꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈ꦧꦶꦭꦶꦃꦲꦁꦱꦭ꧀ꦲꦁꦱꦭ꧀ꦭꦤ꧀ꦤꦶꦁꦥꦱꦂꦒꦩ꧀ꦧꦶꦂꦲꦶꦁꦨꦠꦮꦶꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏ꧈ꦏꦶꦫꦁꦭꦁꦏꦸꦁꦮꦺꦴꦤ꧀ꦠꦼꦤ꧀ f 99.800꧉ꦩꦤꦮꦶꦏꦱꦩꦺꦑꦏꦼꦤ꧀ꦏꦭꦶꦪꦤ꧀ꦲꦁꦱꦭ꧀ꦲꦁꦱꦭ꧀ꦭꦤ꧀ꦤꦶꦥꦸꦤ꧀ꦲꦶꦁꦠꦲꦸꦤ꧀ꦏꦥꦼꦁꦏꦼꦂ꧈ꦲꦁꦱꦭ꧀ꦲꦁꦱꦭ꧀ꦭꦤ꧀ꦤꦶꦥꦸꦤ꧀ꦏꦲꦺꦴꦠ꧀ f 1000,-꧉ꦏꦛꦃꦲꦶꦁꦠꦲꦸꦤ꧀ꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏ꧉
꧋ꦱꦏꦶꦁꦨꦤ꧀ꦝꦸꦁꦏꦮꦂꦠꦺꦴꦱꦏꦼꦤ꧀꧇ꦲꦁꦱꦭ꧀ꦲꦁꦱꦭ꧀ꦭꦤ꧀ꦤꦶꦥꦸꦤ꧀ꦥꦏꦂꦪꦤ꧀ S.S. ꦲꦶꦁꦮꦸꦭꦤ꧀ꦄꦒꦸꦱ꧀ꦠꦸꦱ꧀ꦠꦲꦸꦤ꧀ꦥꦸꦤꦶꦏ f 7.414.000.- ꦲꦶꦁꦮꦸꦭꦤ꧀ꦄꦒꦸꦱ꧀ꦠꦸꦱ꧀ꦲꦶꦁꦠꦲꦸꦤ꧀ꦲꦶꦁꦏꦁꦏꦥꦼꦁꦏꦼꦂ f 6.700.000.-꧉
꧋ꦏꦭꦠꦁꦒꦭ꧀ꦏꦥꦶꦁ 9 ꦱꦺꦥ꧀ꦠꦺꦩ꧀ꦧꦼꦂꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏꦱꦏꦶꦁꦯꦸꦫꦧꦪꦏꦮꦂꦠꦺꦴꦱ꧀ꦱꦏꦼꦤ꧀꧇ꦲꦺꦚ꧀ꦗꦶꦁꦥꦸꦤꦶꦏꦗꦩ꧀ 8 ꦲꦶꦁꦏꦁꦩꦶꦤꦸꦭꦾꦥꦢꦸꦏꦠꦸꦮꦤ꧀ Dr. Rabindranath