ꦔꦺꦴꦚ꧀ꦕꦠ꧀ꦠꦶꦧꦼꦧꦪ꧉ꦥꦚꦺꦴꦁꦏ꧀ꦭꦁꦔꦶꦁꦏꦥꦭ꧀ꦏꦸꦭꦧꦺꦴꦠꦼꦤ꧀ꦏꦺꦤ꧀ꦢꦼꦭ꧀ꦏꦺꦤ꧀ꦢꦼꦭ꧀꧈ꦲꦔ꧀ꦭꦁꦏꦸꦁꦔꦶꦩꦂꦒꦶꦲꦶꦁꦏꦁꦲꦚ꧀ꦗꦸꦊꦒ꧀ꦱꦔꦼꦠ꧀꧉ꦏꦸꦭꦲꦺꦔꦼꦠ꧀꧈ꦧꦶꦭꦶꦃꦏꦭꦱꦩꦤ꧀ꦠꦼꦤ꧀ꦥꦼꦠꦼꦁꦱꦂꦠꦏꦥꦶꦉꦁꦱ꧀ꦮꦫꦤꦶꦥꦸꦤ꧀ꦱꦶꦔꦥꦠꦶꦁꦒꦊꦫꦺꦴ꧈ꦏꦗꦮꦶꦥꦸꦤꦶꦏꦏꦸꦭꦲꦺꦔꦼꦠ꧀ꦲꦸꦒꦶꦮꦺꦴꦤ꧀ꦠꦼꦤ꧀ꦱꦶꦔꦱꦠꦸꦁꦒꦭ꧀ꦲꦤꦸꦧꦿꦸꦏ꧀ꦏꦥꦭ꧀ꦏꦸꦭ꧈ꦱꦂꦠꦏꦸꦭꦩꦶꦉꦁꦲꦁꦒꦺꦤ꧀ꦤꦶꦥꦸꦤ꧀ꦧꦼꦏꦺꦂꦧꦼꦏꦺꦂ꧈ꦱ꧀ꦮꦫꦤꦶꦥꦸꦤ꧀ꦩꦼꦩꦼꦭꦱ꧀꧉ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦥꦸꦤꦶꦏꦏꦸꦭꦧꦺꦴꦠꦼꦤ꧀ꦲꦺꦔꦼꦠ꧀ꦩꦭꦶꦃ꧉ꦱꦸꦩꦼꦉꦥ꧀ꦱꦸꦩꦼꦉꦥ꧀꧈ꦏꦸꦭꦱꦩ꧀ꦥꦸꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦱꦊꦧꦼꦠ꧀ꦠꦶꦁꦥꦠꦩꦤ꧀ꦤꦤ꧀ꦤꦶꦁꦒꦿꦶꦪꦲꦶꦁꦏꦁꦱꦲꦼ꧈ꦲꦶꦁꦏꦁꦢꦶꦥꦸꦤ꧀ꦲꦼꦁꦒꦺꦤ꧀ꦤꦶꦢꦼꦤꦶꦁꦠꦶꦪꦁꦲꦺꦱ꧀ꦠꦿꦶꦱꦮꦠꦮꦶꦱ꧀꧈ꦠꦶꦠꦶꦪꦁꦮꦲꦸꦱꦩꦶꦲꦺꦤ꧀ꦢꦃꦲꦺꦤ꧀ꦢꦃꦫꦸꦥꦶꦤꦶꦥꦸꦤ꧀꧉ꦱꦏꦶꦁꦥꦤ꧀ꦢꦸꦒꦶꦏꦸꦭꦠꦸꦫꦸꦤꦶꦁꦧꦺꦴꦁꦱꦲꦧꦼꦱ꧀ꦱꦶ꧉
꧋ꦠꦸꦮꦤ꧀ꦥꦿꦺꦴꦥꦼꦱꦺꦴꦂ꧇ ꦧꦺꦴꦏ꧀ꦩꦤꦮꦲꦶꦪꦱꦭꦃꦱꦮꦶꦗꦶꦤꦶꦁꦧꦺꦴꦁꦱꦆꦱꦿꦲꦶꦭ꧀ꦏꦁꦲꦢꦸꦢꦸꦤꦸꦁꦲꦶꦁꦏꦺꦴꦤꦺꦴ꧉
