁ​ꦱꦥꦸꦤꦶꦏ​ꦒꦼꦤ꧀ꦠꦺꦴꦱ꧀ꦲꦶꦁ​ꦏꦗꦮꦺꦤ꧀ꦔꦿꦶꦏꦶ​ꦩꦸꦗꦸꦢ꧀ꦢꦏꦼꦤ꧀ꦒꦩ꧀ꦧꦂ꧈​ꦲꦶꦁ​ꦏꦁ​ꦱꦲꦺꦱ꧀ꦛ​ꦏꦢꦺꦴꦱ꧀ꦫꦲꦺꦴꦱ꧀ꦱꦶꦁ​ꦩꦤꦃꦲꦶꦥꦸꦤ꧀ꦠꦤꦃ​ꦗꦮꦶ​ꦤꦭꦶꦏ​ꦥꦶꦥꦶꦱꦃꦲꦤ꧀ꦏꦭꦶꦪꦤ꧀ꦗꦶꦮꦤꦶꦁ​ꦠꦤꦃ​ꦲꦶꦤ꧀ꦝꦸ​(ꦱꦁ​ꦡꦒꦺꦴꦂ)ꦲꦶꦁ​ꦏꦁ​ꦤꦼꦩ꧀ꦧꦺ​ꦲꦔꦺꦴꦚ꧀ꦕꦠ꧀ꦠꦶ꧉​ꦏꦢꦺꦴꦱ꧀ꦲꦶꦁ​ꦔꦤ꧀ꦝꦥ꧀ꦥꦸꦤꦶꦏ꧈​ꦩꦿꦶꦏ꧀ꦱꦤ꧀ꦤꦤ​ꦒꦩ꧀ꦧꦂ​ꦔꦗꦼꦁ​꧉​

꧄ꦥꦶꦤ꧀ꦝ​ꦠꦫꦸ​ꦏꦠꦿꦒ꧀ꦒꦤ꧀ꦲꦶꦁ​ꦫꦶꦫꦶꦱ꧀꧈​ꦠꦤ꧀ꦥ​ꦩꦤꦶꦱ꧀ꦲꦫꦫꦱ꧀ꦩꦔꦫꦁ​꧈​ꦥꦸꦮꦫ​ꦫꦸꦫꦸꦃ​ꦫꦺꦴꦤꦿꦺꦴꦤ꧀ꦤꦺ​꧈​ꦫꦺꦴꦤ꧀ꦫꦱꦤꦶꦫꦺꦁ​ꦠꦸꦮꦸꦃ​꧈​ꦪꦪꦃ​ꦱꦶꦂꦤ​ꦢꦠꦤ꧀ꦤꦧꦼꦠ꧀ꦠꦶ​꧈​ꦢꦺꦤꦶꦁ​ꦮꦸꦱ꧀ꦭꦭꦸ​ꦩꦺꦴꦁ​ꦱ​꧈​ꦏꦺꦴꦚ꧀ꦕꦠ꧀ꦠꦤ꧀ꦲꦶꦁ​ꦫꦤꦸ​꧈​ꦏꦁ​ꦤꦿꦩ꧀ꦧꦃꦲꦶ​ꦩꦮꦺꦃ​ꦒꦼꦱꦁ​꧈​ꦱꦁ​ꦏꦶꦤ꧀ꦢꦔꦸ​ꦱꦠꦼꦩꦃ​ꦏꦼꦥꦼꦏ꧀ꦱ​ꦱꦼꦩꦶ​꧈​ꦩꦸꦁ​ꦏꦸꦕꦼꦩ꧀ꦱꦼꦩꦸꦤꦶꦫ​꧉​

