꧋ꦏꦾꦲꦶꦩꦠꦸꦂ꧇ꦱꦠꦿꦶꦪ꧈ꦤꦒꦫꦶꦥꦸꦤꦶꦏꦤꦩꦤꦶꦥꦸꦤ꧀ Bretagne꧈ꦲꦶꦁꦏꦁꦗꦸꦩꦼꦤꦼꦁꦤꦠꦲꦗꦸꦗꦸꦭꦸꦏ꧀ꦲꦺꦂꦠꦺꦴꦃ Hoel꧉ꦮꦲꦸꦤꦶꦥꦸꦤ꧀ Bretagne ꦥꦸꦤꦶꦏꦤꦒꦫꦶꦒꦼꦩꦃꦫꦶꦥꦃ꧈ꦭꦺꦴꦃꦗꦶꦤꦮꦶ꧉ꦥꦱꦧꦶꦤ꧀ꦤꦤ꧀꧈ꦥꦠꦼꦒꦶꦭ꧀ꦭꦤ꧀ꦩꦏꦠꦼꦤ꧀ꦲꦸꦒꦶꦥꦏꦼꦧꦺꦴꦤ꧀ꦤꦤ꧀ꦤꦶꦥꦸꦤ꧀ꦮꦶꦪꦂꦮꦶꦪꦂ꧈ꦱꦂꦠꦏꦛꦃꦥꦩꦼꦢꦭ꧀ꦭꦶꦥꦸꦤ꧀꧉ꦏꦛꦃꦠꦶꦪꦁꦠꦤꦶꦲꦶꦁꦏꦁꦒꦝꦃꦥꦁꦒꦶꦭꦶꦁꦔꦤ꧀ꦒ꧀ꦭꦼꦥꦸꦁ꧉ꦲꦶꦁꦏꦁꦒꦝꦃꦏꦼꦧꦺꦴꦤ꧀ꦮꦺꦴꦮꦺꦴꦃꦲꦤ꧀ꦲꦶꦁꦒꦶꦃꦏꦛꦃ꧉ꦤꦔꦶꦁꦤꦒꦫꦶꦥꦸꦤꦶꦏꦏꦫꦶꦱꦏ꧀ꦢꦺꦤꦶꦁ Graaf Riol ꦲꦶꦁ Nantes꧉ꦮꦢꦾꦧꦭꦤꦶꦥꦸꦤ꧀ꦱꦩꦶꦲꦩ꧀ꦧꦼꦱ꧀ꦩꦶꦒꦿꦶꦪꦒꦿꦶꦪꦱꦊꦧꦼꦠ꧀ꦠꦶꦁꦏꦶꦛꦱꦲꦲꦶꦁꦥꦝꦸꦱꦸꦤ꧀ꦤꦤ꧀ꦱꦲꦲꦚ꧀ꦗꦫꦃꦫꦪꦃꦫꦗꦧꦫꦤꦤꦶꦥꦸꦤ꧀ꦠꦶꦠꦶꦪꦁꦲꦶꦁ Bretagne꧉
꧋ꦦꦿꦧꦸ Tristan ꦲꦤ꧀ꦢꦔꦸꦩꦭꦶꦃ꧈ꦥꦔꦤ꧀ꦢꦶꦏꦤꦶꦥꦸꦤ꧀꧇ꦏꦾꦲꦶ꧈ꦪꦒꦺꦤꦺ Graaf Riol ꦲꦩꦼꦫꦁꦔꦶꦫꦠꦸꦤꦶꦫ꧉
꧋ꦏꦾꦲꦶꦲꦩꦁꦱꦸꦭ꧀ꦭꦶ꧇ꦱꦠꦿꦶꦪ꧈ꦩꦸꦒꦶꦏꦮꦸꦤꦶꦁꦔꦤ꧀ꦤ꧈Graaf Riol ꦥꦸꦤꦶꦏꦏꦭꦺꦫꦺꦃꦲꦤ꧀ꦤꦶꦥꦸꦤ꧀ꦲꦺꦂꦠꦺꦴꦃ Hoel꧉ꦲꦺꦂꦠꦺꦴꦃ Hoel ꦏꦒꦸꦁꦔꦤ꧀ꦥꦸꦠꦿꦏꦭꦶꦃ꧈ꦲꦶꦁꦏꦁꦱꦠꦸꦁꦒꦭ꧀ꦏꦏꦸꦁꦲꦮꦱ꧀ꦠ Kaherdin꧈ꦲꦶꦁꦏꦁꦱꦠꦸꦁꦒꦭ꧀ꦭꦶꦥꦸꦤ꧀ꦥꦸꦠꦿꦶꦱꦏꦭꦁꦏꦸꦁꦲꦺꦤ꧀ꦢꦃꦲꦶꦁꦮꦂꦤꦶ꧉ꦯꦁꦥꦸꦠꦿꦶꦮꦲꦸꦏꦱꦸꦮꦸꦤ꧀ꦢꦺꦤꦶꦁ Graaf Riol ꦧꦝꦺꦏꦒꦂꦮ꧈ꦤꦔꦶꦁꦲꦺꦂꦠꦺꦴꦃ Heol ꦧꦺꦴꦠꦼꦤ꧀ꦏꦂꦱꦏꦒꦸꦁꦔꦤ꧀ꦩꦤ꧀ꦠꦸꦱꦠꦿꦶꦪꦏꦭꦺꦫꦺꦃꦲꦤ꧀ꦤꦶꦥꦸꦤ꧀꧉ꦥꦿꦩꦶꦭ Graaf Riol ꦭꦗꦼꦁꦲꦩ꧀ꦧꦭꦺꦭ꧈ꦱꦂꦠꦤꦸꦤ꧀ꦠꦼꦤ꧀ꦲꦩꦼꦫꦁꦔꦶꦫꦠꦸꦤꦶꦥꦸꦤ꧀꧉
꧋ꦦꦿꦧꦸ Tristan ꦔꦤ꧀ꦢꦶꦏ꧇ꦲꦥꦏꦶꦫꦏꦶꦫꦲꦺꦂꦠꦺꦴꦃ Hoel ꦧꦶꦱꦤꦁꦒꦸꦭꦁꦔꦶꦩꦸꦁꦱꦸꦃꦲꦺ꧉
꧋ꦏꦾꦲꦶꦲꦩꦁꦱꦸꦭ꧀ꦭꦶ꧇ꦩꦺꦃꦏꦺꦩꦮꦺꦴꦤ꧀ꦏꦱꦺꦴꦂꦫꦤ꧀ꦥꦼꦫꦁꦔꦶꦥꦸꦤ꧀꧉ꦏꦊꦉꦱ꧀ꦱꦤ꧀ꦲꦺꦂꦠꦺꦴꦃ Hoel ꦠꦏ꧀ꦱꦶꦃꦏꦒꦸꦁꦔꦤ꧀ꦏꦫꦠꦺꦴꦤ꧀ꦲꦶꦁꦏꦁꦏꦶꦤꦸꦧꦼꦁꦲꦶꦁꦧꦺꦤ꧀ꦠꦺꦁꦏꦶꦪꦠ꧀ꦱꦔꦼꦠ꧀꧈ꦲꦶꦁꦒꦶꦃꦥꦸꦤꦶꦏꦏꦫꦠꦺꦴꦤ꧀ Carhaix꧉ꦱꦥꦸꦤꦶꦏꦱꦁꦲꦺꦂꦠꦺꦴꦃꦱꦒꦂꦮꦥꦸꦠꦿꦠꦸꦮꦶꦤ꧀ꦮꦢꦾꦧꦭꦤꦶꦥꦸꦤ꧀ꦠꦏ꧀ꦱꦶꦃꦱꦩꦶꦔ꧀ꦭꦼꦩ꧀ꦥꦏ꧀ꦲꦶꦁꦱꦊꦧꦼꦠ꧀ꦠꦶꦁꦏꦫꦠꦺꦴꦤ꧀ꦮꦲꦸ꧉ꦤꦔꦶꦁꦏꦫꦠꦺꦴꦤ꧀ꦥꦸꦤꦶꦏꦠꦤ꧀ꦱꦃꦏꦶꦤꦼꦥꦸꦁꦲꦶꦁꦩꦼꦁꦱꦃ꧉ꦥꦤ꧀ꦢꦸꦒꦶꦏꦸꦭꦧꦺꦴꦠꦼꦤ꧀ꦲꦤ꧀ꦠꦮꦶꦱ꧀ꦢꦔꦸꦩꦭꦶꦃꦏꦼꦥꦼꦏ꧀ꦱꦤꦸꦁꦏꦸꦭ꧀꧈ꦩꦂꦒꦶꦏꦼꦠꦼꦭꦱ꧀ꦱꦼꦤ꧀ꦠꦼꦠꦼꦝꦤ꧀꧉
꧋ꦦꦿꦧꦸ Tristan ꦤꦸꦤ꧀ꦠꦼꦤ꧀ꦲꦤ꧀ꦢꦔꦸꦥꦶꦤ꧀ꦠꦼꦤ꧀ꦠꦼꦧꦶꦃꦲꦶꦥꦸꦤ꧀ꦏꦫꦠꦺꦴꦤ꧀ Carhaix ꦱꦏꦶꦁꦥꦝꦺꦥꦺꦴꦏ꧀ꦏꦤ꧀ꦤꦶꦥꦸꦤ꧀ꦏꦾꦲꦶꦮꦲꦸ꧉
