ꦤꦶꦔꦿꦠ꧀ꦥꦸꦤꦶꦏꦩꦤꦃꦏꦸꦭꦱꦩ꧀ꦥꦸꦤ꧀ꦧꦺꦴꦠꦼꦤ꧀ꦲꦁꦒꦝꦃꦲꦶꦱꦼꦩꦁꦱꦼꦩꦁ꧈ꦱꦏꦶꦁꦲꦁꦒꦺꦤ꧀ꦤꦶꦥꦸꦤ꧀ꦱꦩ꧀ꦥꦸꦤ꧀ꦲꦚꦼꦏꦥ꧀ꦥꦶꦲꦤꦶꦤ꧀ꦢꦏ꧀ꦏꦏꦼꦤ꧀ꦥꦤ꧀ꦢꦩꦼꦭ꧀ꦭꦤ꧀ꦏꦸꦭ꧉ꦤꦭꦶꦏꦏꦸꦭꦱꦮꦼꦒ꧀ꦢꦢꦺꦴꦱ꧀ꦥꦔꦒꦼꦁꦔꦶꦁꦥꦫꦺꦤ꧀ꦠꦃꦏꦫꦠꦺꦴꦤ꧀ꦫꦸꦩꦲꦺꦴꦱ꧀ꦠꦏ꧀ꦱꦶꦃꦢꦺꦫꦺꦁꦚꦸꦩꦼꦉꦥ꧀ꦥꦶꦏꦮꦺꦴꦤ꧀ꦠꦼꦤ꧀ꦤꦤ꧀ꦱꦂꦠꦠꦸꦩꦶꦤ꧀ꦢꦏ꧀ꦏꦶꦥꦸꦤ꧀ꦲꦶꦁꦏꦫꦠꦺꦴꦤ꧀ꦱꦢꦪ꧈ꦱꦧꦼꦤ꧀ꦢꦶꦤ꧀ꦠꦼꦤ꧀ꦤꦶꦥꦸꦤ꧀ꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦠꦤ꧀ꦱꦃꦢꦢꦺꦴꦱ꧀ꦥꦶꦠꦏꦺꦤ꧀ꦤꦤ꧀ꦏꦸꦭ꧈ꦱꦏꦶꦁꦲꦁꦒꦺꦤ꧀ꦤꦶꦥꦸꦤ꧀ꦱꦸꦮꦶꦠꦮꦺꦴꦤ꧀ꦠꦼꦤ꧀ꦲꦶꦁꦏꦫꦠꦺꦴꦤ꧀ꦱꦩ꧀ꦥꦸꦤ꧀ꦭꦩꦶ꧈ꦔꦤ꧀ꦠꦺꦴꦱ꧀ꦱꦒꦼꦢ꧀ꦠꦼꦫꦁꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦏꦫꦠꦺꦴꦤ꧀ꦱꦢꦪ꧈ꦱꦂꦠꦥꦿꦱꦱꦠ꧀ꦢꦢꦺꦴꦱ꧀ꦥꦶꦠꦏꦺꦤ꧀ꦤꦤ꧀ꦤꦶꦥꦸꦤ꧀ꦠꦶꦪꦁꦱꦏꦿꦠꦺꦴꦤ꧀꧉
꧋ꦏꦸꦭꦧꦝꦺꦲꦁꦒꦼꦭꦂꦫꦏꦼꦤ꧀ꦱꦮꦠꦮꦶꦱ꧀ꦭꦭꦩ꧀ꦥꦃꦲꦤ꧀ꦤꦶꦥꦸꦤ꧀ꦫꦢꦺꦤ꧀ꦠꦸꦩꦼꦁꦒꦸꦁꦄꦠ꧀ꦩꦢꦶꦤꦶꦔꦿꦠ꧀꧉ꦲꦁꦒꦺꦤ꧀ꦤꦶꦥꦸꦤ꧀ꦱꦸꦮꦶꦠꦮꦶꦮꦶꦠ꧀ꦧꦶꦧꦂꦠꦼꦠꦏ꧀꧈ꦩꦶꦁꦒꦃꦩꦶꦁꦒꦃꦥꦁꦏꦠ꧀ꦠꦶꦥꦸꦤ꧀ꦔꦤ꧀ꦠꦺꦴꦱ꧀ꦢꦢꦺꦴꦱ꧀ꦲꦧ꧀ꦢꦶꦢꦊꦩ꧀ꦧꦸꦥꦠꦶꦒꦼꦝꦺꦴꦁꦏꦶꦮꦥꦸꦤꦶꦏꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦱꦩ꧀ꦥꦸꦤ꧀꧇꧔꧕꧇ꦠꦲꦸꦤ꧀꧈ꦢꦺꦤꦺꦮꦶꦮꦶꦠ꧀ꦠꦶꦥꦸꦤ꧀ꦱꦸꦮꦶꦠꦮꦲꦸꦤꦭꦶꦏꦠꦏ꧀ꦱꦶꦃꦱ꧀ꦮꦂꦒꦶꦯꦩ꧀ꦦꦺꦪꦤ꧀ꦢꦊꦩ꧀ꦲꦶꦁꦏꦁꦯꦶꦟꦸꦲꦸꦤ꧀ꦏꦁꦗꦼꦁꦯꦸꦯꦸꦲꦸꦤ꧀ꦤꦤ꧀ꦲꦶꦁꦏꦁꦏꦥꦶꦁ IX ꦱꦩ꧀ꦥꦸꦤ꧀ꦲꦤꦶꦤ꧀ꦢꦏ꧀ꦏꦏꦼꦤ꧀ꦚꦼꦥꦼꦁꦲꦂꦠ꧈ꦱꦉꦁꦗꦸꦩꦼꦤꦼꦁꦢꦊꦩ꧀ꦱꦩ꧀ꦦꦺꦪꦤ꧀ꦢꦊꦩ꧀ꦲꦶꦁꦏꦁꦮꦶꦕꦏ꧀ꦱꦤꦲꦶꦁꦏꦁꦯꦶꦤꦸꦲꦸꦤ꧀ꦏꦁꦗꦼꦁꦯꦸꦯꦸꦲꦸꦤ꧀ꦤꦤ꧀ꦲꦶꦁꦏꦁꦏꦥꦶꦁ X ꦥꦸꦤꦶꦏꦭꦗꦼꦁꦏꦒꦼꦩ꧀ꦮꦺꦴꦤ꧀ꦠꦼꦤ꧀ꦔꦂꦱꦢꦊꦩ꧀꧈ꦲꦤꦶꦤ꧀ꦢꦏ꧀ꦏꦏꦼꦤ꧀ꦥꦿꦏꦮꦶꦱ꧀ꦫꦺꦩꦺꦃꦢꦸꦩꦸꦒꦶꦲꦶꦁꦏꦁꦥꦂꦭꦸ꧈ꦱꦂꦠꦠꦏ꧀ꦱꦶꦃꦲꦤꦶꦤ꧀ꦢꦏ꧀ꦏꦏꦼꦤ꧀ꦚꦼꦥꦼꦁꦲꦂꦠ꧉ꦱꦉꦁꦮꦶꦮꦶꦠ꧀ꦠꦠꦤꦤ꧀ꦲꦺꦁꦒꦭ꧀ꦏꦫꦠꦺꦴꦤ꧀꧈ꦭꦗꦼꦁꦢꦢꦺꦴꦱ꧀ꦏꦺꦴꦤ꧀ꦝꦁꦏꦸꦭ꧇ꦲꦔꦺꦔꦼꦠ꧀ꦠꦶꦭꦭꦧꦼꦠ꧀ꦠꦤ꧀ꦱꦂꦠꦫꦸꦩꦼꦏ꧀ꦱꦤ꧀ꦤꦶꦥꦸꦤ꧀ꦲꦶꦁꦏꦫꦠꦺꦴꦤ꧀ꦠꦸꦮꦶꦤ꧀ꦱꦭꦶꦫꦢꦊꦩ꧀꧈ꦱꦊꦧꦼꦠ꧀ꦠꦶꦥꦸꦤ꧀ꦢꦢꦺꦴꦱ꧀ꦲꦧ꧀ꦢꦶꦢꦊꦩ꧀ꦧꦸꦥꦠꦶꦎꦂꦝꦼꦤꦱ꧀ꦏꦒꦚ꧀ꦗꦂꦱꦿꦶꦤꦸꦒꦿꦲꦥꦁꦏꦠ꧀ III