꧋ꦲꦁꦒꦺꦤ꧀ꦤꦶꦥꦸꦤ꧀ꦮꦶꦕꦤ꧀ꦠꦼꦤ꧀ꦠꦸꦮꦤ꧀ꦥꦿꦺꦴꦥꦼꦱꦺꦴꦂꦩꦏꦠꦼꦤ꧀ꦥꦸꦤꦶꦏꦱꦼꦩꦸꦤꦶꦥꦸꦤ꧀ꦏꦭꦶꦪꦤ꧀ꦲꦔꦼꦫꦁꦲꦺꦫꦁꦱꦂꦮꦶꦲꦸꦢꦸꦢ꧀ꦥꦶꦥꦤꦶꦥꦸꦤ꧀꧉ꦏꦸꦭꦩꦁꦱꦸꦭ꧀ꦭꦶ꧇ꦧꦺꦴꦏ꧀ꦩꦤꦮꦧꦼꦤꦼꦂꦏꦪꦥꦔꦤ꧀ꦢꦶꦏꦩꦸꦲꦶꦏꦸ꧈ꦧꦼꦱꦸꦏ꧀ꦢꦏ꧀ꦠꦼꦫꦁꦔꦏꦼꦏꦁꦭꦸꦮꦶꦃꦕꦼꦛ꧉
꧋ꦏꦸꦭꦤꦸꦤ꧀ꦠꦼꦤ꧀ꦲꦔ꧀ꦭꦗꦼꦁꦔꦏꦼꦤ꧀ꦕꦫꦶꦪꦺꦴꦱ꧀ꦏꦸꦭꦠꦶꦠꦶꦪꦁꦲꦶꦁꦏꦁꦩꦼꦭꦱ꧀ꦱꦶꦮꦲꦸꦧꦁꦱ Abati꧉ꦏꦶꦛꦲꦶꦁꦏꦁꦢꦶꦥꦸꦤ꧀ꦢꦸꦤꦸꦁꦔꦶꦏꦮꦱ꧀ꦠꦤ꧀ꦤꦤ꧀ Mur꧉ꦠꦶꦠꦶꦪꦁꦮꦲꦸꦱꦩꦶꦕꦫꦶꦪꦺꦴꦱ꧀꧈ꦠꦸꦫꦸꦤ꧀ꦤꦶꦥꦸꦤ꧀ꦧꦺꦴꦁꦱꦲꦧꦼꦱ꧀ꦱꦶꦭꦤ꧀ꦧꦺꦴꦁꦱꦪꦲꦸꦢꦶ꧉ꦮꦠꦮꦶꦱ꧀ꦱꦏꦮꦤ꧀ꦲꦸꦠꦮꦶꦒꦁꦱꦭ꧀ꦲꦠꦸꦱ꧀ꦠꦲꦸꦤ꧀ꦲꦶꦁꦏꦁꦏꦥꦼꦁꦏꦼꦂꦏꦠꦸꦤ꧀ꦝꦸꦁꦱꦏꦶꦁꦤꦒꦫꦶꦤꦶꦥꦸꦤ꧀꧈ꦤꦸꦤ꧀ꦠꦼꦤ꧀ꦩꦁꦒꦺꦤ꧀ꦲꦶꦁ Mur ꦥꦸꦤꦶꦏ꧉ꦫꦸꦥꦶꦤꦶꦥꦸꦤ꧀ꦲꦶꦁꦒꦶꦃꦩꦺꦩ꧀ꦥꦼꦂꦠꦶꦪꦁꦪꦲꦸꦢꦶ꧈ꦩꦏꦠꦼꦤ꧀ꦲꦸꦒꦶꦲꦒꦩꦶꦤꦶꦥꦸꦤ꧀ꦲꦶꦁꦒꦶꦃꦩꦺꦩ꧀ꦥꦼꦂꦲꦒꦩꦶꦪꦲꦸꦢꦶ꧉ꦧꦺꦴꦁꦱ Abati ꦥꦸꦤꦶꦏꦫꦒꦶꦱꦲꦼꦧꦼꦧꦸꦢꦺꦤ꧀ꦤꦶꦥꦸꦤ꧀ꦱꦂꦠꦥꦶꦤ꧀ꦠꦼꦂ꧈ꦲꦤꦔꦶꦁꦲꦶꦁꦱꦫꦺꦃꦤꦼꦠꦤ꧀ꦱꦃꦗꦺꦴꦗꦺꦴꦝꦺꦴꦮꦤ꧀ꦏꦭꦶꦪꦤ꧀ꦧꦺꦴꦁꦱꦤꦶꦥꦸꦤ꧀ꦥꦶꦪꦩ꧀ꦧꦏ꧀꧈ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦢꦢꦺꦴꦱ꧀ꦩꦸꦤ꧀ꦢꦸꦂꦱꦔꦼꦠ꧀꧈ꦕꦕꦃꦗꦶꦮꦤꦶꦥꦸꦤ꧀ꦱꦁꦱꦪꦭꦩꦶꦱꦁꦱꦪꦱꦸꦢ꧉ꦮꦠꦮꦶꦱ꧀ꦠꦶꦒꦲꦸꦠꦮꦶꦏꦮꦤ꧀ꦠꦸꦫꦸꦤ꧀ꦤꦤ꧀ꦏꦥꦼꦁꦏꦼꦂꦧꦺꦴꦁꦱ Abati ꦮꦲꦸꦠꦏ꧀ꦱꦶꦃꦱꦒꦼꦢ꧀ꦔꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦥꦿꦗꦸꦫꦶꦠ꧀ꦏꦭꦶꦃꦢꦱꦲꦺꦮꦸ꧈ꦱꦥꦸꦤꦶꦏꦤꦩꦸꦁꦏꦤ꧀ꦠꦸꦤ꧀ꦱꦔꦁꦲꦺꦮꦸ꧉ꦧꦺꦴꦁꦱ Abati ꦥꦸꦤꦶꦏꦠꦤ꧀ꦱꦃꦲꦗꦿꦶꦃꦝꦠꦼꦁꦩꦼꦁꦱꦃꦲꦶꦥꦸꦤ꧀ꦧꦸꦧꦸꦪꦸꦠ꧀ꦠꦤ꧀꧈ꦲꦶꦁꦒꦶꦃꦥꦸꦤꦶꦏꦧꦁꦱ Fung ꦏꦱꦼꦧꦸꦠ꧀ꦲꦶꦁꦔꦶꦁꦒꦶꦭ꧀꧈ꦲꦶꦁꦏꦁꦤꦒꦫꦶꦤꦶꦥꦸꦤ꧀ꦢꦸꦩꦸꦤꦸꦁꦲꦶꦁꦱꦏꦸꦧꦼꦁꦔꦶꦁꦠꦤꦃꦥꦉꦢꦺꦤ꧀ Mur꧈ꦲꦮꦶꦠ꧀ Mur ꦥꦸꦤꦶꦏꦲꦶꦁꦏꦁꦱꦸꦮꦲꦸꦒꦝꦃꦲꦤ꧀ꦤꦶꦥꦸꦤ꧀ꦭꦸꦭꦸꦲꦸꦂꦫꦶꦁꦧꦺꦴꦁꦱ Fung꧉
꧋ꦏꦥ꧀ꦠꦶꦤ꧀ Orme꧇ ꦱꦩꦶꦤꦶꦥꦸꦤ꧀ꦯꦼꦥꦚꦺꦴꦭ꧀ꦏꦭꦶꦲꦤ꧀ꦒꦶꦨꦿꦭ꧀ꦠꦂ꧉ꦏꦸꦭꦩꦁꦱꦸꦭ꧀ꦭꦶ꧇ꦲꦤꦔꦶꦁꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦧꦼꦢ꧈ꦲꦮꦶꦠ꧀ꦧꦺꦴꦁꦱ Abati ꦲꦶꦁꦏꦁꦲꦔꦼꦧꦿꦺꦴꦏ꧀ꦏꦶꦒꦶꦨꦿꦭ꧀ꦠꦂꦲꦶꦁꦄꦦꦿꦶꦏꦃꦠꦼꦔꦃꦥꦸꦤꦶꦏꦱꦩ꧀ꦥꦸꦤ꧀ꦩꦸꦤ꧀ꦢꦸꦂꦱꦔꦼꦠ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀꧉ꦤꦔꦶꦁꦧꦺꦴꦁꦱ Fung ꦲꦶꦁꦏꦁꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦱꦩꦶꦏꦭꦶꦪꦤ꧀ꦧꦺꦴꦁꦱꦯꦼꦥꦚꦺꦴꦭ꧀꧈ꦱꦩꦶꦏꦶꦪꦠ꧀ꦏꦶꦪꦠ꧀ꦱꦂꦠꦏꦼꦤ꧀ꦢꦼꦭ꧀꧉
꧋ꦠꦸꦮꦤ꧀ꦥꦿꦺꦴꦥꦼꦱꦺꦴꦂ꧇ ꦏꦥꦿꦶꦪꦼꦧꦚ꧀ꦗꦸꦂꦫꦼꦕꦫꦶꦪꦺꦴꦱ꧀ꦩꦸꦲꦶꦏꦸ꧈ꦝꦺꦴꦏ꧀ꦠꦼꦂ꧉
꧋ꦱꦭꦗꦼꦁꦔꦶꦥꦸꦤ꧀ꦭꦶꦩꦿꦃꦏꦼꦩꦮꦺꦴꦤ꧀꧈ꦏꦸꦭꦚꦺꦴꦧꦶꦲꦔꦽꦩ꧀ꦧꦒ꧀ꦒꦶꦧꦺꦴꦁꦱ Abati ꦱꦸꦥꦢꦺꦴꦱ꧀ꦥꦸꦫꦸꦤ꧀ꦤꦔꦼꦩ꧀ꦥꦭ꧀ꦭꦏꦼꦤ꧀ꦥꦿꦗꦸꦫꦶꦠ꧀ꦏꦁꦒꦼꦩꦼꦫꦁꦔꦶꦩꦼꦁꦱꦃꦲꦶꦥꦸꦤ꧀꧈ꦱꦒꦼꦢ꧀ꦢꦲꦤꦸꦭꦸꦁꦔꦶꦲꦤꦏ꧀ꦏꦸꦭꦲꦶꦁꦏꦁꦢꦢꦺꦴꦱ꧀ꦉꦚ꧀ꦕꦁꦠꦸꦩ꧀ꦧꦱ꧀ꦱꦤ꧀ꦮꦲꦸ꧉ꦤꦔꦶꦁꦠꦶꦠꦶꦪꦁꦮꦲꦸꦱꦢꦪꦱꦩꦶꦲꦁꦒꦼꦒꦸꦗꦼꦁꦝꦠꦼꦁꦏꦸꦭ꧉ꦮꦸꦱꦤꦏꦸꦭꦱꦸꦩꦼꦉꦥ꧀꧈ꦧꦶꦭꦶꦃꦤꦩꦸꦁꦮꦺꦴꦤ꧀ꦠꦼꦤ꧀ꦱꦠꦸꦁꦒꦭ꧀ꦲꦶꦁꦏꦁꦥꦸꦫꦸꦤ꧀ꦲꦩꦤꦃꦝꦠꦼꦁꦉꦩ꧀ꦧꦒ꧀ꦏꦸꦭꦮꦲꦸ꧈ꦲꦶꦁꦒꦶꦃꦥꦸꦤꦶꦏꦫꦠꦸꦤꦶꦥꦸꦤ꧀꧈ꦮꦤꦶꦠ꧈ꦲꦶꦁꦏꦁꦗꦸꦗꦸꦭꦸꦏ꧀ Walda Nagasta ꦲꦸꦠꦮꦶꦠꦸꦫꦸꦤ꧀ꦤꦶꦁꦫꦗꦫꦗ꧈ꦱꦂꦠꦲꦶꦁꦏꦁꦲꦸꦒꦶꦲꦗꦸꦗꦸꦭꦸꦏ꧀ Takla Warda ꦲꦸꦠꦮꦶꦏꦸꦚ꧀ꦕꦸꦥ꧀ꦥꦶꦁꦱꦼꦏꦂꦫꦸꦱ꧀꧈ꦢꦺꦤꦺꦲꦱ꧀ꦩꦤꦶꦥꦸꦤ꧀ꦥꦶꦪꦩ꧀ꦧꦏ꧀ Macqueda꧉