꧋ꦏꦾꦲꦶꦩꦠꦸꦂ꧇ꦤꦩꦸꦁꦏꦤ꧀ꦠꦸꦤ꧀ꦏꦭꦶꦃꦩꦶꦭ꧀ꦩꦭꦶꦃ꧈ꦱꦠꦿꦶꦪ꧉
꧋ꦲꦶꦁꦱꦫꦺꦃꦤꦺꦏꦭꦱꦩꦤ꧀ꦠꦼꦤ꧀ꦱꦩ꧀ꦥꦸꦤ꧀ꦢꦭꦸ꧈ꦲꦶꦁꦏꦁꦒꦝꦃꦒꦿꦶꦪꦠꦸꦮꦶꦤ꧀ꦠꦩꦸꦤꦶꦥꦸꦤ꧀ꦱꦩꦶꦩꦥꦤ꧀ꦠꦶꦊꦩ꧀꧉ꦲꦺꦚ꧀ꦗꦶꦁꦔꦶꦥꦸꦤ꧀꧈ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦱꦼꦒꦃꦱꦫꦥꦤ꧀꧈ꦦꦿꦧꦸ Tristan ꦏꦭꦶꦪꦤ꧀ꦲꦧ꧀ꦢꦶꦤꦶꦥꦸꦤ꧀ꦤꦸꦤ꧀ꦠꦼꦤ꧀ꦥꦩꦶꦠ꧀ꦠꦤ꧀ꦧꦝꦺꦔ꧀ꦭꦗꦼꦁꦔꦏꦼꦤ꧀ꦭꦩ꧀ꦥꦃꦝꦠꦼꦁꦲꦶꦁꦏꦫꦠꦺꦴꦤ꧀ Carhaix ꦮꦲꦸ꧉ꦱꦉꦁꦠꦶꦤ꧀ꦢꦏ꧀ꦏꦶꦥꦸꦤ꧀ꦦꦿꦧꦸ Tristan ꦢꦸꦩꦸꦒꦶꦱꦔꦗꦼꦁꦔꦶꦁꦒꦥꦸꦫꦏꦫꦠꦺꦴꦤ꧀ꦲꦶꦁꦏꦁꦏꦶꦤꦸꦚ꧀ꦕꦶ꧈ꦤꦸꦤ꧀ꦠꦼꦤ꧀ꦩꦿꦶꦏ꧀ꦱꦤ꧀ꦤꦶꦱꦠꦿꦶꦪꦱꦮꦠꦮꦶꦱ꧀ꦏꦛꦃꦲꦶꦥꦸꦤ꧀ꦲꦶꦁꦏꦁꦱꦩꦶꦲꦔꦔ꧀ꦭꦁꦔꦶꦱꦏꦸꦧꦼꦁꦔꦶꦁꦏꦫꦠꦺꦴꦤ꧀ꦥꦸꦤꦶꦏ꧉ꦦꦿꦧꦸ Tristan ꦩꦉꦥꦼꦏ꧀ꦏꦶꦝꦠꦼꦁꦱꦠꦿꦶꦪꦱꦠꦿꦶꦪꦮꦲꦸ꧈ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦲꦚꦸꦏꦤ꧀ꦤꦶꦠꦺꦴꦤ꧀ꦝꦏꦲꦸꦂꦩꦠ꧀ꦠꦤ꧀ꦲꦶꦁꦏꦁꦮꦶꦤꦁꦱꦸꦭ꧀ꦭꦤ꧀ꦏꦢꦺꦴꦱ꧀ꦲꦢꦠ꧀ꦠꦶꦁꦱꦠꦿꦶꦪꦲꦶꦁꦏꦁꦤꦼꦩ꧀ꦧꦺꦠꦼꦥꦁ꧈ꦤꦸꦤ꧀ꦠꦼꦤ꧀ꦲꦤꦏꦺꦏ꧀ꦲꦏꦼꦤ꧀ꦝꦠꦼꦁꦯꦁꦲꦺꦂꦠꦺꦴꦃ Hoel꧉ꦲꦺꦂꦠꦺꦴꦃ Hoel ꦲꦶꦁꦏꦁꦏꦝꦺꦫꦺꦏ꧀ꦏꦏꦼꦤ꧀ꦢꦺꦤꦶꦁꦥꦸꦠꦿꦤꦶꦥꦸꦤ꧀꧈ꦱꦲꦲꦶꦁꦏꦁꦏꦕꦫꦶꦪꦺꦴꦱ꧀ꦧꦺꦂꦏꦮꦤꦺꦤ꧀꧈ꦥꦸꦤꦥꦩꦭꦶꦃꦏꦲꦶꦫꦶꦁꦢꦺꦤꦶꦁꦱꦠꦿꦶꦪꦏꦭꦺꦫꦺꦃꦲꦤ꧀ꦤꦶꦥꦸꦤ꧀꧈ꦔꦤ꧀ꦢꦶꦏꦧꦶꦭꦶꦃꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦲꦺꦂꦠꦺꦴꦃ Hoel꧉
꧋ꦦꦿꦧꦸ Tristan ꦤꦸꦤ꧀ꦠꦼꦤ꧀ꦔꦠꦸꦂꦫꦶꦮꦸꦤꦶꦁꦔ꧈ꦧꦶꦭꦶꦃꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦥꦸꦤꦶꦏꦫꦠꦸꦲꦶꦁ Loonnois꧉ꦥꦔꦤ꧀ꦢꦶꦏꦤꦶꦥꦸꦤ꧀꧇ꦏꦸꦭ꧈ꦫꦠꦸꦲꦶꦁ Loonnois꧉ꦦꦿꦧꦸ Marc ꦫꦠꦸꦲꦶꦁ Cornwallis ꦥꦩꦤ꧀ꦏꦸꦭ꧉ꦏꦸꦭꦩꦶꦉꦁꦮꦂꦠꦺꦴꦱ꧀ꦧꦶꦭꦶꦃꦥꦢꦸꦏꦢꦶꦥꦸꦤ꧀ꦥꦼꦫꦁꦔꦶꦢꦺꦤꦶꦁꦫꦗꦫꦗꦏꦭꦺꦫꦺꦃꦲꦤ꧀ꦥꦢꦸꦏ꧉ꦩꦤꦮꦶꦥꦢꦸꦏꦏꦂꦱꦤꦩ꧀ꦥꦶꦱꦺꦴꦮꦤ꧀ꦏꦸꦭ꧈ꦏꦸꦭꦱꦸꦩꦼꦢꦾꦲꦠꦸꦠꦸꦭꦸꦁꦲꦶꦁꦥꦢꦸꦏ꧈ꦤꦁꦒꦸꦭꦁꦔꦶꦩꦼꦁꦱꦃꦥꦢꦸꦏꦥꦸꦤꦶꦏ꧉
꧋ꦲꦺꦂꦠꦺꦴꦃ Hoel ꦲꦩꦁꦱꦸꦭ꧀ꦭꦶ꧇ꦱꦪꦼꦏ꧀ꦠꦺꦴꦱ꧀ꦱꦶꦥꦸꦤ꧀ꦏꦸꦭꦕꦸꦮꦱꦔꦼꦠ꧀ꦧꦺꦴꦠꦼꦤ꧀ꦱꦒꦼꦢ꧀ꦤꦩ꧀ꦥꦺꦤ꧀ꦤꦶꦥꦢꦸꦏ꧈ꦩꦂꦒꦶꦲꦶꦁꦱꦊꦧꦼꦠ꧀ꦠꦶꦁꦏꦫꦠꦺꦴꦤ꧀ꦏꦸꦭꦩꦺꦃꦏꦠꦼꦭꦱ꧀ꦱꦤ꧀ꦠꦤ꧀ꦝꦺꦴꦤ꧀ꦠꦼꦝ꧈ꦏꦤ꧀ꦠꦸꦤ꧀ꦠꦤ꧀ꦝꦺꦴꦤ꧀ꦠꦼꦠꦼꦝꦤ꧀ꦱꦮꦶꦪꦃꦏꦺꦩꦮꦺꦴꦤ꧀ꦲꦶꦁꦏꦁꦠꦏ꧀ꦱꦶꦃ꧉ꦏꦢꦺꦴꦱ꧀ꦥꦸꦤ꧀ꦢꦶꦱꦒꦼꦢ꧀ꦏꦸꦭꦤꦩ꧀ꦥꦶꦥꦢꦸꦏꦏꦭꦪꦤ꧀ꦏꦲꦸꦠꦩꦤ꧀꧉
