Mandanga parasaian Lembak Tuah kadang2 manaruah rusuah kadang2 tagalak galak sanan bakato Rabiatun dangakan dek mande mulo batamu djolong basuo djo Lembak Tuah injo sarupo urang mintak sadalaj kaki dikabek sabalah kida sarupo urang kanai tukak pakaian buruak kujak kujak ruponjo mantjubo hati denai mandanga kato nan bak kian rijuahlah galak tangah rumah mandanga tjurito Lembak Tuah.
_ Alah sapakan duo pakan alah tjukuik tigo pakan sadjak pulang dari Padang sanan bakato Datuak Tungga kapado mande Rabiatun lorong kapado si Rabiatun elok lansuangkan alek kawin tidak guno balalai lalai takalo hari lai lapang maklumlah Sultan Lembak Tuah urang karadjo dalam nagari tidak ado hari nan talapang gilo kumisi tiok hari tjubolah uleh kamandenjo elok elok kalau batutua pandai pandai kalau bakato usah kato tadorong dorong maalumlah injo mande Damang.
Mandanga kato nan bak kian bakato tjando mande Rabiatun manolah Datuak adiak denai satantang kato Datuak nantun dihambo alah tapikia djuo hari barisuak hambo turuik hambo djalang kakampuang Dalam buliah ditjari kato supakaik katonjo mande Rabiatun kan ijo mande Rabiatun alah siang tjandonjo hari badjalan anjo kakampuang Dalam karumah mande Saadijah ijo mande kanduang Tuanku Damang badjalan tagageh-gageh dibao untjang siriah pinang pambukak muluik djolong bakato.
Alah sarantang padjalanan tjukuik kaduo rantang pandjang hampia katibo hanjo lai alah tibo dihalaman mandjanguah mande Tuanku Damang lah tampak mande Rabiatun bakato mande Lembak Tuah
Tiubadak tangah halaman
Didjuluak djo hampu kaki
Usah kakak tagak dihalaman
Itu tjibuak basuahlah kaki