ꦩꦼꦁꦒꦃꦲꦁꦒꦺꦤ꧀ꦤꦶꦁꦫꦢꦺꦤ꧀ꦠꦸꦩꦼꦁꦒꦸꦁꦄꦠ꧀ꦩꦢꦶꦤꦶꦔꦿꦠ꧀ꦤꦶꦤ꧀ꦢꦏ꧀ꦏꦏꦼꦤ꧀ꦥꦢꦩꦼꦭ꧀ꦭꦤ꧀꧈ꦥꦚꦼꦥꦼꦁꦔꦶꦥꦸꦤ꧀ꦥꦥꦿꦺꦤ꧀ꦠꦃꦲꦤ꧀ꦗꦼꦗꦼꦒ꧀꧈ꦔꦢꦶꦭ꧀꧈ꦧꦺꦴꦠꦼꦤ꧀ꦲꦩ꧀ꦧꦲꦸꦏꦥꦶꦤꦺ꧈ꦩꦤꦮꦶꦮꦺꦴꦤ꧀ꦠꦼꦤ꧀ꦏꦭꦺꦫꦺꦃꦲꦤ꧀ꦤꦶꦥꦸꦤ꧀ꦲꦶꦁꦏꦁꦊꦥꦠ꧀꧈ꦭꦗꦼꦁꦢꦶꦥꦸꦤ꧀ꦱꦽꦔꦼꦤ꧀ꦤꦶ꧈ꦤꦔꦶꦁꦭꦗꦼꦁꦏꦱꦸꦭꦁꦱꦸꦭꦁꦔꦏꦼꦤ꧀꧈ꦠꦶꦤ꧀ꦢꦏ꧀ꦏꦶꦥꦸꦤ꧀ꦠꦸꦩꦼꦩꦼꦤ꧀꧈ꦤꦭꦶꦏꦱꦊꦧꦼꦠ꧀ꦠꦶꦥꦸꦤ꧀ꦚꦼꦥꦼꦁꦏꦒꦸꦁꦔꦤ꧀ꦢꦊꦩ꧀ꦲꦂꦠꦮꦶꦭꦸꦗꦼꦁ꧇ꦱꦽꦒꦼꦥ꧀꧈ꦱꦊꦧꦼꦠ꧀ꦠꦶꦥꦸꦤ꧀ꦏꦸꦭꦢꦢꦺꦴꦱ꧀ꦥꦔꦒꦼꦁꦥꦫꦺꦤ꧀ꦠꦃꦏꦫꦠꦺꦴꦤ꧀ꦭꦩꦶꦤꦶꦥꦸꦤ꧀꧇꧇꧑꧐꧇ꦠꦲꦸꦤ꧀꧈ꦥꦿꦱꦱꦠ꧀ꦧꦺꦴꦠꦼꦤ꧀ꦤꦠꦺꦥꦩꦶꦠ꧀꧈ꦱꦤꦢꦾꦤ꧀ꦒꦝꦃꦥꦂꦭꦸꦥꦶꦪꦩ꧀ꦧꦏ꧀ꦲꦸꦠꦮꦶꦱꦏꦶꦠ꧀ꦱꦮꦠꦮꦶꦱ꧀ꦲꦶꦁꦒꦶꦃꦩꦼꦏ꧀ꦱꦱꦺꦴꦮꦤ꧀꧉ꦮꦼꦏꦼꦭ꧀ꦲꦗꦼꦁꦝꦠꦼꦁꦥꦤ꧀ꦢꦩꦼꦭ꧀ꦭꦤ꧀꧈ꦧꦺꦴꦠꦼꦤ꧀ꦏꦺꦠꦁꦉꦏꦲꦺꦴꦱ꧀ꦢꦶꦥꦸꦤ꧀ꦭꦩ꧀ꦥꦃꦲꦶꦏꦤ꧀ꦛꦶꦠꦸꦩꦼꦩꦼꦤ꧀꧈ꦧꦺꦴꦠꦼꦤ꧀ꦤꦠꦺꦔꦼꦱꦃ꧈ꦩꦤꦃꦲꦶꦥꦸꦤ꧀ꦭꦶꦩꦿꦃ꧈ꦱꦂꦠꦮꦼꦭꦱ꧀ꦱꦤ꧀꧉ꦱꦫꦺꦃꦤꦶꦁꦲꦁꦒꦺꦤ꧀ꦤꦶꦁꦱꦸꦮꦶꦠꦮꦶꦮꦶꦠ꧀ꦥꦤꦏꦮꦤ꧀꧈ꦢꦢꦺꦴꦱ꧀ꦱꦩ꧀ꦥꦸꦤ꧀ꦤꦠꦺꦲꦔꦿꦲꦺꦴꦱ꧀ꦱꦏꦼꦤ꧀ꦮꦗꦶꦧ꧀ꦱꦢꦪꦥꦤ꧀ꦢꦩꦼꦭ꧀ꦭꦤ꧀꧈ꦮꦶꦮꦶꦠ꧀ꦥꦁꦏꦠ꧀ꦲꦭꦶꦠ꧀ꦔꦤ꧀ꦠꦺꦴꦱ꧀ꦥꦁꦏꦠ꧀ꦲꦒꦼꦁ꧈ꦢꦢꦺꦴꦱ꧀ꦱꦢꦪꦥꦤ꧀ꦢꦩꦼꦭ꧀ꦭꦤ꧀ꦠꦸꦩꦿꦥ꧀ꦝꦠꦼꦁꦏꦭꦺꦫꦺꦃꦲꦤ꧀ꦤꦶꦥꦸꦤ꧀ꦱꦒꦼꦢ꧀ꦢꦸꦩꦸꦒꦶꦥꦿꦪꦺꦴꦒꦶ꧉ꦩꦶꦭꦱꦠꦶꦭꦂꦫꦶꦥꦸꦤ꧀ꦢꦺꦴꦚꦫꦢꦺꦤ꧀ꦠꦸꦩꦼꦁꦒꦸꦁꦄꦠ꧀ꦩꦢꦶꦤꦶꦔꦿꦠ꧀꧈ꦏꦸꦭꦱꦂꦠꦱꦏꦭꦺꦫꦺꦃꦲꦤ꧀ꦤꦶꦥꦸꦤ꧀ꦱꦢꦪꦥꦿꦱꦱꦠ꧀ꦏꦢꦺꦴꦱ꧀ꦢꦺꦤꦺꦏꦺꦕꦭ꧀ꦭꦤ꧀ꦠꦶꦪꦁꦱꦼꦥꦸꦃꦲꦶꦥꦸꦤ꧀꧉
꧋ꦫꦢꦺꦤ꧀ꦠꦸꦩꦼꦁꦒꦸꦁꦄꦠ꧀ꦩꦢꦶꦤꦶꦔꦠ꧀꧈ꦢꦶꦤꦲꦶꦏꦶꦥꦸꦁꦏꦱ꧀ꦱꦤ꧀ꦤꦺꦭꦭꦏꦺꦴꦤ꧀ꦥꦏꦼꦤꦶꦫꦲꦤꦲꦶꦁꦢꦺꦴꦚ꧈ꦲꦸꦫꦶꦥ꧀ꦥꦏꦼꦤꦶꦫꦮꦶꦱ꧀ꦲꦤꦶꦤ꧀ꦢꦏ꧀ꦏꦏꦺꦲꦥꦧꦼꦤꦼꦫꦺ꧈ꦲꦤꦶꦁꦒꦭ꧀ꦭꦭꦧꦸꦃꦲꦤ꧀ꦱꦂꦠꦏꦧꦼꦕꦶꦏ꧀ꦏꦤ꧀꧈ꦩꦸꦁꦒꦸꦃꦥꦱꦸꦮꦶꦠ꧀ꦠꦤ꧀ꦥꦏꦼꦤꦶꦫꦱꦂꦠꦏꦧꦼꦕꦶꦏ꧀ꦏꦤ꧀ꦥꦏꦼꦤꦶꦫꦧꦏꦭ꧀ꦢꦢꦶꦥꦺꦔꦼꦠ꧀ꦠꦤ꧀ꦤꦺꦏꦫꦠꦺꦴꦤ꧀꧈ꦲꦥꦩꦤꦺꦃꦩꦤꦶꦫꦱꦂꦠꦠꦸꦩꦿꦥ꧀ꦏꦺꦴꦚ꧀ꦕꦏꦺꦴꦚ꧀ꦕ꧈ꦥꦩꦶꦠꦿꦤ꧀ꦥꦏꦼꦤꦶꦫ꧈ꦩꦼꦱ꧀ꦛꦶꦧꦏꦭ꧀ꦲꦺꦭꦶꦁꦩꦫꦁꦏꦧꦼꦕꦶꦏ꧀ꦏꦤ꧀ꦥꦏꦼꦤꦶꦫ꧈ꦱꦲꦶꦏꦶꦥꦏꦼꦤꦶꦫꦮꦶꦱ꧀ꦩꦸꦭꦶꦃꦩꦫꦁꦏꦭꦁꦒꦼꦁꦔꦤ꧀꧈ꦩꦸꦒꦫꦺꦴꦃꦥꦏꦼꦤꦶꦫꦠꦶꦤꦩ꧀ꦥꦤ꧀ꦲꦶꦁꦔꦪꦸꦤ꧀ꦤꦤꦶꦁꦦꦔꦺꦫꦤ꧀ꦱꦂꦠꦗꦶꦤꦼꦩ꧀ꦧꦂꦤꦲꦶꦁꦏꦸꦧꦸꦂꦥꦏꦼꦤꦶꦫ꧉
ꦆꦤ꧀ꦤꦭ꧀ꦭꦶꦭꦲꦶꦮꦆꦤ꧀ꦤꦆꦭꦆꦲꦶꦫꦗꦶꦲꦸꦤ꧀꧈