꧋ꦦꦿꦧꦸ Tristan ꦩꦠꦸꦂꦩꦭꦶꦃ꧇ꦲꦺꦂꦠꦺꦴꦃ꧈ꦩꦏꦠꦼꦤ꧀ꦥꦸꦤꦶꦏꦧꦺꦴꦠꦼꦤ꧀ꦲꦤ꧀ꦢꦢꦺꦴꦱ꧀ꦱꦏꦼꦤ꧀ꦥꦩ꧀ꦧꦼꦁꦔꦤ꧀ꦲꦶꦁꦏꦁꦥꦽꦭꦸ꧈ꦲꦮꦶꦠ꧀ꦱꦊꦧꦼꦠ꧀ꦠꦶꦥꦸꦤ꧀ꦏꦭꦶꦃꦠꦲꦸꦤ꧀ꦥꦸꦤꦶꦏꦏꦸꦭꦲꦚꦺꦴꦧꦒꦼꦱꦁꦮꦺꦴꦤ꧀ꦠꦼꦤ꧀ꦲꦶꦁꦱꦊꦧꦼꦠ꧀ꦠꦶꦁꦮꦤ꧉ꦲꦶꦁꦱꦢꦶꦤ꧀ꦠꦼꦤ꧀ꦢꦶꦤ꧀ꦠꦼꦤ꧀ꦤꦶꦥꦸꦤ꧀ꦤꦩꦸꦁꦤꦼꦝꦮꦺꦴꦮꦺꦴꦃꦲꦤ꧀꧈ꦫꦺꦴꦤꦿꦺꦴꦤ꧀ꦤꦤ꧀꧈ꦲꦺꦴꦪꦺꦴꦢ꧀ꦲꦺꦴꦪꦺꦴꦢ꧀ꦢꦤ꧀ꦠꦸꦮꦶꦤ꧀ꦧꦸꦧꦸꦗꦼꦁꦔꦤ꧀ꦲꦶꦁꦮꦤ꧉ꦢꦢꦺꦴꦱ꧀ꦏꦸꦭꦧꦺꦴꦠꦼꦤ꧀ꦧꦝꦺꦏꦒꦺꦠ꧀ꦩꦭꦶꦃ꧈ꦩꦤꦮꦶꦥꦢꦸꦏꦥꦫꦶꦁꦔꦶꦱꦼꦱꦼꦒꦃꦠꦼꦠꦼꦝꦤ꧀ꦱꦮꦶꦪꦃ꧉ꦥꦿꦩꦶꦭꦥꦤꦸꦮꦸꦤ꧀ꦏꦸꦭꦩꦸꦒꦶꦥꦢꦸꦏꦏꦂꦱꦤꦩ꧀ꦥꦶꦝꦠꦼꦁꦗꦱꦠ꧀ꦏꦸꦭ꧉
꧋ꦥꦸꦠꦿꦤꦶꦥꦸꦤ꧀ꦲꦺꦂꦠꦺꦴꦃ Hoel ꦲꦶꦁꦏꦁꦲꦮꦱ꧀ꦠ Kaherdin ꦤꦸꦤ꧀ꦠꦼꦤ꧀ꦩꦠꦸꦂꦝꦠꦼꦁꦲꦶꦁꦏꦁꦫꦩ꧈ꦲꦠꦸꦂꦫꦶꦥꦸꦤ꧀꧇ꦫꦩ꧈ꦩꦸꦒꦶꦥꦢꦸꦏꦏꦂꦱꦲꦲꦤꦩ꧀ꦥꦶꦱꦠꦿꦶꦪꦥꦸꦤꦶꦏ꧈ꦩꦤꦮꦶꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦱꦪꦏ꧀ꦠꦺꦴꦱ꧀ꦥꦸꦫꦸꦤ꧀ꦲꦩ꧀ꦧꦺꦭꦤ꧀ꦤꦶꦝꦠꦼꦁꦏꦸꦭꦱꦢꦪꦱꦂꦠꦥꦸꦫꦸꦤ꧀ꦠꦸꦩꦸꦠ꧀ꦲꦤꦤ꧀ꦝꦁꦏꦶꦏꦶꦫꦁꦔꦤ꧀꧉