Tagore ꦩꦤ꧀ꦝꦥ꧀ꦱꦏꦶꦁꦏꦥꦭ꧀ Van Neek ꦮꦺꦴꦤ꧀ꦠꦼꦤ꧀ꦲꦶꦁꦥꦭꦧꦸꦃꦲꦤ꧀ꦯꦸꦫꦧꦪ꧈ꦏꦥꦼꦛꦸꦏ꧀ꦢꦺꦤꦶꦁꦠꦶꦠꦶꦪꦁꦲꦶꦤ꧀ꦝꦸꦏꦶꦫꦁꦭꦁꦏꦸꦁꦮꦺꦴꦤ꧀ꦠꦼꦤ꧀ꦠꦶꦪꦁ 50꧉ꦱꦭꦗꦼꦁꦔꦶꦥꦸꦤ꧀ꦤꦸꦤ꧀ꦠꦼꦤ꧀ꦠꦶꦤ꧀ꦢꦏ꧀ꦝꦠꦼꦁꦢꦊꦩ꧀ꦩꦁꦏꦸꦟꦒꦫꦤ꧀ꦲꦶꦁꦦꦭ꧀ꦩꦼꦤ꧀ꦱꦼꦠꦿꦠ꧀ꦏꦤ꧀ꦛꦶꦏꦝꦺꦫꦺꦏ꧀ꦏꦏꦼꦤ꧀ꦢꦺꦤꦶꦁꦠꦸꦮꦤ꧀ ꦯꦸꦪꦤ꧉ꦱꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦗꦩ꧀ 5 ꦏꦛꦃꦥꦫꦲꦶꦁꦏꦁꦱꦩꦶꦲꦩꦁꦒꦶꦃꦲꦶꦠꦸꦮꦤ꧀ Dr. Tagore ꦮꦲꦸ꧈ꦏꦶꦫꦁꦭꦁꦏꦸꦁꦮꦺꦴꦤ꧀ꦠꦼꦤ꧀ꦠꦶꦪꦁ 200꧉
꧋ꦏꦧꦂꦫꦶꦥꦸꦤ꧀ꦲꦶꦁꦏꦁꦩꦶꦤꦸꦭꦾꦠꦸꦮꦤ꧀ Prof. Dr. Tagore ꦠꦁꦒꦭ꧀ 15 ꦥꦸꦤꦶꦏꦠꦶꦤ꧀ꦢꦏ꧀ꦝꦠꦼꦁꦯꦸꦫꦏꦂꦠ꧈ꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦔꦤ꧀ꦠꦺꦴꦱ꧀ꦢꦸꦩꦸꦒꦶꦠꦁꦒꦭ꧀ 21 ꦱꦺꦥ꧀ꦠꦺꦩ꧀ꦧꦼꦂ꧉
꧋ꦗꦭꦂꦫꦤ꧀ꦱꦏꦶꦁꦥꦤꦸꦮꦸꦤ꧀ꦤꦤ꧀ꦤꦶꦥꦸꦤ꧀ꦥꦫꦠꦶꦠꦶꦪꦁꦲꦶꦤ꧀ꦝꦸꦲꦶꦁꦏꦁꦱꦩꦶꦢꦼꦢꦸꦤꦸꦁꦮꦺꦴꦤ꧀ꦠꦼꦤ꧀ꦲꦶꦁꦠꦤꦃꦲꦶꦤ꧀ꦢꦶꦪꦔꦿꦶꦏꦶ꧈ꦱꦸꦥꦢꦺꦴꦱ꧀ꦱꦭꦗꦼꦁꦔꦶꦥꦸꦤ꧀ꦱꦩ꧀ꦥꦸꦤ꧀ꦔꦤ꧀ꦠꦺꦴꦱ꧀ꦢꦶꦥꦸꦤ꧀ꦮꦱ꧀ꦠꦤ꧀ꦤꦶꦠꦶꦠꦶꦪꦁꦏꦼꦭꦶꦁ꧉ꦲꦩꦂꦒꦶꦤꦩꦮꦲꦸꦲꦔꦼꦩꦸꦫꦲꦺꦴꦱ꧀ꦲꦶꦁꦏꦁꦧꦺꦴꦠꦼꦤ꧀ꦚꦏꦺꦕꦑꦏꦼꦤ꧀ꦝꦠꦼꦁꦥꦶꦪꦩ꧀ꦧꦏ꧀ꦏꦶꦥꦸꦤ꧀꧈ꦲꦩꦶꦭꦦꦩꦫꦺꦤ꧀ꦠꦃꦭꦗꦼꦁꦲꦚꦼꦧꦂꦱꦼꦫꦠ꧀ꦲꦥꦫꦶꦁꦥꦿꦶꦏ꧀ꦱ꧈ꦩꦸꦫꦶꦃꦱꦭꦗꦼꦁꦔꦶꦥꦸꦤ꧀ꦲꦶꦁꦱꦼꦫꦠ꧀ꦱꦼꦫꦠ꧀ꦎꦥꦶꦱꦶꦭ꧀꧈ꦠꦶꦠꦶꦪꦁꦲꦶꦤ꧀ꦝꦸꦮꦲꦸꦏꦱꦼꦧꦸꦠ꧀ꦠ꧇ Voorlndiers꧉
꧋ꦩꦶꦠꦸꦫꦸꦠ꧀ꦱꦼꦫꦠ꧀ꦏꦏꦚ꧀ꦕꦶꦁꦔꦤ꧀ꦥꦿꦺꦱꦶꦝꦺꦤ꧀ꦥꦔꦢꦶꦭꦤ꧀ꦗꦸꦱ꧀ꦠꦶꦱꦶꦏꦭꦠꦁꦒꦭ꧀ 8 ꦱꦺꦥ꧀ꦠꦺꦩ꧀ꦧꦼꦂ꧈ꦏꦝꦮꦸꦃꦲꦏꦼꦤ꧀ꦱꦸꦥꦢꦺꦴꦱ꧀ꦠꦸꦮꦤ꧀ J. de Jeer ꦲꦶꦁꦏꦁꦏꦢꦏ꧀ꦮꦢꦢꦺꦴꦱ꧀ꦄꦢ꧀ꦥꦶꦱꦸꦂꦫꦶꦁꦥꦫꦩꦶꦭꦶꦠꦺꦂꦲꦶꦁꦏꦁꦢꦢꦺꦴꦱ꧀ꦮꦂꦒꦤꦶꦁꦥꦏꦼꦩ꧀ꦥꦭ꧀ꦭꦤ꧀ꦚꦭꦮꦢꦶꦲꦶꦁꦏꦁꦒꦝꦃꦱꦼꦢꦾꦧꦝꦺꦲꦢꦩꦼꦭ꧀ꦉꦉꦱꦃ꧈ꦏꦥꦿꦶꦏ꧀ꦱꦲꦶꦁꦒꦿꦶꦪꦱꦏꦶꦠ꧀ꦠꦶꦪꦁꦲꦺꦮꦃꦲꦶꦁꦨꦺꦴꦒꦺꦴꦂꦭꦩꦶꦤꦶꦥꦸꦤ꧀ 6 ꦮꦸꦭꦤ꧀꧉
꧋ꦮꦺꦴꦤ꧀ꦠꦼꦤ꧀ꦏꦧꦂ꧈ꦧꦶꦭꦶꦃꦥꦫꦲꦗꦶꦲꦶꦁꦏꦁꦏꦕꦼꦥꦼꦁꦢꦺꦤꦶꦁꦦꦩꦫꦺꦤ꧀ꦠꦃꦲꦶꦗꦱ꧀ꦱꦲꦏꦮꦼꦢꦭ꧀ꦭꦏꦼꦤ꧀ꦱꦏꦶꦁꦏꦫꦗꦤ꧀ꦔꦿꦶꦏꦸ꧈ꦲꦩꦂꦒꦶꦒꦒꦪꦸꦠꦤ꧀ꦏꦭꦶꦪꦤ꧀ꦥꦏꦼꦩ꧀ꦥꦭ꧀ꦭꦤ꧀ꦏꦺꦴꦩ꧀ꦩꦸꦤꦶꦱ꧀꧈ꦱꦩ꧀ꦥꦸꦤ꧀ꦢꦸꦩꦸꦒꦶꦲꦶꦁꦥꦭꦧꦸꦃꦲꦤ꧀ꦠꦚ꧀ꦗꦸꦁꦥꦿꦶꦪꦸꦏ꧀ꦤꦸꦩ꧀ꦥꦏ꧀ꦏꦥꦭ꧀ Singkep꧉ꦠꦶꦠꦶꦪꦁꦮꦲꦸꦭꦗꦼꦁꦲꦺꦁꦒꦭ꧀ꦏꦕꦼꦥꦼꦁꦱꦲꦢꦶꦥꦸꦤ꧀ꦠꦲꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦒꦿꦶꦪꦥꦏꦸꦚ꧀ꦗꦫꦤ꧀ꦲꦶꦁꦓ꧀ꦭꦺꦴꦝꦺꦴꦒ꧀꧈ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦠꦶꦠꦶꦪꦁꦮꦲꦸꦲꦸꦒꦶꦧꦝꦺꦏꦱꦶꦁꦏꦶꦂꦫꦏꦼꦤ꧀ꦝꦠꦼꦁꦝꦶꦓꦸꦭ꧀꧉
꧋ꦱꦏꦶꦁꦯꦮꦃꦭꦸꦤ꧀ꦠꦏꦮꦂꦠꦺꦴꦱ꧀ꦱꦏꦼꦤ꧀꧇ꦱꦤꦗꦤ꧀ꦥꦔꦢꦶꦭ꧀ꦭꦤ꧀ꦭꦤ꧀ꦢꦿꦢ꧀ꦲꦶꦁꦔꦿꦶꦏꦱꦩ꧀ꦥꦸꦤ꧀ꦩꦿꦶꦏ꧀ꦱꦥꦿꦏꦮꦶꦱ꧀ꦏꦺꦴꦩ꧀ꦩꦸꦤꦶꦱ꧀ꦏꦛꦃꦱꦔꦼꦠ꧀꧈ꦲꦺꦮꦱꦩꦤ꧀ꦠꦼꦤ꧀ꦱꦩꦁꦏꦺꦠꦏ꧀ꦱꦶꦃꦮꦺꦴꦤ꧀ꦠꦼꦤ꧀ꦥꦱꦏꦶꦠ꧀ꦠꦤ꧀ꦏꦶꦫꦁꦭꦁꦏꦸꦁ 1200 ꦲꦶꦁꦏꦁꦢꦺꦫꦺꦁꦏꦥꦿꦶꦏ꧀ꦱꦥꦿꦏꦮꦶꦱ꧀ꦱꦶꦥꦸꦤ꧀꧉ꦏꦗꦮꦶꦥꦸꦤꦶꦏꦥꦔꦢꦶꦭ꧀ꦭꦤ꧀ꦮꦲꦸꦱꦥꦸꦤꦶꦏꦠꦏ꧀ꦱꦶꦃꦲꦩꦿꦶꦏ꧀ꦱꦥꦿꦏꦮꦶꦱ꧀ꦫꦗꦥꦼꦗꦃꦏꦭꦠꦁꦒꦭ꧀ 3 ꦗꦤꦸꦮꦫꦶ 1927꧈ꦲꦶꦁꦏꦁꦲꦚ꧀ꦗꦭꦂꦫꦶꦤꦲꦤ꧀ꦠꦶꦪꦁ 8 ꦮꦺꦴꦤ꧀ꦠꦼꦤ꧀ꦲꦶꦁꦒꦿꦶꦪꦥꦏꦸꦚ꧀ꦗꦫꦤ꧀ꦲꦶꦁꦯꦶꦭꦸꦁꦏꦁ꧈ꦗꦭꦂꦫꦤ꧀ꦏꦺꦴꦚ꧀ꦕꦏꦚ꧀ꦕꦤꦶꦥꦸꦤ꧀ꦱꦸꦩꦼꦢꦾꦲꦔꦭꦁꦲꦭꦁꦔꦶ꧈ꦱꦩ꧀ꦥꦸꦤ꧀ꦔꦤ꧀ꦠꦺꦴꦱ꧀ꦮꦢꦺꦴꦱ꧀ꦱꦶꦁꦥꦫꦏꦲꦸꦩ꧀ꦉꦉꦱꦃꦏꦮꦼꦝꦂ꧉