꧋ꦠꦸꦮꦤ꧀ꦥꦿꦺꦴꦥꦼꦱꦺꦴꦂ꧇ꦥꦫꦫꦗꦥꦸꦠꦿꦶꦲꦶꦁꦯꦼꦧꦲꦶꦁꦏꦁꦩꦶꦱꦸꦮꦸꦂꦲꦶꦪꦲꦤꦏꦁꦲꦱ꧀ꦩꦤꦼꦏꦪꦩꦁꦏꦺꦴꦤꦺꦴ꧈ꦲꦤꦩꦤꦺꦃꦏꦁꦲꦱ꧀ꦩꦤꦼ Balkis꧉
꧋ꦏꦸꦭꦲꦔ꧀ꦭꦗꦼꦁꦔꦏꦼꦤ꧀ꦕꦫꦶꦪꦺꦴꦱ꧀ꦏꦸꦭ꧇ꦲꦶꦁꦱꦫꦺꦃꦤꦼꦥꦿꦤꦠꦤ꧀ꦲꦶꦁꦤꦒꦫꦶ Mur ꦮꦲꦸꦏꦭꦩ꧀ꦥꦃꦲꦏꦼꦤ꧀ꦏꦼꦚ꧀ꦕꦼꦁꦱꦔꦼꦠ꧀꧈ꦏꦸꦭꦧꦺꦴꦠꦼꦤ꧀ꦏꦼꦔꦶꦁꦱꦺꦴꦮꦤ꧀ꦲꦶꦁꦱꦁꦫꦗꦥꦸꦠꦿꦶꦲꦔꦽꦩ꧀ꦧꦒ꧀ꦥꦿꦏꦮꦶꦱ꧀ꦲꦶꦁꦏꦁꦏꦸꦭꦥꦶꦏꦗꦼꦁꦔꦏꦼꦤ꧀ꦮꦲꦸ꧉ꦱꦒꦼꦢ꧀ꦢꦶꦥꦸꦤ꧀ꦏꦭꦩ꧀ꦥꦃꦲꦤ꧀ꦤꦩꦸꦁꦱꦫꦤꦲꦥꦶꦲꦥꦶꦱꦺꦴꦮꦤ꧀ꦱꦁꦥꦸꦠꦿꦶꦩꦂꦒꦶꦤꦤ꧀ꦝꦁꦒꦼꦫꦃ꧉ꦩꦶꦠꦸꦫꦸꦠ꧀ꦥꦔꦤ꧀ꦢꦶꦏꦤꦶꦥꦸꦤ꧀ꦱꦁꦫꦗꦥꦸꦠꦿꦶ꧈ꦧꦿꦲꦭꦲꦶꦁꦏꦁꦱꦶꦤꦼꦩ꧀ꦧꦃꦱꦼꦩ꧀ꦧꦃꦢꦼꦤꦶꦁꦧꦺꦴꦁꦱ Fung ꦥꦸꦤꦶꦏꦮꦸꦗꦸꦢ꧀ Sphinx(*) ꦲꦒꦼꦁꦱꦔꦼꦠ꧀꧉ꦲꦶꦁꦏꦁꦩꦏꦠꦼꦤ꧀ꦥꦸꦤꦶꦏꦱꦏꦶꦁꦥꦔꦶꦤ꧀ꦠꦼꦤ꧀ꦏꦸꦭꦥꦶꦪꦩ꧀ꦧꦏ꧀꧈ꦩꦶꦠꦸꦫꦸꦠ꧀ꦱꦏꦶꦁꦏꦠꦿꦁꦔꦤ꧀ꦤꦶꦥꦸꦤ꧀ꦫꦗꦥꦸꦠꦿꦶꦮꦲꦸ꧈ꦲꦮꦶꦠ꧀ꦏꦸꦭꦥꦶꦪꦩ꧀ꦧꦏ꧀ꦢꦺꦫꦺꦁꦤꦠꦼꦱꦸꦩꦼꦉꦥ꧀ꦮꦸꦗꦸꦢ꧀ꦢꦶꦁꦧꦿꦲꦭꦮꦲꦸ꧉
