ꦒꦮꦲꦶꦁꦏꦁꦔꦸꦫꦸꦱ꧀ꦱꦶꦧꦧ꧀ꦱꦩꦸꦏꦮꦶꦱ꧀ꦥꦿꦏꦮꦶꦱ꧀ꦝꦸꦱꦸꦤ꧀ꦝꦸꦱꦸꦤ꧀꧈ꦏꦺꦴꦭꦺꦴꦤꦶꦱꦱꦶꦔꦿꦶꦏꦸꦏꦗꦮꦶꦥꦿꦏꦮꦶꦱ꧀ꦥꦸꦭꦶꦱꦶꦲꦸꦠꦮꦶꦥꦲꦺꦴꦱ꧀꧈ꦱꦧꦧ꧀ꦥꦸꦤꦶꦏꦢꦶꦥꦸꦤ꧀ꦮꦗꦶꦧ꧀ꦧꦏꦼꦤ꧀ꦝꦠꦼꦁꦄꦱꦶꦱ꧀ꦠꦺꦤ꧀ꦢꦼꦩꦁꦲꦶꦁꦓꦼꦝꦺꦴꦁꦠꦠꦏꦤ꧀꧉
꧋ꦩꦤꦮꦶꦤꦶꦔꦭ꧀ꦭꦶꦝꦸꦱꦸꦤ꧀ꦝꦸꦱꦸꦤ꧀ꦲꦶꦁꦔꦿꦶꦏꦸꦧꦺꦴꦠꦼꦤ꧀ꦥꦗꦥꦗꦲꦤꦶꦔꦭ꧀ꦭꦶꦥꦝꦸꦱꦸꦤ꧀ꦤꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦔꦩꦚ꧀ꦕ꧉ꦩꦁꦒꦠꦥꦩꦤ꧀ꦩꦿꦶꦏ꧀ꦱꦤ꧀ꦤꦤꦒꦩ꧀ꦧꦂꦥꦼꦏꦼꦤ꧀ꦮꦤꦏꦂꦠ꧈ꦥꦝꦼꦏꦃꦲꦤ꧀ꦠꦸꦩꦸꦠ꧀ꦲꦶꦁꦝꦸꦱꦸꦤ꧀ꦒꦝꦶꦁ꧉ꦩꦤꦮꦶꦏꦥꦿꦤꦏ꧀ꦤꦲꦸꦒꦶꦮꦺꦴꦤ꧀ꦠꦼꦤ꧀ꦥꦸꦭꦶꦱꦶꦤꦶꦥꦸꦤ꧀ꦝꦸꦱꦸꦤ꧀ꦩꦔꦁꦒꦼꦝꦶꦤꦼꦱ꧀ꦱ꧀ꦭꦼꦩ꧀ꦥꦁ꧈ꦱꦧꦧ꧀ꦱꦮꦼꦒ꧀ꦗꦒꦶꦥꦼꦏꦼꦤ꧀꧈ꦏꦢꦺꦴꦱ꧀ꦲꦶꦁꦗꦮꦶꦠꦼꦔꦃ꧈ꦱꦂꦠꦲꦸꦒꦶꦠꦶꦠꦶꦪꦁꦲꦶꦁꦏꦁꦏꦠꦶꦔꦭ꧀꧈ꦱꦢꦪꦮꦲꦸꦠꦶꦪꦁꦗꦮꦶ꧉
꧋ꦲꦶꦁꦏꦺꦴꦭꦺꦴꦤꦶꦱꦱꦶꦮꦲꦸꦱꦩ꧀ꦥꦸꦤ꧀ꦩꦢꦼꦒ꧀ꦝꦸꦱꦸꦤ꧀ 13 ꦏꦛꦃꦲꦶꦥꦸꦤ꧀꧈ꦲꦶꦁꦒꦶꦃꦥꦸꦤꦶꦏ 1 ꦨꦒꦼꦭꦺꦤ꧀ 2 ꦓꦝꦶꦁ꧈ 3 ꦮꦤꦢꦢꦶ꧈ 4 ꦡꦸꦭꦸꦔꦒꦸꦁ꧈ 5 ꦡꦩ꧀ꦧꦏꦽꦗ꧈ 6 ꦮꦠꦼꦱ꧀꧈ 7ꦦꦸꦂꦮꦉꦗ꧈ 8 ꦦꦸꦗꦫꦲꦪꦸ꧈ 9 ꦩꦼꦠꦫꦩ꧀꧈ 10 ꦑꦼꦝꦶꦫꦶ꧈ 11 ꦙꦺꦴꦏ꧀ꦗꦏꦂꦠ꧈ 12 ꦨꦸꦭꦸꦏꦼꦂꦠ꧈ꦭꦤ꧀ 13 ꦦꦥꦿꦶꦔꦤ꧀ꦱꦺꦮꦸ꧉ꦱꦧꦼꦤ꧀ꦝꦸꦱꦸꦤ꧀ꦮꦲꦸꦏꦥꦽꦤ꧀ꦠꦃꦢꦼꦤꦶꦁꦭꦸꦫꦃꦱꦥꦿꦧꦺꦴꦠ꧀ꦠꦶꦥꦸꦤ꧀꧈ꦧꦺꦴꦠꦼꦤ꧀ꦧꦼꦢꦏꦢꦺꦴꦱ꧀ꦲꦶꦁꦗꦮꦶ꧉
꧋ꦕꦕꦃꦗꦶꦮꦤꦶꦥꦸꦤ꧀ꦮꦺꦴꦤ꧀ꦠꦼꦤ꧀ 20.000 (ꦏꦭꦶꦃꦢꦱꦲꦺꦮꦸ)ꦕꦕꦃꦲꦶꦁꦏꦼꦮꦤ꧀(ꦊꦩ꧀ꦧꦸ) 3000꧈ꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦱꦧꦶꦤ꧀ꦲꦶꦁꦏꦁꦱꦩ꧀ꦥꦸꦤ꧀ꦢꦢꦺꦴꦱ꧀ꦱꦲꦺ 3000 ꦧꦲꦸꦏꦥꦫꦭꦁꦏꦸꦁ꧈ꦥꦼꦏꦮꦶꦱ꧀ꦱꦤ꧀ꦱꦂꦠꦠꦼꦒꦶꦭ꧀ꦭꦤ꧀ 5000 ꦧꦲꦸ꧈ꦱꦶꦠꦶꦤꦶꦥꦸꦤ꧀ꦱꦧꦶꦤ꧀ꦲꦸꦠꦮꦶꦠꦼꦒꦭ꧀ꦭꦤ꧀ꦧꦺꦴꦠꦼꦤ꧀ꦏꦼꦔꦶꦁꦏꦱꦩꦺꦏ꧀ꦲꦏꦼꦤ꧀ꦏꦭꦶꦪꦤ꧀ꦲꦶꦁꦠꦤꦃꦗꦮꦶ꧈ꦱꦏꦶꦁꦢꦼꦤꦶꦁꦭꦁꦏꦸꦔ꧀ꦭꦁꦏꦸꦁꦲꦶꦁꦱꦲꦼꦤꦶꦥꦸꦤ꧀꧈ꦱꦧꦶꦤ꧀ꦲꦶꦁꦔꦿꦶꦏꦸꦏꦛꦃꦱꦔꦼꦠ꧀ꦲꦶꦁꦏꦁꦱꦒꦼꦢ꧀ꦏꦥꦤꦼꦤ꧀ꦤꦤ꧀ 60꧈ 80 ꦝꦕꦶꦤ꧀꧉ꦢꦭꦱ꧀ꦱꦤ꧀ꦠꦼꦒꦶꦭ꧀ꦭꦤ꧀ꦤꦶꦥꦸꦤ꧀ꦲꦶꦁꦏꦁꦏꦠꦤꦼꦩ꧀ꦩꦤ꧀ꦥꦤ꧀ꦠꦸꦤ꧀(ꦥꦸꦤꦥꦩꦭꦶꦃꦲꦶꦁꦏꦁꦧꦶꦏꦏ꧀ꦏꦤ꧀ꦲꦺꦁꦒꦭ꧀)ꦱꦒꦼꦢ꧀ꦲꦁꦱꦭ꧀ 50 ꦝꦕꦶꦤ꧀ꦥꦤ꧀ꦠꦸꦤ꧀ꦒꦒ꧉
