ꦮꦮꦲꦺꦴꦱ꧀ꦱꦤ꧀
꧋ꦱꦸꦱꦸꦥꦼꦲꦒꦼꦩ꧀ꦩꦶꦥꦸꦤ꧀ꦫꦗꦥꦸꦠꦿꦶꦲꦶꦁꦯꦼꦧ꧉
꧇꧑꧐꧇
꧋ꦥꦿꦺꦴꦥꦼꦱꦺꦴꦂ Higgs ꦲꦩ꧀ꦧꦼꦧꦼꦝꦒ꧀
꧋ꦏꦥꦶꦠꦤ꧀ Orme ꦮꦶꦕꦤ꧀ꦠꦼꦤ꧀ꦱꦗꦏ꧀ꦱꦩ꧀ꦥꦸꦤ꧀ꦥꦱꦿꦃ꧇ ꦏꦶꦫꦏꦸꦲꦺꦴꦫꦪꦺꦤ꧀ꦥꦿꦲꦫꦤꦼꦩꦲꦸꦧꦏꦭ꧀ꦭꦶꦮꦠ꧀ꦧꦲꦼ꧉ꦮꦶꦱ꧀ꦲꦺꦴꦫꦲꦤꦉꦏꦢꦪꦭꦶꦪꦤꦼꦩꦤꦺꦃꦏꦗꦧꦩꦸꦁꦲꦤ꧀ꦢꦼꦢꦺꦴꦔ꧉ꦠꦼꦠꦼꦩ꧀ꦧꦸꦁꦔꦤ꧀ꦤꦶꦥꦸꦤ꧀ꦮꦲꦸꦭꦗꦼꦁꦢꦶꦥꦸꦤ꧀ꦱꦩ꧀ꦧꦼꦠ꧀ꦠꦶꦥꦶꦪꦩ꧀ꦧꦏ꧀ꦩꦏꦠꦼꦤ꧀꧇ ꦱꦲꦶꦏꦶꦮꦶꦱ꧀ꦩꦺꦃꦠꦼꦏꦤ꧀ꦮꦼꦏꦱꦤ꧀ꦤꦼ꧈ꦲꦺꦮꦢꦺꦤꦺꦏꦺꦴꦮꦼꦥꦿꦺꦴꦥꦼꦱꦺꦴꦂ Higgs꧈ꦮꦶꦱ꧀ꦩꦠꦺꦤꦶꦱꦶꦔꦧꦫꦺꦴꦁꦭꦺꦴꦫꦺꦴ꧈ꦏꦁꦩꦁꦏꦺꦴꦤꦺꦴꦏꦸꦮꦶꦫꦏ꧀ꦮꦶꦱ꧀ꦥꦶꦫꦥꦶꦫ꧉
꧋ꦮꦁꦱꦸꦭꦤ꧀ꦤꦶꦥꦸꦤ꧀ꦥꦿꦺꦴꦥꦼꦱꦺꦴꦂ Higgs꧇ ꦲꦺꦠꦺꦴꦧꦠ꧀꧈ꦪꦏꦺꦴꦤꦺꦴꦤꦺꦏ꧀ꦏꦺꦴꦮꦼꦲꦤ꧀ꦢꦸꦮꦺꦤ꧀ꦤꦶꦏꦥꦺꦔꦶꦤ꧀ꦩꦠꦶ꧉ꦢꦺꦴꦚꦲꦺꦴꦫꦧꦏꦭ꧀ꦏꦼꦭꦁꦔꦤ꧀ꦚꦁꦲꦮꦏ꧀ꦩꦸ꧈ꦲꦤꦔꦶꦁꦥꦶꦏꦶꦂꦫꦼꦤ꧀꧈ꦱꦥꦶꦫꦫꦸꦒꦶꦤꦼꦪꦺꦤ꧀ꦲꦏꦸꦔꦤ꧀ꦠꦶꦲꦺꦴꦫꦲꦤ꧈ꦲꦏꦸꦲꦺꦴꦫꦱꦸꦩꦼꦢꦾꦩꦠꦶꦢꦼꦤꦶꦁꦥꦿꦲꦫꦮꦼꦝꦶꦏꦥꦫꦠ꧀ꦲꦶꦏꦶ꧈ꦱꦼꦢꦾꦏꦸꦲꦉꦥ꧀ꦔꦫꦁꦧꦸꦏꦸꦥꦿꦏꦫꦩꦸꦂ꧉ꦏꦤ꧀ꦛꦶꦫꦲꦶꦱꦔꦂ꧈ꦥꦿꦺꦴꦥꦼꦱꦺꦴꦂ Higgs ꦭꦗꦼꦁꦔꦼꦛꦸꦁꦔꦶꦏꦼꦥꦼꦭ꧀ꦝꦠꦼꦁꦩꦼꦒꦲꦶꦁꦏꦁꦲꦩꦸꦫꦏꦁꦲꦩꦸꦫꦸꦒ꧀ꦒꦶꦮꦲꦸ꧉
꧋ꦱꦊꦧꦼꦠ꧀ꦠꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦩꦏꦠꦼꦤ꧀ꦮꦲꦸꦏꦸꦭꦲꦁꦒꦒꦱ꧀꧉
꧋ꦏꦸꦭꦭꦗꦼꦁꦮꦶꦕꦤ꧀ꦠꦼꦤ꧀꧇ ꦩꦫꦥꦝꦫꦸꦔꦺꦴꦏ꧀ꦤ꧈ꦤꦺꦏ꧀ꦩꦸꦫꦶꦃꦱ꧀ꦭꦩꦼꦠ꧀ꦠꦼ꧈ꦲꦶꦪꦲꦤꦏꦼꦤꦼꦧꦲꦼ꧈ꦱꦧꦧ꧀ꦪꦺꦤ꧀ꦲꦏꦸꦏꦧꦺꦃꦲꦩ꧀ꦧꦚ꧀ꦗꦸꦂꦫꦏꦼꦭꦸꦩꦏꦸ꧈ꦮꦶꦱ꧀ꦩꦼꦱ꧀ꦛꦶꦧꦏꦭ꧀ꦏꦼꦥꦼꦤ꧀ꦝꦼꦩ꧀ꦲꦸꦫꦶꦥ꧀ꦲꦸꦫꦶꦥ꧀ꦥꦤ꧀ꦠꦼꦩꦼꦤ꧀ꦤꦤ꧀꧉ꦢꦼꦊꦁꦔꦼꦤ꧀ꦏꦲꦼ꧇ ꦭꦺꦴ꧈ꦲꦤꦥꦁꦒꦺꦴꦤ꧀ꦤꦤ꧀ꦱꦶꦁꦱꦤ꧀ꦠꦺꦴꦱꦏꦁꦏꦼꦤꦢꦶꦠꦸꦫꦺꦴꦤ꧀ꦤꦶ꧉ꦏꦸꦭꦭꦗꦼꦁꦤꦼꦢꦃꦲꦶꦒꦸꦩꦸꦏ꧀ꦲꦶꦁꦏꦁꦲꦝꦼꦝꦱꦂꦱꦼꦭ꧈ꦱꦲꦮꦶꦕꦤ꧀ꦠꦼꦤ꧀ꦩꦭꦶꦃꦩꦏꦠꦼꦤ꧀꧇ ꦲꦪꦺꦴꦲꦺꦁꦒꦭ꧀ꦥꦝꦠꦸꦠꦸꦫꦺꦴꦤ꧀꧈ꦭꦤ꧀ꦮꦭꦸꦭꦁꦔꦼꦱꦶꦔꦧꦫꦺꦴꦁꦢꦶꦏꦼꦩꦸꦭ꧀ꦭꦏꦼ꧈ꦱꦧꦧ꧀ꦲꦶꦏꦶꦏꦼꦤꦏꦁꦒꦺꦴꦲꦚ꧀ꦗꦒ꧈ꦲꦗꦔꦤ꧀ꦠꦶꦲꦏꦸꦏꦧꦺꦃꦏꦼꦥ꧀ꦭꦼꦥꦼꦒ꧀ꦒꦼꦤ꧀꧉ꦲꦪꦺꦴꦠꦫꦶꦏꦠ꧀ꦏꦺꦴꦚ꧀ꦕ꧈ꦲꦪꦺꦴ꧈ꦲꦪꦺꦴ꧈ꦏꦲꦼꦠꦼꦏ꧉
꧋ꦩꦶꦭꦲꦶꦁꦒꦶꦃꦱꦲꦺꦱ꧀ꦠꦸ꧈ꦥꦿꦲꦫꦤꦶꦥꦸꦤ꧀ꦝꦠꦼꦁ꧈ꦱ꧀ꦮꦫꦤꦶꦥꦸꦤ꧀ꦲꦁꦒꦼꦒꦶꦫꦶꦱ꧀ꦱꦶ꧉ꦝꦠꦼꦁꦔꦶꦥꦸꦤ꧀ꦮꦲꦸꦔ꧀ꦭꦼꦉꦱ꧀ꦱꦶꦏꦸꦭꦱꦢꦪꦱꦩ꧀ꦥꦸꦤ꧀ꦠꦶꦊꦩ꧀ꦩꦤ꧀ꦏꦢꦺꦴꦱ꧀ꦲꦶꦁꦏꦁꦱꦩ꧀ꦥꦸꦤ꧀ꦏꦕꦫꦶꦪꦺꦴꦱ꧀ꦱꦏꦼꦤ꧀ꦮꦲꦸ꧈ꦲꦶꦁꦒꦶꦃꦥꦸꦤꦶꦏꦩꦼꦁꦏꦸꦉꦥ꧀꧈ꦒꦼꦒꦼꦂꦫꦶꦥꦸꦤ꧀ꦏꦠꦼꦩ꧀ꦥꦸꦃꦲꦶꦁꦥꦿꦲꦫ꧈ꦲꦶꦫꦸꦁꦭꦤ꧀ꦕꦁꦏꦼꦩ꧀ꦢꦶꦥꦸꦤ꧀ꦲꦸꦩ꧀ꦥꦼꦠ꧀ꦠꦏꦼꦤ꧀꧈ꦏꦢꦺꦴꦱ꧀ꦢꦺꦤꦺꦕꦫꦤꦶꦁꦲꦸꦤ꧀ꦠꦩꦤꦮꦶꦮꦺꦴꦤ꧀ꦠꦼꦤ꧀ꦩꦏꦠꦼꦤ꧀ꦮꦲꦸ꧉ꦮꦕꦸꦕꦭ꧀ꦭꦶꦁꦱꦶꦔꦧꦫꦺꦴꦁꦲꦤꦸꦠꦸꦥ꧀ꦥꦶꦱꦶꦫꦃꦱꦂꦠꦧꦢꦤ꧀ꦏꦸꦭꦱꦢꦪ꧉ꦏꦼꦊꦠ꧀ꦠꦤ꧀ꦤꦶꦁꦱꦸꦏꦸꦏꦸꦭꦠꦶꦤ꧀ꦝꦶꦃꦲꦶꦏꦼꦚ꧀ꦕꦼꦁ꧈ꦱꦸꦥꦢꦺꦴꦱ꧀ꦱꦩ꧀ꦥꦸꦤ꧀ꦔꦤ꧀ꦠꦺꦴꦱ꧀ꦏꦧꦸꦂ꧈ꦏꦭꦥꦿꦲꦫꦱꦲꦥꦼꦠꦼꦁꦲꦤ꧀ꦝꦼꦝꦼꦠ꧀ꦮꦲꦸꦝꦠꦼꦁ꧉ꦏꦢꦺꦴꦱ꧀ꦩꦏꦠꦼꦤ꧀ꦒꦸꦩ꧀ꦭꦼꦛꦏ꧀ꦏꦸꦭꦱꦢꦪꦥꦶꦤ꧀ꦠꦼꦤ꧀ꦥꦶꦤ꧀ꦠꦼꦤ꧀ꦗꦩ꧀ꦢꦔꦸꦤꦶꦥꦸꦤ꧀꧈ꦧꦺꦴꦠꦼꦤ꧀ꦱꦒꦼꦢ꧀ꦤꦶꦔꦭ꧀ꦭꦶꦭꦤ꧀ꦧꦺꦴꦠꦼꦤ꧀ꦱꦒꦼꦢ꧀ꦒꦶꦒꦶꦤꦼꦩ꧀ꦩꦤ꧀꧈ꦗꦭꦂꦫꦤ꧀ꦱꦏꦶꦁꦱ꧀ꦮꦫꦲꦶꦁꦏꦁꦲꦩ꧀ꦧꦽꦧꦼꦒ꧀ꦒꦶꦮꦲꦸ꧉ꦱꦏꦼꦝꦥ꧀ꦱꦏꦼꦝꦥ꧀ꦏꦸꦭꦱꦢꦪꦲꦔꦁꦏꦠ꧀ꦧꦢꦤ꧀ꦱꦲꦲꦩ꧀ꦧꦿꦁꦏꦁ꧈ꦥꦽꦭꦸꦤꦶꦥꦸꦤ꧀ꦱꦸꦥꦢꦺꦴꦱ꧀ꦥꦱꦶꦂꦲꦶꦁꦏꦁꦠꦸꦩ꧀ꦥꦸꦏ꧀ꦏꦤ꧀ꦮꦺꦴꦤ꧀ꦠꦼꦤ꧀ꦱꦔꦶꦁꦒꦶꦭ꧀ꦭꦶꦁꦧꦢꦤ꧀ꦏꦸꦭꦱꦒꦼꦢꦮꦸꦠꦃ꧉ꦏꦸꦭꦱꦢꦪꦤꦤ꧀ꦝꦁꦱꦁꦱꦫꦱꦪꦼꦏ꧀ꦠꦺꦴꦱ꧀꧈ꦲꦮꦶꦠ꧀ꦲꦸꦁꦏꦼꦥ꧀ꦥꦶꦁꦧꦼꦤ꧀ꦠꦺꦂꦱꦔꦤ꧀ꦝꦥ꧀ꦥꦶꦥꦸꦤ꧀ꦮꦕꦸꦕꦭ꧀ꦱꦶꦔꦧꦫꦺꦴꦁꦲꦶꦁꦏꦁꦩꦩ꧀ꦧꦼꦠ꧀꧈ꦱꦲꦲꦮꦲꦶꦁꦏꦁꦏꦼꦧꦏ꧀ꦥꦱꦶꦂꦮꦲꦸ꧈ꦲꦚ꧀ꦗꦭꦂꦫꦶꦏꦸꦭꦱꦢꦪꦩꦺꦃꦏꦼꦥ꧀ꦭꦼꦥꦼꦒ꧀ꦒꦼꦤ꧀꧈ꦥꦸꦤꦥꦩꦭꦶꦃꦏꦸꦭꦱꦢꦪꦧꦺꦴꦠꦼꦤ꧀ꦱꦒꦼꦢ꧀ꦔꦺꦴꦩ꧀ꦧꦼꦥꦸꦤꦥꦥꦸꦤꦥ꧈ꦲꦤꦔꦶꦁꦲꦶꦁꦏꦁꦔ꧀ꦭꦁꦏꦸꦁꦔ꧀ꦭꦁꦏꦸꦁꦔꦶꦥꦸꦤꦶꦏꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦥꦁꦒꦺꦱꦿꦺꦏ꧀ꦏꦶꦁꦥꦱꦶꦂ꧈ꦱꦏꦶꦁꦫꦶꦏꦠ꧀ꦠꦶꦁꦥꦁꦒꦺꦱꦿꦺꦏ꧀ꦏꦶꦥꦸꦤ꧀ꦥꦱꦶꦂꦝꦠꦼꦁꦏꦸꦭꦱꦢꦪꦮꦲꦸ꧈ꦔꦤ꧀ꦠꦺꦴꦱ꧀ꦱꦤ꧀ꦝꦁꦔꦤ꧀ꦏꦸꦭꦱꦢꦪꦲꦶꦁꦏꦁꦠꦶꦥꦶꦱ꧀꧈ꦱꦩꦶꦥꦠꦶꦁꦕꦿꦺꦴꦩ꧀ꦥ꧀ꦭꦺꦴꦁ꧉ꦱꦲꦫꦲꦺꦴꦱ꧀ꦱꦶꦁꦏꦸꦭꦶꦠ꧀ꦱꦏꦭꦁꦏꦸꦁꦱꦏꦶꦠ꧀ꦱꦔꦼꦠ꧀꧉
꧋ꦏꦸꦭꦩꦶꦉꦁꦮꦶꦕꦤ꧀ꦠꦼꦤ꧀ꦤꦶꦥꦸꦤ꧀ꦥꦿꦺꦴꦥꦼꦱꦺꦴꦂ Higgs ꦲꦶꦁꦏꦁꦏꦭꦥꦸꦤꦶꦏꦏꦿꦲꦺꦴꦱ꧀ꦩꦸꦩꦼꦠ꧀ꦩꦫꦩ꧀ꦧꦃꦫꦩ꧀ꦧꦫꦩ꧀ꦧꦃꦩꦏꦠꦼꦤ꧀꧇ ꦲꦶꦪꦲꦺꦴꦫꦲꦁꦒꦸꦩꦸꦤ꧀ꦤꦏꦼ꧈ꦢꦺꦤꦺꦉꦕꦉꦕꦲꦶꦁꦩꦼꦯꦶꦂꦲꦶꦏꦸꦥꦝꦒꦶꦭꦥ꧀ꦲꦥꦶꦏ꧀ꦩꦁꦏꦺꦴꦤꦺꦴ꧉ꦲꦼꦩ꧀ꦲꦶꦪꦲꦺꦴꦫꦲꦁꦒꦸꦩꦸꦤ꧀ꦤꦏꦼ꧈ꦱꦼꦂꦱꦤ꧀ Quick ꦧꦏꦭ꧀ꦧꦶꦱꦲꦁꦒꦶꦭꦥ꧀ꦥꦏꦼꦱꦼꦠꦶꦮꦼꦭ꧀ꦏꦁꦒꦼꦝꦼꦱꦫꦤꦱꦫꦤꦒꦉꦱ꧀ꦏꦸꦲꦶꦏꦶ꧈ꦱꦶꦔꦧꦫꦺꦴꦁꦥꦚꦏꦶꦠ꧀ꦏꦲꦼ꧉ꦏꦼꦤꦺꦁꦲꦥꦝꦺꦏ꧀ꦲꦤꦸꦏꦲꦼꦏꦺꦴꦮꦼꦲꦮꦺꦃꦲꦸꦪꦃꦚꦁꦲꦏꦸ꧈ꦏꦼꦧꦺꦴ꧉ꦲꦝꦸꦃꦲꦝꦸꦃꦒꦼꦒꦼꦂꦏꦸꦭꦫꦠꦼꦩꦼꦤ꧀꧉
꧋ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦭꦗꦼꦁꦏꦺꦤ꧀ꦢꦼꦭ꧀꧈ꦭꦤ꧀ꦤꦩꦸꦁꦝꦁꦝꦺꦴꦁꦔ꧀ꦭꦺꦤ꧀ꦝꦺꦃꦲꦶ꧈ꦲꦺꦮꦢꦺꦤꦺꦤꦤ꧀ꦝꦁꦱꦁꦱꦫꦲꦶꦁꦏꦁꦩꦏꦠꦼꦤ꧀ꦮꦲꦸꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦲꦶꦁꦒꦶꦃꦮꦺꦴꦤ꧀ꦠꦼꦤ꧀ꦥꦶꦒꦸꦤꦤꦶꦥꦸꦤ꧀ꦲꦶꦁꦏꦁꦲꦒꦼꦁ꧈ꦗꦭꦂꦫꦤ꧀ꦩꦤꦮꦶꦧꦺꦴꦠꦼꦤ꧀ꦩꦏꦠꦼꦤ꧀꧈ꦲꦩꦂꦒꦶꦱꦏꦶꦁꦱꦪꦃꦭꦤ꧀ꦔꦼꦭꦏ꧀ꦱꦔꦼꦠ꧀ꦮꦲꦸ꧈ꦏꦸꦭꦱꦢꦪꦱꦒꦼꦢ꧀ꦲꦸꦒꦶꦱꦸꦩꦥꦸꦠ꧀꧈ꦔꦤ꧀ꦠꦺꦴꦱ꧀ꦱꦒꦼꦢ꧀ꦏꦼꦠꦶꦊꦩ꧀ꦩꦤ꧀꧈ꦲꦶꦁꦏꦁꦧꦺꦴꦠꦼꦤ꧀ꦧꦝꦼꦠꦔꦶꦩꦭꦶꦃ꧉ꦲꦤꦔꦶꦁꦏꦭꦥꦸꦤꦶꦏꦏꦸꦭꦱꦢꦪꦧꦺꦴꦠꦼꦤ꧀ꦫꦸꦩꦲꦺꦴꦱ꧀ꦒꦝꦃꦥꦤꦫꦶꦩꦃ꧈ꦲꦩꦂꦒꦶꦫꦲꦺꦴꦱ꧀ꦱꦶꦥꦸꦤ꧀ꦧꦺꦴꦠꦼꦤ꧀ꦏꦤ꧀ꦠꦼꦤ꧀ꦏꦤ꧀ꦠꦼꦤ꧀ꦤꦤ꧀꧉ꦲꦶꦁꦠꦼꦩ꧀ꦧꦼꦮꦶꦁꦏꦶꦁꦔꦶꦥꦸꦤ꧀꧈ Orme ꦚꦫꦶꦪꦺꦴꦱ꧀ꦱꦏꦼꦤ꧀ꦝꦠꦼꦁꦏꦸꦭ꧈ꦧꦶꦭꦶꦃꦏꦭꦥꦸꦤꦶꦏꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦒꦝꦃꦥꦔꦁꦒꦼꦥ꧀꧈ꦲꦁꦱꦭ꧀ꦧꦺꦴꦤ꧀ꦝꦏꦛꦃꦱꦔꦼꦠ꧀꧈ꦗꦭꦂꦫꦤ꧀ꦚꦢꦼꦥꦶꦫꦤ꧀ꦠꦺꦴꦱ꧀ꦤꦶꦏ꧀ꦱꦲꦮꦂꦤꦶꦥꦱꦶꦂꦲꦶꦁꦏꦁꦧꦼꦤ꧀ꦠꦺꦂ꧈ꦲꦶꦁꦏꦁꦱꦏꦼꦝꦥ꧀ꦱꦏꦼꦝꦥ꧀ꦏꦤ꧀ꦛꦶꦏꦶꦏꦶꦪꦠ꧀ꦠꦤ꧀ꦢꦶꦥꦸꦤ꧀ꦢꦩꦺꦴꦏ꧀ꦲꦏꦼꦤ꧀ꦝꦠꦼꦁꦠꦶꦪꦁꦲꦶꦁꦏꦁꦏꦱꦶꦏ꧀ꦱꦮꦲꦸ꧉
꧋ꦏꦸꦭꦱꦢꦪꦧꦺꦴꦠꦼꦤ꧀ꦚꦸꦩꦼꦉꦥ꧀ꦥꦶ꧈ꦥꦶꦤ꧀ꦠꦼꦤ꧀ꦢꦔꦸꦤꦶꦥꦸꦤ꧀ꦏꦸꦭꦱꦢꦪꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦸꦥꦸꦤꦶꦏ꧉ꦲꦶꦁꦠꦼꦩ꧀ꦧꦼꦮꦶꦁꦏꦶꦁꦔꦶꦥꦸꦤ꧀ꦱꦮꦼꦒ꧀ꦏꦱꦸꦩꦼꦉꦥ꧀ꦥꦤ꧀꧈ꦧꦶꦭꦶꦃꦢꦔꦸꦤꦶꦥꦸꦤ꧀ꦥꦿꦲꦫꦥꦱꦶꦂꦮꦲꦸꦮꦺꦴꦤ꧀ꦠꦼꦤ꧀