FEUILLETON
꧋ꦭꦭꦩ꧀ꦥꦃꦲꦤ꧀ꦤꦶꦥꦸꦤ꧀ꦦꦿꦧꦸ Tristan ꦭꦤ꧀ꦥꦸꦠꦿꦶ Isolde.
꧇꧑꧘꧇
꧋ꦏꦕꦫꦶꦪꦺꦴꦱ꧀꧈ꦏꦭꦱꦩꦤ꧀ꦠꦼꦤ꧀ꦩꦶꦮꦶꦠ꧀ꦠꦶꦩꦺꦴꦁꦱꦲꦱꦽꦥ꧀꧉ꦦꦿꦧꦸ Tristan꧈ꦯꦁꦥꦸꦠꦿꦶꦠꦸꦮꦶꦤ꧀ Corneval ꦱꦩꦶꦩꦁꦒꦺꦤ꧀ꦲꦶꦁꦱꦊꦧꦼꦠ꧀ꦠꦶꦁꦒꦸꦮ꧈ꦩꦂꦒꦶꦲꦶꦁꦗꦮꦶꦲꦱꦽꦥ꧀ꦱꦔꦼꦠ꧀꧉ꦫꦺꦴꦤꦿꦺꦴꦤ꧀ꦤꦤ꧀ꦲꦶꦁꦏꦁꦏꦁꦒꦺꦭꦺꦩꦺꦏ꧀ꦏꦶꦁꦥꦠꦶꦊꦩ꧀ꦩꦤ꧀ꦤꦶꦥꦸꦤ꧀ꦲꦶꦁꦒꦶꦃꦱꦩꦶꦲꦱꦽꦥ꧀ꦱꦔꦼꦠ꧀ꦏꦢꦺꦴꦱ꧀ꦲꦺꦱ꧀꧈ꦤꦔꦶꦁꦱꦏꦶꦁꦒꦼꦁꦔꦶꦁꦏꦠꦽꦱ꧀ꦤꦤ꧀ꦤꦶꦥꦸꦤ꧀ꦔꦤ꧀ꦠꦺꦴꦱ꧀ꦧꦺꦴꦠꦼꦤ꧀ꦲꦔꦿꦲꦺꦴꦱ꧀ꦱꦏꦼꦤ꧀ꦏꦱꦁꦱꦫꦤ꧀ꦤꦶꦁꦒꦼꦱꦁꦔꦶꦥꦸꦤ꧀ꦮꦲꦸ꧉ꦱꦉꦁꦱꦩ꧀ꦥꦸꦤ꧀ꦩꦶꦮꦶꦠ꧀ꦠꦶꦩꦺꦴꦁꦱꦧꦼꦤ꧀ꦠꦺꦂꦩꦭꦶꦃ꧈ꦦꦿꦧꦸ Tristan ꦭꦗꦼꦁꦲꦢꦩꦼꦭ꧀ꦒꦿꦶꦪꦲꦭꦶꦠ꧀꧈ꦮꦺꦴꦤ꧀ꦠꦼꦤ꧀ꦲꦶꦁꦱꦔꦤ꧀ꦝꦥ꧀ꦥꦶꦁꦏꦗꦼꦁꦲꦒꦼꦁ꧉ꦢꦺꦤꦺꦲꦶꦁꦏꦁꦏꦢꦩꦼꦭ꧀ꦲꦶꦁꦒꦶꦃꦥꦁꦥꦁꦔꦶꦁꦏꦏꦗꦼꦁꦔꦤ꧀ꦲꦶꦁꦮꦤꦔꦿꦶꦏꦸ꧉ꦏꦭꦠꦶꦩꦸꦂꦫꦶꦥꦸꦤ꧀ꦦꦿꦧꦸ Tristan ꦱꦒꦼꦢ꧀ꦲꦤꦶꦫꦺꦴꦑꦏꦼꦤ꧀ꦲꦸꦔꦼꦭ꧀ꦭꦶꦁꦥꦼꦏ꧀ꦱꦶꦥꦼꦏ꧀ꦱꦶꦲꦶꦁꦮꦤ꧉ꦥꦿꦩꦶꦭꦲꦶꦁꦱꦩꦺꦴꦁꦱꦩꦺꦴꦁꦱꦩꦤꦮꦶꦥꦶꦤꦸꦗꦸꦱꦩꦶꦮꦺꦴꦤ꧀ꦠꦼꦤ꧀ꦲꦶꦁꦒꦿꦶꦪ꧈ꦦꦿꦧꦸ Tristan ꦭꦗꦼꦁꦲꦚꦸꦮꦫꦏꦢꦺꦴꦱ꧀ꦥꦼꦏ꧀ꦱꦶꦥꦼꦏ꧀ꦱꦶꦲꦶꦁꦮꦤꦔꦿꦶꦏꦸ꧉ꦧꦺꦴꦠꦼꦤ꧀ꦲꦤ꧀ꦠꦮꦶꦱ꧀ꦢꦔꦸꦥꦼꦏ꧀ꦱꦶꦥꦼꦏ꧀ꦱꦶꦲꦶꦁꦏꦁꦩꦶꦉꦁꦱ꧀ꦮꦫꦤꦶꦥꦸꦤ꧀ꦦꦿꦧꦸ Tristan ꦲꦶꦁꦒꦶꦃꦝꦠꦼꦁ꧈ꦱꦩꦶꦩꦺꦚ꧀ꦕꦺꦴꦏ꧀ꦲꦶꦁꦒꦿꦶꦪꦮꦲꦸ꧈ꦱ꧀ꦮꦫꦤꦶꦥꦸꦤ꧀ꦫꦩꦺꦱꦔꦼꦠ꧀꧈ꦱꦏꦺꦕꦏꦥꦶꦉꦁꦔꦏꦼꦤ꧀꧉ꦮꦶꦮꦶꦠ꧀ꦏꦭꦱꦩꦤ꧀ꦠꦼꦤ꧀ꦦꦿꦧꦸ Tristan ꦱꦏꦚ꧀ꦕꦤꦶꦥꦸꦤ꧀ꦧꦺꦴꦠꦼꦤ꧀ꦥꦶꦤ꧀ꦝꦃꦥꦶꦤ꧀ꦝꦃꦥꦁꦒꦺꦤ꧀ꦤꦤ꧀ꦏꦢꦺꦴꦱ꧀ꦲꦶꦁꦏꦁꦱꦩ꧀ꦥꦸꦤ꧀ꦱꦩ꧀ꦥꦸꦤ꧀꧈ꦲꦮꦶꦠ꧀ꦥꦫꦧꦫꦺꦴꦤ꧀ꦠꦸꦮꦶꦤ꧀ꦥꦫꦱꦠꦿꦶꦪꦲꦶꦁ Cornwallis ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦁꦮꦤꦶꦲꦔꦸꦥꦢꦺꦴꦱ꧀ꦱꦶꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦝꦠꦼꦁꦱꦊꦧꦼꦠ꧀ꦠꦶꦁꦮꦤꦔꦿꦶꦏꦸ꧉
꧋ꦲꦤꦸꦗꦸꦲꦶꦁꦱꦠꦸꦁꦒꦶꦭ꧀ꦭꦶꦁꦢꦶꦤ꧀ꦠꦼꦤ꧀꧈ꦧꦫꦺꦴꦤ꧀ Guenelon ꦩꦼꦁꦱꦃꦲꦶꦥꦸꦤ꧀ꦦꦿꦧꦸ Tristan ꦲꦶꦁꦏꦁꦒꦼꦛꦶꦁꦱꦔꦼꦠ꧀ꦱꦲꦲꦮꦺꦴꦤ꧀ꦱꦔꦼꦠ꧀ꦩꦤꦃꦲꦶꦥꦸꦤ꧀ꦮꦲꦸ꧈ꦏꦭꦶꦪꦤ꧀ꦏꦺꦴꦚ꧀ꦕꦏꦚ꧀ꦕꦤꦶꦥꦸꦤ꧀ꦲꦩ꧀ꦧꦼꦧꦸꦗꦼꦁꦝꦠꦼꦁꦱꦥꦶꦁꦒꦶꦂꦫꦶꦁꦮꦤꦲꦶꦁ Morois꧉ꦏꦭꦱꦩꦤ꧀ꦠꦼꦤ꧀ Corneval ꦲꦶꦁꦒꦶꦃꦥꦶꦤꦸꦗꦸꦊꦭꦺꦝꦁꦮꦺꦴꦤ꧀ꦠꦼꦤ꧀ꦱꦥꦶꦁꦒꦶꦂꦫꦶꦁꦭꦺꦥꦺꦤ꧀꧈ꦧꦺꦴꦠꦼꦤ꧀ꦠꦼꦧꦶꦃꦱꦏꦶꦁꦥꦁꦒꦺꦤ꧀ꦤꦤ꧀ꦲꦁꦒꦺꦤ꧀ꦤꦶꦁꦲꦩ꧀ꦧꦼꦧꦸꦗꦼꦁꦧꦫꦺꦴꦤ꧀ Guenelon꧉ꦲꦧꦃꦲꦧꦃꦲꦤ꧀ꦤꦶꦁꦏꦥꦭ꧀ꦭꦶꦥꦸꦤ꧀ꦢꦶꦥꦸꦤ꧀ꦫꦸꦕꦠ꧀ꦠꦶ꧈ꦱꦂꦠꦭꦗꦼꦁꦢꦶꦥꦸꦤ꧀ꦕꦸꦭ꧀ꦭꦏꦼꦤ꧀ꦲꦶꦁꦔꦿꦶꦏꦸ꧈ꦲꦩꦂꦒꦶꦏꦛꦃꦫꦸꦩ꧀ꦥꦸꦠ꧀ꦠꦶꦥꦸꦤ꧀ꦊꦩꦊꦩ꧉ꦢꦺꦤꦺꦦꦿꦧꦸ Tristan ꦭꦤ꧀ꦱꦁꦥꦸꦠꦿꦶꦱꦩꦶꦏꦤ꧀ꦠꦸꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦒꦿꦶꦪ꧉ꦱꦩꦶꦲꦔꦺꦕꦲꦺꦕꦠꦶꦊꦩ꧀꧉ꦧꦺꦴꦠꦼꦤ꧀ꦲꦤ꧀ꦠꦮꦶꦱ꧀ꦢꦔꦸ Corneval ꦩꦶꦉꦁꦗꦸꦒꦸꦒ꧀ꦒꦶꦥꦸꦤ꧀ꦱꦒꦮꦺꦴꦤ꧀ꦥꦩ꧀ꦧꦸꦗꦼꦁꦔꦤ꧀꧉ꦱꦏꦶꦁꦏꦠꦼꦧꦶꦃꦲꦤ꧀ꦏꦠꦶꦔꦭ꧀ꦮꦺꦴꦤ꧀ꦠꦼꦤ꧀ꦱꦁꦱꦩ꧀ꦏꦲꦺꦴꦪꦏ꧀ꦲꦶꦁꦱꦒꦮꦺꦴꦤ꧀ꦏꦛꦃ꧉ꦱꦁꦱꦩ꧀ꦭꦗꦼꦁꦲꦚ꧀ꦗꦼꦒꦸꦂꦲꦶꦁꦭꦺꦥꦺꦤ꧀ꦲꦸꦫꦸꦠ꧀ꦠꦶꦥꦸꦤ꧀ꦥꦁꦒꦺꦤ꧀ꦤꦤ꧀ꦤꦶꦁꦊꦭꦺꦝꦁ Corneval ꦮꦲꦸ꧉ꦧꦺꦴꦠꦼꦤ꧀ꦲꦤ꧀ꦠꦮꦶꦱ꧀ꦢꦔꦸꦩꦭꦶꦃꦱꦏꦶꦁꦲꦶꦁꦲꦫꦲꦫꦮꦺꦴꦤ꧀ꦠꦼꦤ꧀ꦒꦼꦂꦩꦱꦠꦸꦁꦒꦭ꧀ꦤꦸꦩ꧀ꦥꦏ꧀ꦏꦥꦭ꧀꧈ꦲꦔꦼꦠꦸꦠ꧀ꦭꦩ꧀ꦥꦃꦲꦶꦁꦱꦒꦮꦺꦴꦤ꧀ꦱꦒꦮꦺꦴꦤ꧀ꦥꦸꦤꦶꦏ꧉ꦢꦔꦸꦢꦔꦸꦠꦼꦠꦺꦭꦧꦶꦭꦶꦃꦒꦼꦂꦩꦲꦶꦁꦏꦁꦠꦤ꧀ꦥꦫꦺꦚ꧀ꦕꦁꦮꦲꦸꦧꦫꦺꦴꦤ꧀ Guenelon ꦩꦼꦁꦱꦃꦲꦶꦥꦸꦤ꧀ꦦꦿꦧꦸ Tristan꧉ Corneval ꦤꦸꦤ꧀ꦠꦼꦤ꧀ꦱꦶꦱꦶꦔꦶꦢ꧀ꦢꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦱꦮꦶꦁꦏꦶꦁꦔꦶꦁꦏꦗꦼꦁꦲꦒꦼꦁ꧈ꦱꦂꦠꦲꦔ꧀ꦭꦶꦒꦥꦼꦝꦁꦔꦶꦥꦸꦤ꧀꧉ꦱꦫꦺꦃꦤꦶꦁꦏꦥꦭ꧀ꦭꦶꦥꦸꦤ꧀ꦏꦱꦤ꧀ꦢꦼꦂꦫꦏꦼꦤ꧀ꦧꦺꦴꦠꦼꦤ꧀ꦲꦤ꧀ꦠꦮꦶꦱ꧀ꦢꦔꦸꦧꦫꦺꦴꦤ꧀ Guenelon ꦢꦸꦩꦸꦒꦶꦲꦶꦁꦱꦊꦧꦼꦠ꧀ꦠꦶꦁꦮꦤ꧉ꦏꦥꦭ꧀ꦭꦶꦥꦸꦤ꧀ꦲꦚꦺꦴꦏ꧀ꦭꦁꦔ꧀ꦭꦁꦏꦸꦁꦔꦶꦥꦁꦒꦺꦤ꧀ꦤꦤ꧀ꦤꦶꦥꦸꦤ꧀ꦱꦶꦱꦶꦔꦶꦢ꧀ꦢꦤ꧀ Corneval꧉ꦲꦶꦁꦏꦁꦱꦶꦱꦶꦔꦶꦢ꧀ꦢꦤ꧀ꦲꦺꦁꦒꦭ꧀ꦭꦸꦩꦸꦩ꧀ꦥꦠ꧀ꦲꦚꦏꦼꦠ꧀ꦠꦶꦱꦂꦠꦲꦚꦤ꧀ꦝꦏ꧀ꦏꦤ꧀ꦝꦭ꧀ꦭꦶꦤ꧀ꦤꦶꦁꦏꦥꦭ꧀ꦮꦲꦸ꧈ꦱꦂꦠꦲꦺꦁꦒꦭ꧀ꦲꦤꦩꦑꦏꦼꦤ꧀ꦥꦼꦝꦁꦔꦶꦥꦸꦤ꧀ꦝꦠꦼꦁꦲꦶꦁꦏꦁꦤꦸꦩ꧀ꦥꦏ꧀ꦏꦶ Guenelon ꦥꦼꦗꦃꦏꦥꦶꦱꦤ꧀ꦤꦤ꧀꧈ꦭꦪꦺꦴꦤ꧀ꦤꦶꦥꦸꦤ꧀ꦒꦸꦩꦭꦺꦛꦏ꧀ꦲꦶꦁꦱꦶꦠꦶ꧉ꦱꦶꦫꦃꦲꦶꦥꦸꦤ꧀ꦭꦗꦼꦁꦢꦶꦥꦸꦤ꧀ꦥꦺꦴꦕꦺꦴꦏ꧀ꦢꦺꦤꦶꦁꦯꦁ Corneval꧈ꦏꦧꦼꦏ꧀ꦠꦩꦤ꧀ꦠꦸꦏ꧀ꦝꦠꦼꦁꦱꦠꦼꦔꦃꦲꦶꦁꦮꦤꦏꦁꦒꦺꦲꦁꦱꦭ꧀ꦲꦔꦭ꧀꧉ꦱꦢꦸꦩꦸꦒꦶꦤꦶꦥꦸꦤ꧀ꦲꦶꦁꦒꦿꦶꦪ꧈ꦦꦿꦧꦸ Tristan ꦭꦤ꧀ꦱꦁꦥꦸꦠꦿꦶꦱꦮꦼꦒ꧀ꦱꦫꦺ꧉ Corneval ꦭꦸꦩꦼꦧꦼꦠ꧀ꦲꦶꦁꦒꦿꦶꦪꦲꦭꦺꦴꦤ꧀ꦭꦺꦴꦤ꧀ꦤꦤ꧀꧉ꦱꦶꦫꦃꦲꦶꦥꦸꦤ꧀ꦧꦫꦺꦴꦤ꧀ Guenelon ꦭꦗꦼꦁꦢꦶꦥꦸꦤ꧀ꦒꦤ꧀ꦝꦸꦭ꧀ꦭꦏꦼꦤ꧀ꦲꦶꦁꦱꦭꦃꦱꦠꦸꦁꦒꦶꦭ꧀ꦭꦶꦁꦱꦏꦒꦿꦶꦪ꧈ꦏꦶꦤꦸꦧꦼꦁꦲꦶꦁꦫꦺꦴꦤꦿꦺꦴꦤ꧀ꦤꦤ꧀ꦩꦶꦤꦺꦴꦁꦏꦒꦸꦒꦸꦧꦃꦲꦤ꧀ꦤꦶꦥꦸꦤ꧀ꦱꦼꦏꦂ꧈ꦢꦺꦤꦺꦥꦶꦏꦗꦼꦁꦔꦶꦥꦸꦤ꧀ꦲꦢꦩꦼꦭ꧀ꦧꦶꦔꦃꦩꦤꦃꦲꦶꦁꦧꦼꦤ꧀ꦢꦫꦤꦶꦥꦸꦤ꧀ꦮꦲꦸ꧉ꦱꦉꦁꦦꦿꦧꦸ Tristan ꦮꦸꦔꦸꦏꦒꦺꦠ꧀ꦱꦔꦼꦠ꧀ꦲꦩꦿꦶꦏ꧀ꦱꦤ꧀ꦤꦶꦱꦶꦫꦃꦲꦶꦁꦩꦼꦁꦱꦃꦲꦶꦥꦸꦤ꧀꧈ꦲꦺꦁꦒꦭ꧀ꦩꦼꦚꦠ꧀ꦱꦏꦶꦁꦲꦶꦁꦥꦱꦫꦺꦪꦤ꧀ꦤꦶꦥꦸꦤ꧀꧉ Corneval ꦤꦸꦤ꧀ꦠꦼꦤ꧀ꦩꦠꦸꦂ꧇ꦞꦸꦃ꧈ꦱꦠꦿꦶꦪ꧈ꦩꦸꦒꦶꦱꦩ꧀ꦥꦸꦤ꧀ꦏꦸꦮꦠꦺꦴꦱ꧀꧈ Guenelon ꦱꦩ꧀ꦥꦸꦤ꧀ꦥꦺꦗꦃ꧈ꦏꦠꦩꦤ꧀ꦲꦶꦁꦥꦼꦝꦁꦏꦸꦭ꧈ꦮꦺꦴꦤ꧀ꦠꦼꦤ꧀ꦲꦶꦁꦱꦥꦶꦁꦒꦶꦂꦫꦶꦁꦮꦤꦥꦸꦤꦶꦏ꧉
꧋ꦏꦕꦫꦶꦪꦺꦴꦱ꧀ꦥꦫꦒꦼꦂꦩꦏꦺꦴꦚ꧀ꦕꦏꦚ꧀ꦕꦤꦶꦥꦸꦤ꧀ꦧꦫꦺꦴꦤ꧀ Guenelon ꦱꦉꦁꦱꦸꦩꦼꦉꦥ꧀ꦒꦼꦩ꧀ꦧꦸꦁꦔꦶꦁꦧꦫꦺꦴꦤ꧀ Guenelon