꧋ꦱꦉꦁꦠꦸꦮꦤ꧀ꦥꦿꦺꦴꦥꦼꦱꦺꦴꦂꦩꦶꦉꦁꦮꦶꦕꦤ꧀ꦠꦼꦤ꧀ꦏꦸꦭꦲꦶꦁꦏꦁꦩꦏꦠꦼꦤ꧀ꦥꦸꦤꦶꦏ꧈ꦤꦸꦤ꧀ꦠꦼꦤ꧀ꦩꦼꦚꦠ꧀ꦱꦏꦶꦁꦥꦭꦶꦁꦒꦶꦃꦲꦤ꧀ꦤꦶꦥꦸꦤ꧀ꦱꦂꦮꦶꦮꦶꦕꦤ꧀ꦠꦼꦤ꧀ꦱꦼꦩꦸꦒꦸꦩꦸꦤ꧀꧇ꦏꦥꦿꦶꦪꦼꦥꦔꦤ꧀ꦢꦶꦏꦩꦸꦲꦶꦏꦸ꧈ꦝꦺꦴꦏ꧀ꦠꦼꦂ꧈ꦲꦶꦁꦄꦦꦿꦶꦏꦃꦠꦼꦔꦃꦏꦁꦱꦶꦱꦶꦃꦭꦺꦴꦂꦲꦤ Sphinx? ꦤꦔꦶꦁꦧꦶꦱꦲꦸꦒꦲꦤ꧈ꦗꦭꦂꦫꦤ꧀ꦩꦶꦠꦸꦫꦸꦠ꧀ꦲꦸꦗꦂꦫꦶꦁꦕꦫꦶꦠ꧈ꦫꦗꦫꦗꦲꦶꦁꦩꦼꦱꦶꦂꦏꦁꦮꦶꦮꦶꦠ꧀ꦠꦤ꧀꧈ꦲꦤꦏꦁꦠꦼꦥꦸꦁꦭꦤ꧀ꦧꦁꦱꦧꦁꦱꦲꦶꦁꦄꦦꦿꦶꦏꦃꦠꦼꦔꦃꦲꦶꦏꦸ꧉ꦩꦭꦃꦲꦤꦏꦁꦕꦫꦶꦠꦥꦫꦫꦗꦩꦲꦸꦲꦤꦏꦁꦤꦼꦝꦏ꧀ꦏꦶꦠꦤꦃꦄꦦꦿꦶꦏꦃꦠꦼꦔꦃꦲꦶꦏꦸ꧉ꦲꦺꦤ꧀ꦝꦱ꧀ꦱꦼꦩꦼꦱ꧀ꦛꦶꦤꦼꦏꦪꦲꦼꦤ꧀ꦝꦱ꧀ꦱꦶꦁꦮꦼꦝꦸꦱ꧀ꦭꦤꦁ꧈ꦝꦺꦴꦏ꧀ꦠꦼꦂ꧉
꧋ꦏꦸꦭꦲꦔ꧀ꦭꦗꦼꦁꦔꦏꦼꦤ꧀ꦲꦁꦒꦺꦤ꧀ꦏꦸꦭꦕꦫꦶꦪꦺꦴꦱ꧀꧇ ꦱꦁꦫꦗꦥꦸꦠꦿꦶꦲꦸꦒꦶꦔꦤ꧀ꦢꦶꦏ꧈ꦧꦶꦭꦶꦃꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦥꦶꦠꦢꦺꦴꦱ꧀꧈ꦩꦤꦮꦶꦧꦿꦲꦭꦲꦶꦁꦏꦁꦲꦼꦤ꧀ꦝꦱ꧀ꦱꦶꦥꦸꦤ꧀ꦏꦢꦺꦴꦱ꧀ꦲꦼꦤ꧀ꦝꦱ꧀ꦱꦶꦁꦱꦶꦔꦥꦸꦤꦶꦏ꧈ꦧꦺꦴꦠꦼꦤ꧀ꦏꦢꦺꦴꦱ꧀ꦲꦼꦤ꧀ꦝꦱ꧀ꦱꦶꦁꦩꦼꦤ꧀ꦢꦗꦊꦂ꧈ꦱꦲꦏꦮꦱ꧀ꦠꦤ꧀ꦤꦤ꧀ Harmac꧈ꦏꦫꦶꦱꦏ꧀ꦧꦺꦴꦁꦱ Fung ꦲꦶꦁꦏꦁꦧꦝꦼꦱꦩꦶꦭꦸꦩꦗꦼꦁꦤꦶꦭꦂꦤꦒꦫꦶꦤꦶꦥꦸꦤ꧀꧈ꦲꦚꦧꦿꦁꦭꦺꦥꦺꦤ꧀ꦲꦶꦁꦏꦁꦩꦶꦭꦶꦩꦔꦶꦢꦸꦭ꧀꧉