꧄ꦥꦤ꧀ꦩꦏꦠꦼꦤ꧀ꦥꦶꦤ꧀ꦝꦤꦶꦁ​ꦥꦁ​ꦒꦸꦱ꧀ꦛꦶ​꧈​ꦱꦫꦱꦤꦶꦁ​ꦧꦸꦩꦶ​ꦠꦤꦃ​ꦗꦮ​꧈​ꦮꦸꦱ꧀ꦏꦮꦺꦴꦂꦫꦤ꧀ꦥꦩꦮꦱ꧀ꦱꦺ​꧈​ꦩꦸꦁ​ꦫꦫꦱ꧀ꦱꦶꦫꦺꦁ​ꦢꦔꦸ​꧈​ꦏꦁ​ꦲꦸꦩꦚ꧀ꦗꦶꦁ​ꦠꦼꦊꦁ​ꦔꦶꦁ​ꦲꦠꦶ​꧈​ꦏꦠꦺꦴꦤ꧀ꦠꦺꦴꦤ꧀ꦠꦧꦼꦠ꧀ꦠꦶꦫ​꧈​ꦩꦏ꧀ꦱꦶꦃ​ꦱꦂꦮ​ꦠꦸꦁ​ꦠꦸꦩ꧀꧈​ꦤꦢꦾꦤ꧀ꦱꦭꦶꦤ꧀ꦱꦶꦥꦠ꧀ꦠꦶꦫ​꧈​ꦩꦸꦁ​ꦠꦠꦤꦺ​ꦠꦼꦠꦼꦥ꧀ꦠꦤ꧀ꦲꦺꦴꦮꦃ​ꦲꦶꦁ​ꦲꦠꦶ​꧈​ꦠꦊꦱ꧀ꦱꦺ​ꦏꦮꦶꦱ꧀ꦠꦫ​꧉​

꧄ꦝꦼꦝꦼꦥ꧀ꦠꦶꦝꦼꦩ꧀ꦫꦱꦤꦶꦁ​ꦢꦸꦩꦢꦶ​꧈​ꦩꦁ​ꦒꦸꦁ​ꦩꦺꦔꦼꦠ꧀ꦠꦧꦼꦠ꧀ꦏꦁ​ꦩꦺꦃ​ꦱꦶꦂꦤ​꧈​ꦤꦤꦔꦶ​ꦩꦮꦺꦃ​ꦲꦺꦴꦤꦼꦤ꧀ꦁ​​꧈​ꦤꦢꦾꦤ꧀ꦏꦛꦃ​ꦥꦔꦶꦩꦸꦂ​꧈​ꦩꦸꦁ​ꦱꦸꦩꦩꦂ​ꦢꦠꦤ꧀ꦤꦼꦠꦼꦥ꧀ꦥꦶ​꧈​ꦱꦠꦼꦩꦃ​ꦢꦢꦶꦤꦶꦫ​꧈​ꦏꦤ꧀ꦝꦼꦒ꧀ꦫꦔꦸ​ꦫꦔꦸ​꧈​ꦢꦺꦤꦶꦁ​ꦠꦼꦏꦤꦶꦁ​ꦏꦲꦤꦤ꧀꧈​ꦲꦩꦸꦁ​ꦱꦂꦮ​ꦤꦤꦩꦂ​ꦩꦠꦺꦤꦶ​ꦮꦶꦗꦶ​꧈​ꦏꦁ​ꦮꦸꦱ꧀ꦩꦚ꧀ꦗꦶꦁ​ꦠꦤ꧀ꦲꦺꦴꦚ꧀ꦕꦠ꧀꧉​

꧄ꦮꦸꦱ꧀ꦱꦶꦁ​ꦢꦔꦸ​ꦫꦱ​ꦠꦸꦁ​ꦠꦸꦩ꧀ꦲꦸꦒꦶ​꧈​ꦒꦒꦪꦸꦠ꧀ꦠꦤ꧀ꦲꦺꦴꦉꦒ꧀ꦒꦶꦁ​ꦥꦮꦂꦠ​꧈​ꦏꦁ​ꦩꦿꦠꦤ꧀ꦤꦶ​ꦫꦠ꧀ꦠꦼꦧꦤꦺ​꧈​ꦪꦺꦏꦸ​ꦗꦶꦮꦤꦶꦁ​ꦲꦶꦤ꧀ꦝꦸ​꧈​ꦏꦁ​ꦫꦶꦤꦸꦔꦸ​ꦱꦔ꧀ꦒꦾꦺꦁ​ꦢꦸꦩꦢꦶ​꧈​ꦲꦂꦱ​ꦠꦸꦠꦸꦮꦶ​ꦩꦫꦁ​꧈​ꦠꦧꦼꦠ꧀ꦠꦺ​ꦲꦶꦁ​ꦢꦔꦸ​꧈​ꦩꦂꦩ​ꦲꦺꦧꦃ​ꦠꦤꦃ​ꦗꦮ​꧈​ꦭꦶꦂ​ꦫꦱꦤꦶꦁ​ꦏꦱꦠ꧀ꦠꦤ꧀ꦲꦩꦶꦤ꧀ꦠ​ꦮꦫꦶꦃ​꧈​ꦲꦶꦔꦫꦃ​ꦩꦿꦶꦃ​ꦱꦼꦩ꧀ꦧꦢ​꧉​