꧋ꦱꦧꦶꦤ꧀ꦤꦶꦥꦸꦤ꧀ꦱꦶꦠꦶꦲꦁꦱꦭ꧀ꦲꦶꦭꦺꦤ꧀ꦲꦶꦭꦺꦤ꧀ꦱꦏꦶꦁꦮꦔꦤ꧀ꦮꦔꦤ꧀ꦲꦶꦫꦶꦒꦱꦶ꧈ꦲꦶꦁꦏꦁꦢꦶꦥꦸꦤ꧀ꦥꦿꦤꦠꦱꦲꦼ꧈ꦱꦲꦮꦺꦴꦤ꧀ꦠꦼꦤ꧀ꦏꦤ꧀ꦠꦺꦴꦂꦫꦶꦥꦸꦤ꧀ꦲꦶꦫꦶꦒꦱꦶꦥꦶꦪꦩ꧀ꦧꦏ꧀ꦮꦺꦴꦤ꧀ꦠꦼꦤ꧀ꦲꦶꦁꦓꦼꦝꦺꦴꦁꦠꦠꦏꦤ꧀꧉ꦏꦁꦒꦼꦥꦤꦸꦤ꧀ꦠꦸꦤ꧀ꦤꦶꦥꦸꦤ꧀ꦥꦫꦭꦉꦝꦸꦱꦸꦤ꧀ꦲꦶꦁꦧꦧ꧀ꦏꦱꦒꦼꦢ꧀ꦢꦤ꧀ꦚꦼꦫꦠ꧀ꦲꦸꦠꦮꦶꦲꦺꦠꦁ꧈ꦲꦶꦁꦏꦺꦴꦭꦺꦴꦤꦶꦱꦱꦶꦱꦩ꧀ꦥꦸꦤ꧀ꦮꦺꦴꦤ꧀ꦠꦼꦤ꧀ꦱꦼꦏꦺꦴꦭꦃꦲꦤ꧀ꦝꦸꦱꦸꦤ꧀ 7 ꦱꦂꦠ 1 ꦱꦼꦏꦺꦴꦭꦃꦲꦤ꧀ꦥꦼꦂꦥꦺꦴꦊꦃ꧈ꦏꦁꦒꦼꦔ꧀ꦭꦗꦼꦁꦔꦏꦼꦤ꧀ꦥꦱꦶꦤꦲꦺꦴꦤ꧀ꦤꦶꦁꦭꦉꦮꦼꦢꦭ꧀ꦭꦤ꧀ꦱꦼꦏꦺꦴꦭꦃꦲꦤ꧀ꦝꦸꦱꦸꦤ꧀꧉
꧋ꦠꦸꦩꦿꦥ꧀ꦲꦶꦁꦏꦼꦩꦗꦼꦁꦔꦤ꧀ꦢꦒꦁꦱꦩ꧀ꦥꦸꦤ꧀ꦮꦺꦴꦤ꧀ꦠꦼꦤ꧀ꦥꦼꦏꦼꦤ꧀ꦝꦸꦱꦸꦤ꧀ 3 ꦭꦤ꧀ꦲꦸꦒꦶꦮꦺꦴꦤ꧀ꦠꦼꦤ꧀ꦥꦼꦏꦼꦤ꧀ꦤꦶꦥꦸꦤ꧀ꦏꦼꦮꦤ꧀ 1 ꦲꦤꦔꦶꦁꦤꦩꦸꦁꦢꦶꦥꦸꦤ꧀ꦲꦁꦒꦼ 1 ꦮꦸꦭꦤ꧀ꦱꦥꦶꦱ꧀ꦱꦤ꧀꧉
꧋ꦏꦁꦒꦼꦲꦶꦁꦏꦱꦫꦱ꧀ꦱꦤ꧀ꦤꦶꦁꦧꦢꦤ꧀ꦠꦸꦮꦤ꧀ꦝꦺꦴꦏ꧀ꦠꦼꦂꦒꦸꦥꦽꦩꦺꦤ꧀ꦲꦶꦁꦡꦚ꧀ꦗꦸꦁꦏꦫꦁ꧈ꦱꦧꦼꦤ꧀ꦲꦶꦁꦢꦶꦤ꧀ꦠꦼꦤ꧀ꦱꦭꦱꦝꦠꦼꦁꦲꦶꦁꦝꦸꦱꦸꦤ꧀ꦒꦝꦶꦁꦩꦫꦶꦁꦔꦶꦗꦩ꧀ꦥꦶꦝꦠꦼꦁꦠꦶꦪꦁꦱꦏꦶꦠ꧀ꦏꦤ꧀ꦛꦶꦭꦭꦲꦤ꧀ꦤꦤ꧀꧈ꦏꦗꦮꦶꦥꦸꦤꦶꦏꦏꦁꦒꦼꦲꦶꦁꦱꦧꦼꦤ꧀ꦢꦶꦤ꧀ꦠꦼꦤ꧀ꦤꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦩꦤ꧀ꦠꦿꦶꦥꦼꦂꦥ꧀ꦭꦶꦒꦼꦂꦲꦶꦁꦏꦁꦏꦏꦸꦮꦱꦏ꧀ꦲꦏꦼꦤ꧀ꦚꦸꦏꦤ꧀ꦤꦶꦗꦩ꧀ꦥꦶꦲꦶꦁꦏꦁꦒꦩ꧀ꦥꦶꦭ꧀ꦒꦩ꧀ꦥꦶꦭ꧀꧈ꦲꦸꦒꦶꦭꦭꦲꦤ꧀ꦤꦤ꧀꧉
꧋ꦕꦼꦏꦏ꧀ꦏꦶꦁꦕꦫꦶꦪꦺꦴꦱ꧀꧈ꦲꦶꦁꦔꦿꦶꦏꦸꦠꦶꦪꦁꦗꦮꦶꦤꦩꦲꦩꦁꦒꦶꦃꦱꦶꦠꦶꦲꦸꦠꦃꦫꦃꦲꦶꦥꦸꦤ꧀ꦲꦶꦁꦏꦁꦤꦺꦴꦩꦼꦂꦏꦭꦶꦃ꧈ꦤꦶꦔꦭ꧀ꦭꦶꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦲꦶꦁꦔꦿꦶꦏꦸ꧈ꦱꦗꦏ꧀ꦏꦶꦥꦸꦤ꧀ꦱꦢꦪꦱꦩꦶꦏꦕꦼꦏꦥ꧀ꦥꦤ꧀ꦲꦶꦁꦒꦼꦱꦁꦔꦶꦥꦸꦤ꧀ꦱꦂꦠꦏꦱꦼꦤꦼꦁꦔꦤ꧀ꦲꦶꦁꦩꦤꦃꦲꦶꦥꦸꦤ꧀꧉
꧋ꦏꦁꦒꦼꦲꦶꦁꦱꦥꦸꦤꦶꦏꦤ꧀ꦤꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦠꦶꦪꦁ 6 ꦱꦏꦶꦁꦏꦺꦴꦭꦺꦴꦤꦶꦱꦱꦶꦲꦶꦁꦏꦁꦱꦩ꧀ꦥꦸꦤ꧀ꦱꦒꦼꦢ꧀ꦒꦝꦃꦩꦺꦴꦧꦶꦭ꧀꧈ꦏꦥꦫꦏꦸꦭꦱꦸꦩꦼꦉꦥ꧀ꦠꦶꦪꦁ 1 ꦒꦝꦃꦩꦺꦴꦧꦶꦭ꧀ 3 ꦲꦶꦗꦶ꧉
(ꦧꦝꦼꦏꦱꦩ꧀ꦧꦼꦠ꧀ꦠꦤ꧀)