ꦏꦭꦶꦃꦢꦱꦗꦩ꧀꧉ꦱꦊꦧꦼꦠ꧀ꦠꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦥꦿꦲꦫꦥꦱꦶꦂꦮꦲꦸ꧈ꦥꦸꦁꦏꦱ꧀ꦱꦤ꧀ꦤꦶꦥꦸꦤ꧀ꦏꦸꦭꦭꦗꦼꦁꦱꦸꦩꦶꦔꦼꦥ꧀꧈ꦱꦉꦁꦢꦔꦸꦢꦔꦸꦏꦸꦭꦲꦺꦔꦼꦠ꧀ꦩꦭꦶꦃ꧈ꦲꦶꦁꦕꦏꦼꦠ꧀ꦏꦸꦭ꧈ꦏꦸꦭꦱꦸꦩꦼꦉꦥ꧀ꦉꦢꦶꦥꦱꦶꦂꦏꦏꦭꦶꦃ꧈ꦲꦶꦁꦏꦁꦮꦂꦤꦶꦤꦶꦥꦸꦤ꧀ꦏꦢꦺꦴꦱ꧀ꦥꦸꦤ꧀ꦛꦸꦏ꧀ꦏꦸꦧꦸꦂꦫꦤ꧀꧉ꦲꦶꦁꦥꦸꦥꦸꦤ꧀ꦛꦸꦏ꧀ꦏꦤ꧀ꦏꦏꦭꦶꦃꦮꦲꦸꦏꦼꦠꦶꦔꦭ꧀ꦏꦢꦺꦴꦱ꧀ꦱꦸꦏꦸꦕꦺꦴꦔꦠ꧀ꦕꦺꦴꦔꦠ꧀꧈ꦲꦶꦁꦏꦁꦱꦸꦮꦲꦸꦤꦶꦥꦸꦤ꧀ꦮꦂꦤꦶꦥꦼꦛꦏ꧀꧉ꦱꦸꦏꦸꦲꦶꦁꦏꦁꦏꦭꦶꦃꦭꦗꦼꦁꦲꦺꦧꦃ꧈ꦥꦱꦶꦂꦫꦶꦥꦸꦤ꧀ꦩꦶꦁꦒꦃꦱꦲꦧꦢꦤ꧀ꦤꦶꦥꦸꦤ꧀ꦏꦥꦶꦠꦤ꧀ Olivier Orme ꦭꦗꦼꦁꦩꦼꦢꦭ꧀ꦱꦏꦶꦁꦔꦿꦶꦏꦸ꧉ꦏꦸꦭꦏꦏꦭꦶꦃꦭꦗꦼꦁꦱꦩꦶꦥꦤ꧀ꦢꦼꦁꦥꦤ꧀ꦢꦼꦁꦔꦤ꧀ꦱꦏꦼꦝꦥ꧀꧉
꧋ꦏꦤ꧀ꦛꦶꦲꦤꦸꦢꦶꦁꦝꦠꦼꦁꦥꦿꦺꦴꦥꦼꦱꦺꦴꦂ Higgs ꦲꦶꦁꦏꦁꦏꦭꦥꦸꦤꦶꦏꦠꦏ꧀ꦱꦶꦃꦏꦼꦥꦼꦤ꧀ꦝꦼꦩ꧀꧈ꦏꦥꦶꦠꦤ꧀ꦎꦂꦩꦼ*ꦥꦶꦠꦏꦺꦤ꧀ꦩꦏꦠꦼꦤ꧀꧇ ꦲꦥꦝꦺꦏ꧀ꦏꦼꦩꦠꦶ꧉꧋ꦏꦸꦭꦲꦩꦁꦱꦸꦭ꧀ꦭꦶ꧇ ꦲꦏꦸꦏꦺꦴꦏ꧀ꦏꦸꦮꦠꦶꦂꦤꦺꦏ꧀ꦤꦺꦏ꧀ꦲꦺꦲꦶꦪ꧉ꦩꦫꦲ