꧄ꦢꦸꦥꦶ​ꦥꦭ꧀ꦮ​ꦥꦿꦥ꧀ꦠ​ꦲꦤꦼꦁ​ꦠꦱꦶꦏ꧀꧈​ꦱꦮꦔꦤ꧀ꦤꦶꦁ​ꦧꦸꦩꦶ​ꦠꦤꦃ​ꦗꦮ​꧈​ꦭꦶꦂ​ꦠꦁ​ꦒꦥ꧀ꦩꦸꦭꦸꦁ​ꦲꦱ꧀ꦠꦤꦺ​꧈​ꦥꦶꦤꦼꦛꦸꦏ꧀ꦔꦿꦁ​ꦏꦸꦭ꧀ꦒꦥꦾꦸꦏ꧀꧈​ꦩꦸꦁ​ꦲꦶꦁ​ꦱꦼꦩꦸ​ꦥꦔ꧀ꦭꦶꦁ​ꦏꦥꦠꦶ​꧈​ꦢꦺꦤꦶꦁ​ꦠꦧꦼꦠ꧀ꦠꦶꦁ​ꦠꦠ​꧈​ꦏꦢꦶ​ꦱꦭꦶꦤ꧀ꦮꦸꦗꦸꦢ꧀꧈​ꦫꦶꦮꦸꦱ꧀ꦱꦶꦁ​ꦠꦼꦠꦺꦭ​ꦚꦠ​꧈​ꦢꦠꦤ꧀ꦱꦩꦂ​ꦩꦿꦶꦁ​ꦏ꧀ꦭꦩꦂ​ꦏꦁ​ꦩꦤꦥꦸꦠ꧀ꦠꦶ​꧈​ꦠꦶꦠꦶꦃ​ꦏꦠꦺꦴꦤ꧀ꦠꦼꦠꦺꦭ​꧉​

꧄ꦲꦶꦁ​ꦱꦸꦩꦂꦩ​ꦥꦼꦛꦸꦏ꧀ꦏꦶꦁ​ꦥꦔꦺꦱ꧀ꦛꦶ​꧈​ꦠꦤ꧀ꦏꦠꦫ​ꦭꦮꦤ꧀ꦲꦤꦤꦶꦫ​꧈​ꦩꦸꦁ​ꦏꦫꦶ​ꦕꦶꦥ꧀ꦠꦤꦺ​ꦧꦲꦺ​꧈​ꦏꦁ​ꦩꦏ꧀ꦱꦶꦃ​ꦧꦏꦸꦃ​ꦏꦸꦏꦸꦃ​꧈​ꦏꦁ​ꦏꦢꦾꦼꦏꦸ​ꦪꦺꦴꦒꦾꦤꦺ​ꦩꦁ​ꦏꦶꦤ꧀꧈​ꦩꦿꦶꦃ​ꦠꦸꦭꦸꦱ꧀ꦒꦒꦤ꧀ꦝꦺꦁ​ꦔꦤ꧀꧈​ꦠꦤ꧀ꦩꦮꦁ​ꦲꦶꦁ​ꦱꦼꦩꦸ​꧈​ꦱꦸꦏꦸꦂ​ꦏꦭꦩꦸꦤ꧀ꦮꦶꦢꦢ​꧈​ꦏꦲꦤꦤ꧀ꦤꦺ​ꦒꦛꦸꦏ꧀ꦢꦠꦤ꧀ꦩꦢꦭ꧀ꦱꦸꦩ꧀ꦧꦶ​꧈​ꦏꦤ​ꦭꦤ꧀ꦏꦺꦤꦺ​ꦤꦸꦁ​ꦒꦭ꧀꧉​

꧄ꦮꦸꦱ꧀ꦱꦶꦁ​ꦠꦶꦠꦶ​ꦢꦺꦤ꧀ꦤꦶꦫ​ꦔꦸꦭꦠ꧀ꦠꦶ​꧈​ꦠꦧꦼꦠ꧀ꦠꦶꦫ​ꦏꦁ​ꦮꦸꦱ꧀ꦏꦮꦶꦱ꧀ꦠꦫ​꧈​ꦯꦶ​ꦗꦶꦮ​ꦩꦸꦏ꧀ꦱ​ꦥꦶꦤ꧀ꦝꦤꦺ​꧈​ꦔꦸꦤ꧀ꦢꦸꦂꦫꦶ​ꦏꦶꦠ​ꦮꦁ​ꦱꦸꦭ꧀꧈​ꦠꦤꦃ