꧋ꦏꦮꦶꦱꦸꦝꦢꦢꦺꦴꦱ꧀ꦝꦺꦴꦏ꧀ꦠꦼꦂꦲꦶꦁꦏꦫꦠꦺꦴꦤ꧀ꦢꦊꦩ꧀ꦲꦶꦁꦏꦁꦯꦶꦤꦸꦲꦸꦤ꧀ꦲꦶꦁꦯꦸꦫꦏꦂꦠ꧇ꦫꦢꦺꦤ꧀ꦩꦱ꧀ Dr. ꦯꦸꦩꦢꦶꦭꦒ꧈ꦲꦶꦁꦏꦁꦱꦸꦮꦲꦸꦢꦢꦺꦴꦱ꧀ꦝꦺꦴꦏ꧀ꦠꦼꦂꦒꦸꦥꦼꦂꦩꦺꦤ꧀꧉ꦮꦶꦮꦶꦠ꧀ꦠꦁꦒꦭ꧀ 1 ꦱꦺꦥ꧀ꦠꦺꦩ꧀ꦧꦼꦂꦥꦸꦤꦶꦏꦫꦢꦺꦤ꧀ꦩꦱ꧀ Dr. ꦯꦸꦩꦢꦶꦭꦒꦱꦩ꧀ꦥꦸꦤ꧀ꦮꦶꦮꦶꦠ꧀ꦤꦶꦤ꧀ꦢꦏ꧀ꦏꦏꦼꦤ꧀ꦥꦢꦩꦼꦭ꧀ꦭꦤ꧀ꦤꦶꦥꦸꦤ꧀ꦲꦺꦁꦒꦭ꧀꧉
꧋Aneta ꦩꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦠꦶꦭꦱ꧀ꦩꦤ꧀ꦠꦿꦶꦒꦿꦶꦪꦱꦏꦶꦠ꧀ꦲꦶꦁꦮꦺꦭ꧀ꦠꦼꦥꦿꦺꦝꦼꦤ꧀ꦤꦩ꧇ꦯꦸꦥꦂꦩꦤ꧀꧈ꦧꦺꦚ꧀ꦗꦶꦁꦠꦁꦒꦭ꧀ 3 ꦎꦏ꧀ꦠꦺꦴꦧꦼꦂꦔꦗꦼꦁꦥꦸꦤꦶꦏꦧꦝꦺꦏꦲꦝꦼꦥ꧀ꦥꦏꦼꦤ꧀ꦲꦶꦁꦥꦔꦢꦶꦭ꧀ꦭꦤ꧀ꦭꦤ꧀ꦢꦿꦢ꧀ꦲꦶꦁꦨꦠꦮꦶ꧈ꦲꦩꦂꦒꦶꦏꦢꦏ꧀ꦮꦱꦭꦶꦁꦏꦸꦃꦥꦿꦏꦮꦶꦱ꧀ꦲꦂꦠ꧉ꦏꦭꦢꦶꦥꦸꦤ꧀ꦥꦿꦶꦏ꧀ꦱꦲꦶꦁꦏꦁꦏꦥꦶꦱꦤ꧀ꦤꦤ꧀ꦯꦸꦥꦂꦩꦤ꧀ꦮꦲꦸꦲꦚꦫꦶꦪꦺꦴꦱ꧀ꦱꦏꦼꦤ꧀ꦮꦂꦤꦶꦮꦂꦤꦶꦧꦧ꧀ꦥꦔꦸꦫꦸꦱ꧀ꦱꦶꦥꦸꦤ꧀ꦒꦿꦶꦪꦱꦏꦶꦠ꧀ꦲꦶꦁꦏꦁꦫꦸꦩꦶꦪꦶꦤꦿꦸꦩꦶꦪꦶꦤ꧀꧈ꦲꦶꦁꦏꦁꦲꦚ꧀ꦗꦭꦂꦫꦶꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦥꦥꦿꦶꦏ꧀ꦱꦤ꧀ꦩꦮꦶꦢꦶꦥꦸꦤ꧀ꦥꦔꦗꦼꦁꦔꦶꦢꦺꦤꦶꦁꦥꦔꦒꦼꦁꦔꦶꦁꦩꦶꦭꦶꦠꦺꦂ꧈ꦲꦶꦁꦮꦸꦱꦤꦥꦥꦿꦶꦏ꧀ꦱꦤ꧀ꦮꦲꦸꦧꦺꦴꦠꦼꦤ꧀ꦲꦁꦱꦭ꧀ꦢꦩꦼꦭ꧀ꦧꦧꦂꦥꦶꦱꦤ꧀꧉
