pinang sisunguik marantiang batuang gigi sagadang baliung bunji tapaknjo badabua dabua tadanga sahari padjalanan.
Kan io Puti Nilam Tjajo malang tibo didirinjo dibao lari dek raksasa dimasuakkan kadalam saku badju dibao badjalan kapondoknjo.
Kalau diliek pondok raksasa bak bukik tangah rimbo tunggaknjo tinggi mambubung langik pandjangnjo sasajuik mato mamandang disanan pondok tampek diam injo baduo laki bini.
Diambiaknjo si Nilam dalam sakui dilatakkan di ateh medja diliek dipandang Nilam Tjajo galak tabahak kaduonjo mandanga galak raksasa tagamang takadjuik Nilam Tjajo suara sarupo guruah patuih,
Lorong kapado Nilam Tjajo tiok hari bahati rusuah rusuah djo takuik mangiroi raso dimakan raksasa tidak ado urang kakawan awak didalam rimbo gadang.
Rumah gadang sambilan ruang Salandja kudo balari Alang sakik batenggang surang Tidak siapo kababiri
Lai limo tahun injo disinan indak dapek tampek lari rimbo labek sakuliling siang malam bahati susah tiok hari katapi pasti maliek kapa nan lalu mamandang kalauik lapeh kok untuang tampak kapa nan sasek sasek kapulau raksasa.
Kan io samaso itu hari nan sadang paneh pagi matohari sapanggalan kiro kiro pukua salapan badjalau manjisia tapi pantai tampak bangkai ditapi pasiaa dilatjuik latjuikan ombak
Kan io si Nilam Tjajo dihelo bangkai nantun di bao kaateh rumpuik dibukak tjando kabek dibadan