꧋ꦏꦕꦫꦶꦪꦺꦴꦱ꧀꧈ꦒꦥꦸꦫꦤꦶꦁꦏꦫꦠꦺꦴꦤ꧀ꦲꦶꦁꦏꦁꦕꦼꦭꦏ꧀ꦏꦭꦶꦪꦤ꧀ꦥꦁꦒꦺꦤ꧀ꦤꦤ꧀ꦤꦶꦁꦥꦫꦱꦠꦿꦶꦪꦮꦲꦸꦤꦸꦤ꧀ꦠꦼꦤ꧀ꦢꦶꦥꦸꦤ꧀ꦧꦶꦏꦏ꧀꧉ꦦꦿꦧꦸ Tristan ꦢꦶꦥꦸꦤ꧀ꦠꦩ꧀ꦥꦺꦤ꧀ꦤꦶꦏꦤ꧀ꦛꦶꦥꦏꦸꦂꦩꦠ꧀ꦠꦤ꧀꧉ Kaherdin ꦭꦗꦼꦁꦲꦤꦼꦢꦃꦲꦏꦼꦤ꧀ꦠꦺꦩ꧀ꦧꦺꦴꦏ꧀ꦏꦶꦁꦏꦫꦠꦺꦴꦤ꧀ꦲꦶꦁꦏꦁꦱꦏꦭꦁꦏꦸꦁꦏꦶꦪꦠ꧀ꦥꦸꦤꦶꦏ꧈ꦠꦸꦮꦶꦤ꧀ꦩꦼꦤꦫꦩꦼꦤꦫꦥꦁꦒꦺꦤ꧀ꦤꦤ꧀ꦤꦶꦥꦸꦤ꧀ꦥꦫꦥꦿꦗꦸꦫꦶꦠ꧀ꦲꦶꦁꦏꦁꦱꦩꦶꦲꦚ꧀ꦗꦒꦶꦏꦫꦠꦺꦴꦤ꧀꧉ꦱꦏꦶꦁꦲꦶꦁꦱꦊꦧꦼꦠ꧀ꦠꦶꦁꦩꦼꦤꦫꦮꦲꦸ Kaherdin ꦲꦤꦼꦢꦃꦲꦏꦼꦤ꧀ꦥꦱꦁꦒꦿꦃꦲꦤ꧀ꦤꦶꦥꦸꦤ꧀ Graaf Riol ꦱꦮꦢꦾꦧꦭꦤꦶꦥꦸꦤ꧀ꦲꦶꦁꦏꦁꦏꦲꦢꦼꦒ꧀ꦒꦏꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦲꦫꦲꦫꦱꦮꦠꦮꦶꦱ꧀ꦩꦶꦭ꧀ꦠꦼꦧꦶꦃꦲꦶꦥꦸꦤ꧀ꦱꦏꦶꦁꦲꦶꦁꦏꦫꦠꦺꦴꦤ꧀ꦮꦲꦸ꧉ Kaherdin ꦭꦤ꧀ꦦꦿꦧꦸ Tristan ꦤꦸꦤ꧀ꦠꦼꦤ꧀ꦮꦁꦱꦸꦭ꧀ꦝꦠꦼꦁꦲꦶꦁꦏꦫꦠꦺꦴꦤ꧀꧈ꦱꦉꦁꦱꦩ꧀ꦥꦸꦤ꧀ꦢꦸꦩꦸꦒꦶꦲꦶꦁꦒꦥꦸꦫꦤꦶꦁꦏꦫꦠꦺꦴꦤ꧀ꦲꦶꦁꦏꦁꦔ꧀ꦭꦼꦧꦼꦠ꧀ Kaherdin ꦤꦸꦤ꧀ꦠꦼꦤ꧀ꦩꦠꦸꦂꦝꦠꦼꦁꦦꦿꦧꦸ Tristan꧈ꦮꦶꦕꦤ꧀ꦠꦼꦤ꧀ꦤꦶꦥꦸꦤ꧀꧇ꦱꦝꦺꦫꦺꦏ꧀ꦱꦸꦩꦺꦴꦁꦒꦱꦩꦶꦱꦺꦴꦮꦤ꧀ꦝꦠꦼꦁꦔꦂꦱꦤ꧀ꦤꦶꦥꦸꦤ꧀ꦲꦶꦧꦸꦱꦂꦠꦲꦩꦁꦒꦶꦃꦲꦶꦱꦝꦺꦫꦺꦏ꧀ꦏꦸꦭꦲꦺꦱ꧀ꦠꦿꦶ꧉ꦱꦠꦿꦶꦪꦏꦏꦭꦶꦃꦮꦲꦸꦤꦸꦤ꧀ꦠꦼꦤ꧀ꦭꦸꦩꦼꦧꦼꦠ꧀ꦝꦠꦼꦁꦲꦶꦁꦏꦥꦸꦠꦿꦺꦤ꧀꧉ꦏꦭꦱꦩꦤ꧀ꦠꦼꦤ꧀ꦱꦁꦦꦿꦩꦺꦱ꧀ꦮꦫꦶꦠꦸꦮꦶꦤ꧀ꦥꦸꦠꦿꦤꦶꦥꦸꦤ꧀ꦥꦸꦠꦿꦶꦱꦩꦶꦊꦊꦁꦒꦃꦲꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦩꦂꦠꦩꦸ꧉ꦥꦫꦥꦸꦠꦿꦶꦱꦩꦶꦊꦁꦒꦃꦲꦶꦁꦥꦥꦤ꧀ꦲꦶꦁꦏꦁꦒꦶꦤꦼꦭꦂꦫꦤ꧀ꦲꦶꦁꦧꦧꦸꦠ꧀ꦱꦲꦺꦱꦔꦼꦠ꧀ꦱꦂꦠꦫꦶꦤꦼꦁꦒꦲꦶꦁꦱꦼꦱꦼꦏꦂꦫꦤ꧀ꦲꦢꦶ꧉ꦲꦁꦒꦺꦤ꧀ꦤꦶꦥꦸꦤ꧀ꦊꦊꦁꦒꦃꦲꦤ꧀ꦱꦩꦶꦚꦩ꧀ꦧꦶꦲꦩ꧀ꦧꦺꦴꦂꦝꦶꦂ꧈ꦯꦁꦦꦿꦩꦺꦱ꧀ꦮꦫꦶꦠꦸꦮꦶꦤ꧀ꦱꦁꦥꦸꦠꦿꦶꦱꦩꦶꦲꦸꦫꦲꦸꦫ꧈ꦢꦺꦤꦺꦲꦶꦁꦏꦁꦏꦁꦒꦺꦲꦸꦫꦲꦸꦫꦮꦲꦸꦕꦫꦶꦪꦺꦴꦱ꧀ꦱꦶꦥꦸꦤ꧀ꦥꦸꦠꦿꦶ Doette ꦏꦭꦶꦪꦤ꧀ꦩꦶꦠꦿꦤꦶꦥꦸꦤ꧀꧈ꦲꦶꦁꦒꦶꦃꦥꦸꦤꦶꦏꦱꦠꦿꦶꦪ Doon꧉ꦱꦉꦁꦱꦩ꧀ꦥꦸꦤ꧀ꦕꦏꦼꦠ꧀꧈ꦦꦿꦧꦸ Tristan ꦤꦸꦤ꧀ꦠꦼꦤ꧀ꦲꦔꦸꦂꦩꦠ꧀ꦠꦶꦝꦠꦼꦁꦥꦫꦥꦸꦠꦿꦶꦮꦲꦸꦲꦤ꧀ꦝꦶꦁꦏꦸꦭ꧀ꦭꦏꦼꦤ꧀ꦱꦫꦶꦫꦤꦶꦥꦸꦤ꧀ꦱꦮꦠꦮꦶꦱ꧀꧉ꦥꦫꦥꦸꦠꦿꦶꦲꦶꦁꦒꦶꦃꦩꦊꦱ꧀ꦲꦔꦸꦂꦩꦠ꧀ꦠꦶ꧉ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦭꦗꦼꦁꦱꦩꦶꦊꦊꦁꦒꦃꦲꦤ꧀꧉
(ꦧꦝꦺꦏꦱꦩ꧀ꦧꦼꦠ꧀ꦠꦤ꧀)