꧋ꦱꦏꦶꦁꦤꦒꦫꦶꦮꦭꦤ꧀ꦢꦶꦏꦮꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦠꦸꦮꦤ꧀ T. Mr. Cohen꧈ꦠꦶꦭꦱ꧀ꦏꦺꦴꦩꦶꦱ꧀ꦱꦫꦶꦱ꧀ꦠꦸꦩꦿꦥ꧀ꦲꦺꦮꦃꦲꦺꦮꦃꦲꦤ꧀ꦤꦶꦁꦥꦥꦿꦺꦤ꧀ꦠꦃꦲꦤ꧀꧈ꦢꦺꦤꦶꦁꦤꦒꦫꦶꦏꦥꦠꦃꦢꦢꦺꦴꦱ꧀ꦥꦤꦸꦤ꧀ꦠꦸꦤ꧀ꦤꦶꦥꦸꦤ꧀ꦲꦶꦁꦏꦁꦨꦸꦥꦠꦶꦲꦶꦁꦨꦤ꧀ꦝꦸꦁꦱꦲꦠꦸꦮꦤ꧀ Dr. Madjolelo꧈ ꦲꦶꦁꦒꦶꦃꦥꦸꦤꦶꦏꦱꦭꦩꦶꦤꦶꦥꦸꦤ꧀ꦥꦿꦪꦒꦸꦁꦏꦏꦭꦶꦃꦮꦲꦸꦮꦺꦴꦤ꧀ꦠꦼꦤ꧀ꦲꦶꦁꦤꦒꦫꦶꦮꦭꦤ꧀ꦢꦶ꧉
꧋Aneta ꦩꦂꦠꦺꦴꦱ꧀ꦱꦏꦼꦤ꧀ꦱꦏꦶꦁꦯꦧꦁ꧈ꦧꦶꦭꦶꦃꦏꦭꦩꦊꦩ꧀ꦩꦶꦁꦒꦸꦲꦶꦁꦏꦁꦏꦥꦼꦁꦏꦼꦂ꧈ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦗꦩ꧀ 11 ꦲꦶꦁꦔꦿꦶꦏꦮꦺꦴꦤ꧀ꦠꦼꦤ꧀ꦭꦶꦤ꧀ꦝꦸꦲꦒꦼꦁ꧈ꦠꦸꦗꦸꦤꦶꦥꦸꦤ꧀ꦧꦺꦴꦠꦼꦤ꧀ꦲꦢꦩꦼꦭ꧀ꦏꦫꦸꦒꦶꦪꦤ꧀ꦥꦸꦤꦥꦥꦸꦤꦥ꧉
꧋ꦱꦼꦫꦠ꧀ꦏꦧꦂ A.I.D. ꦩꦶꦉꦁꦥꦮꦂꦠꦺꦴꦱ꧀꧈ꦧꦶꦭꦶꦃꦠꦸꦮꦤ꧀꧈ꦕꦑꦿꦲꦩꦶꦤꦠꦧꦝꦺꦏꦠꦫꦶꦏ꧀ꦲꦶꦁꦥꦔꦢꦶꦭ꧀ꦭꦤ꧀꧈ꦗꦭꦂꦫꦤ꧀ꦏꦺꦔꦶꦁꦱꦼꦥꦿꦶꦏ꧀ꦝꦺꦭꦶꦏ꧀ꦏꦭꦲꦢꦩꦼꦭ꧀ꦥꦉꦥꦠ꧀ꦠꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦕꦶꦪꦚ꧀ꦗꦸꦂ꧉
꧋ꦚꦉꦁꦔꦶꦒꦽꦧꦼꦒ꧀ꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏ꧈ꦥꦔꦿꦺꦃꦲꦒꦼꦁ P.N.S. (ꦥꦏꦼꦩ꧀ꦥꦭ꧀ꦭꦤ꧀ꦒꦸꦫꦸꦤꦺꦴꦂꦩꦭ꧀ꦱꦼꦏꦸꦭ꧀)꧈ꦢꦩꦼꦭ꧀ꦏꦺꦴꦁꦒꦿꦺꦱ꧀ꦩꦶꦫꦸꦁꦒꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦆꦱ꧀ꦭꦩꦶꦪꦃ꧉ꦥꦉꦥꦠ꧀ꦠꦤ꧀ꦤꦶꦥꦸꦤ꧀ꦏꦢꦩꦼꦭ꧀ꦮꦶꦤꦢꦺꦴꦱ꧀꧉ꦏꦧꦂꦫꦶꦥꦸꦤ꧀ꦲꦶꦁꦏꦁꦏꦉꦩ꧀ꦧꦒ꧀ꦤꦩꦸꦁꦱꦲꦼꦧꦧ꧀꧈ꦲꦶꦁꦒꦶꦃꦥꦸꦤꦶꦏꦥꦿꦏꦮꦶꦱ꧀ꦧꦪꦂ꧉
꧋ꦥꦏꦼꦩ꧀ꦥꦭ꧀ꦭꦤ꧀ꦠꦸꦁꦒꦶꦭ꧀ꦢꦩꦼꦭ꧀ꦔꦿꦶꦏꦔꦿꦶꦏꦶꦱꦥꦸꦤꦶꦏꦲꦸꦒꦶꦱꦮꦼꦒ꧀ꦱꦩꦶꦲꦚ꧀ꦕꦱ꧀ꦱꦶꦥꦸꦤ꧀ꦤꦼꦝꦲꦶꦤ꧀ꦝꦏ꧀ꦏꦤ꧀ꦧꦪꦂ꧉ꦲꦤꦔꦶꦁꦱꦗꦏ꧀ꦏꦶꦥꦸꦤ꧀ꦧꦺꦴꦠꦼꦤ꧀ꦥꦠꦺꦴꦱ꧀ꦱꦢꦶꦥꦸꦤ꧀ꦒꦠꦺꦴꦱ꧀ꦱꦏꦼꦤ꧀ꦏꦭꦶꦪꦤ꧀ꦥꦔꦶꦁꦒꦶꦭ꧀ꦭꦤ꧀꧈ꦩꦶꦭꦤꦩꦸꦁꦒꦸꦩꦤ꧀ꦠꦸꦁꦮꦂꦒꦤꦶꦥꦸꦤ꧀꧉
꧋ꦠꦸꦮꦤ꧀ Kruys ꦏꦺꦴꦁꦱꦸꦭ꧀ꦧꦺꦭ꧀ꦒꦶꦲꦶꦁꦯꦸꦫꦧꦪꦱꦂꦠꦝꦶꦫꦺꦏ꧀ꦠꦸꦂꦏꦸꦭ꧀ꦠꦸꦂꦩꦶꦗ꧀꧉ꦏꦤ꧀ꦝꦔꦤ꧀꧈ꦱꦩꦶꦤꦸꦩ꧀ꦥꦏ꧀ꦧꦲꦶꦠꦥ꧀ꦭꦤ꧀ꦱꦶꦪꦸꦱ꧀꧈ꦲꦶꦁꦨꦠꦮꦶ꧈ꦏꦭꦠꦁꦒꦭ꧀ 6 ꦱꦺꦥ꧀ꦠꦺꦩ꧀ꦧꦼꦂꦥꦸꦤꦶꦏꦏꦱꦸꦩꦼꦉꦥ꧀ꦥꦤ꧀ꦲꦶꦕꦭ꧀ꦧꦺꦴꦠꦼꦤ꧀ꦏꦤ꧀ꦠꦼꦤ꧀ꦤꦤ꧀꧉ꦢꦺꦤꦺꦱꦤ꧀ꦝꦔꦤ꧀ꦤꦶꦥꦸꦤ꧀ꦠꦏ꧀ꦱꦶꦃꦱꦩꦶꦮꦺꦴꦤ꧀ꦠꦼꦤ꧀ꦱꦊꦧꦼꦠ꧀ꦠꦶꦁꦏꦩꦂꦫꦶꦥꦸꦤ꧀ꦥꦶꦪꦩ꧀ꦧꦏ꧀꧉