꧋ꦠꦸꦮꦤ꧀ Higgs ꦚꦼꦭꦤ꧀ꦤꦶꦉꦩ꧀ꦧꦒ꧀꧇ Harmac! ꦩꦁꦏꦺꦴꦤꦺꦴꦲꦸꦒꦗꦼꦤꦼꦁꦔꦼꦱꦭꦃꦱꦮꦶꦗꦶꦤꦶꦁ Sphinx-Harmachis꧈ꦠꦼꦒꦼꦱ꧀ꦱꦼꦄꦭ꧀ꦭꦃꦲꦶꦁꦱꦸꦂꦪ꧉
꧋ꦏꦸꦭꦤꦸꦤ꧀ꦠꦼꦤ꧀ꦥꦶꦠꦏꦺꦤ꧀ꦝꦠꦼꦁꦱꦁꦫꦗꦥꦸꦠꦿꦶ꧈ꦥꦸꦤꦥꦲꦧꦺꦴꦁꦱꦄꦧꦠꦶꦧꦺꦴꦠꦼꦤ꧀ꦥꦸꦫꦸꦤ꧀ꦲꦔꦿꦶꦱꦏ꧀ꦧꦿꦲꦭꦮꦲꦸ꧉ꦱꦁꦫꦗꦥꦸꦠꦿꦶꦒꦸꦩꦸꦗꦼꦁꦱꦂꦠꦔꦤ꧀ꦢꦶꦏꦧꦶꦭꦶꦃꦧꦺꦴꦠꦼꦤ꧀ꦧꦝꦼꦱꦒꦼꦢ꧀ꦏꦭꦩ꧀ꦥꦃꦲꦤ꧀꧈ꦲꦮꦶꦠ꧀ꦧꦿꦲꦭꦮꦲꦸꦲꦮꦸꦗꦸꦢ꧀ꦱꦼꦭꦲꦒꦼꦁꦏꦢꦺꦴꦱ꧀ꦉꦢꦶꦲꦤꦏ꧀ꦏꦤ꧀꧉ꦏꦥꦶꦁꦏꦭꦶꦃꦲꦶꦥꦸꦤ꧀ꦧꦶꦭꦶꦃꦱꦩ꧀ꦥꦸꦤ꧀ꦭꦩꦶꦧꦺꦴꦁꦱ Abati ꦧꦺꦴꦠꦼꦤ꧀ꦒꦝꦃꦏꦮꦤ꧀ꦠꦼꦂꦫꦤ꧀ꦱꦂꦠꦱꦩꦶꦢꦢꦺꦴꦱ꧀ꦗꦶꦫꦶꦃꦱꦢꦪ꧈ꦱꦂꦠꦱꦩ꧀ꦥꦸꦤ꧀ꦱꦩꦶꦤꦫꦶꦩꦃꦩꦁꦒꦺꦤ꧀ꦲꦶꦁꦤꦒꦫꦶꦲꦶꦁꦏꦁꦲꦼꦭꦺꦴꦃꦱꦶꦠꦶꦤꦶꦥꦸꦤ꧀ꦱꦂꦠꦏꦶꦤꦸꦧꦼꦁꦲꦶꦁꦥꦉꦢꦺꦤ꧀ꦲꦶꦁꦏꦁꦱꦤ꧀ꦠꦺꦴꦱꦥꦸꦤꦶꦏ꧉ꦲꦶꦁꦏꦁꦏꦥꦼꦂꦭꦺꦴꦏ꧀ꦲꦏꦼꦤ꧀ꦤꦩꦸꦁꦱꦒꦼꦢ꧀ꦢꦥꦶꦏꦤ꧀ꦠꦸꦏ꧀ꦱꦼꦱꦼꦧꦸꦠ꧀ꦠꦤ꧀ꦲꦶꦁꦏꦁꦱꦲꦼꦱꦲꦏꦲꦸꦂꦩꦠꦤ꧀꧈ꦔꦤ꧀ꦠꦺꦴꦱ꧀ꦢꦸꦩꦸꦒꦶꦲꦶꦁꦩꦁꦱꦲꦤꦼꦩꦃꦲꦶꦕꦶꦭꦏ꧉
(*)Sphinx ꦥꦸꦤꦶꦏꦉꦕꦱꦶꦔꦱꦶꦫꦃꦩꦤꦸꦱ꧈ꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦲꦶꦁꦠꦤꦃꦩꦼꦯꦶꦂ꧉
(ꦧꦝꦼꦏꦱꦩ꧀ꦧꦼꦠ꧀ꦠꦤ꧀)