ꦒꦸꦩꦭꦺꦛꦺꦏ꧀ꦮꦺꦴꦤ꧀ꦠꦼꦤ꧀ꦲꦶꦁꦱꦔꦤ꧀ꦝꦥ꧀ꦥꦶꦁꦏꦗꦼꦁꦲꦒꦼꦁ꧈ꦲꦺꦁꦒꦭ꧀ꦱꦩꦶꦭꦸꦩꦗꦼꦁꦮꦁꦱꦸꦭ꧀ꦝꦠꦼꦁꦲꦶꦁꦏꦶꦛ꧈ꦩꦂꦒꦶꦱꦩꦶꦲꦗꦿꦶꦃ꧉ꦫꦸꦩꦲꦺꦴꦱ꧀ꦱꦶꦥꦸꦤ꧀ꦧꦶꦤꦸꦗꦼꦁꦲꦶꦁꦦꦿꦧꦸ Tristan꧉ꦮꦶꦮꦶꦠ꧀ꦥꦸꦤꦶꦏꦠꦶꦠꦶꦪꦁꦲꦶꦁ Cornwallis ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦁꦮꦤꦶꦲꦩ꧀ꦧꦼꦧꦸꦗꦼꦁꦝꦠꦼꦁꦲꦶꦁꦮꦤ Morois꧈ꦥꦿꦩꦶꦭꦮꦤꦮꦲꦸꦥꦿꦱꦱꦠ꧀ꦏꦮꦼꦁꦏꦸꦢꦺꦤꦶꦁꦦꦿꦧꦸ Tristan ꦥꦶꦪꦩ꧀ꦧꦏ꧀꧉ꦦꦿꦧꦸ Tristan ꦏꦒꦸꦁꦔꦤ꧀ꦗꦼꦩ꧀ꦥꦂꦫꦶꦁꦪꦱꦤꦶꦥꦸꦤ꧀ꦥꦶꦪꦩ꧀ꦧꦏ꧀꧈ꦏꦤꦩꦑꦏꦼꦤ꧀ꦏꦾꦲꦶꦯꦶꦥꦠ꧀ꦏꦼꦤ꧈ꦩꦂꦒꦶꦩꦤꦮꦶꦏꦁꦒꦺꦲꦚ꧀ꦗꦼꦩ꧀ꦥꦂꦫꦶꦁꦥꦸꦤꦥꦏꦺꦩꦮꦺꦴꦤ꧀꧈ꦏꦺꦮꦤ꧀ꦲꦸꦠꦮꦶꦠꦶꦪꦁꦱꦩ꧀ꦥꦸꦤ꧀ꦠꦩ꧀ꦠꦸꦏꦺꦔꦶꦁꦔꦶꦥꦸꦤ꧀꧉ꦏꦭꦱꦩꦤ꧀ꦠꦼꦤ꧀ꦥꦶꦤꦸꦗꦸꦩꦺꦴꦁꦱꦧꦼꦤ꧀ꦠꦺꦂ꧈ꦲꦤꦸꦗꦸꦱꦠꦸꦁꦒꦶꦭ꧀ꦭꦶꦁꦢꦶꦤ꧀ꦠꦼꦤ꧀ꦦꦿꦧꦸ Tristan ꦏꦺꦱꦃꦲꦩ꧀ꦧꦼꦧꦸꦗꦼꦁꦥꦶꦪꦩ꧀ꦧꦏ꧀ꦏꦤ꧀꧈ꦲꦔꦱ꧀ꦠꦗꦼꦩ꧀ꦥꦂꦫꦶꦁꦏꦾꦲꦶꦯꦶꦥꦠ꧀ꦏꦼꦤ꧈ꦱꦲꦲꦔꦁꦒꦂꦥꦼꦝꦁꦔꦶꦥꦸꦤ꧀꧉ꦲꦶꦁꦢꦶꦤ꧀ꦠꦼꦤ꧀ꦥꦸꦤꦶꦏꦧꦝꦺꦮꦺꦴꦤ꧀ꦠꦼꦤ꧀ꦭꦭꦩ꧀ꦥꦃꦲꦤ꧀ꦲꦶꦁꦏꦁꦲꦚ꧀ꦗꦭꦂꦫꦶꦱꦸꦱꦃꦲꦶꦁꦩꦤꦃꦲꦶꦥꦸꦤ꧀ꦲꦶꦁꦏꦁꦱꦩꦶꦠꦤ꧀ꦱꦃꦱꦶꦃꦱꦶꦤꦶꦱꦶꦃꦲꦤ꧀꧉ꦎ꧈ꦥꦫꦩꦲꦺꦴꦱ꧀ꦱꦪꦏ꧀ꦠꦺꦴꦱ꧀ꦱꦶꦥꦸꦤ꧀ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦠꦶꦪꦁꦏꦱꦁꦱꦂꦫꦤ꧀ꦏꦢꦺꦴꦱ꧀ꦦꦿꦧꦸ Tristan ꦭꦤ꧀ꦱꦁꦥꦸꦠꦿꦶ Isolde ꦥꦸꦤꦶꦏ꧈ꦗꦭꦂꦫꦤ꧀ꦱꦏꦶꦁꦲꦁꦒꦺꦤ꧀ꦤꦶꦥꦸꦤ꧀ꦱꦩꦶꦲꦔ꧀ꦭꦧꦼꦠ꧀ꦠꦶꦏꦠꦽꦱ꧀ꦤꦤ꧀꧉ꦲꦶꦁꦮꦚ꧀ꦕꦶꦱꦶꦪꦁꦱꦉꦁꦦꦿꦧꦸ Tristan ꦮꦁꦱꦸꦭ꧀ꦱꦏꦶꦁꦲꦁꦒꦺꦤ꧀ꦤꦶꦥꦸꦤ꧀ꦲꦩ꧀ꦧꦼꦧꦸꦗꦼꦁ꧈ꦏꦥꦥꦒ꧀ꦒꦏꦼꦤ꧀ꦢꦺꦤꦶꦁꦯꦁꦥꦸꦠꦿꦶ Isolde ꦏꦢꦺꦴꦱ꧀ꦲꦶꦁꦏꦁꦱꦩ꧀ꦥꦸꦤ꧀ꦱꦩ꧀ꦥꦸꦤ꧀꧉
꧋ꦥꦔꦤ꧀ꦢꦶꦏꦤ꧀ꦤꦶꦥꦸꦤ꧀ꦱꦁꦥꦸꦠꦿꦶ꧇ꦞꦸꦃ꧈ꦩꦶꦠꦿ꧈ꦱꦩ꧀ꦥꦺꦪꦤ꧀ꦱꦏꦶꦁꦥꦸꦤ꧀ꦢꦶ꧈ꦢꦺꦤꦺꦏꦠꦶꦔꦭ꧀ꦱꦪꦃꦱꦔꦼꦠ꧀꧉
꧋ꦦꦿꦧꦸ Tristan ꦲꦩꦁꦱꦸꦭ꧀ꦭꦶ꧇ꦏꦸꦭꦱꦏꦶꦁꦏꦺꦱꦃꦲꦩ꧀ꦧꦼꦧꦸꦗꦼꦁꦱꦁꦱꦩ꧀꧈ꦤꦔꦶꦁꦱꦁꦱꦩ꧀ꦮꦲꦸꦱꦏꦭꦁꦏꦸꦁꦏꦼꦱꦶꦠ꧀꧉ꦧꦢꦤ꧀ꦏꦸꦭꦏꦫꦲꦺꦴꦱ꧀ꦱꦪꦃꦱꦔꦼꦠ꧀꧈ꦥꦿꦩꦶꦭꦏꦸꦭꦏꦼꦥꦺꦔꦶꦤ꧀ꦠꦶꦊꦩ꧀꧉
꧋ꦏꦭꦶꦃꦏꦭꦶꦃꦲꦶꦥꦸꦤ꧀ꦱꦩꦶꦭꦸꦩꦼꦧꦼꦠ꧀ꦲꦶꦁꦒꦿꦶꦪ꧈ꦤꦸꦤ꧀ꦠꦼꦤ꧀ꦩꦥꦤ꧀ꦠꦶꦊꦩ꧀꧈ꦠꦤ꧀ꦥꦲꦕꦸꦕꦸꦭ꧀ꦥꦔꦁꦒꦺ꧉ꦲꦁꦒꦺꦤ꧀ꦤꦶꦥꦸꦤ꧀ꦠꦶꦊꦩ꧀ꦗꦺꦗꦺꦂ꧈ꦏꦲꦼꦊꦠ꧀ꦠꦤ꧀ꦲꦶꦁ
