Maliek rupo nan bak kian hibo djo sajang mande kanduang dihimbau sagalo dajang panginang sarato sikambang manih.
Mano kalian kasamonjo baio anakko kalubuak mandikan lakeh padja nangko tuka pakaian djo nan baru sikek rambuik dikapalo.
Kan io sikambang manih dikipak anak dibao ka lubuak dimandikan dikusuaki padja nantun disikek rambuik nan pandjang takanak pakaian sagalo baru batambah rantjak ambun Suri.
Maliek rupo nan bak kian sanang hati mande Radjo injo nan tidak baranak padusi anak surang tungga babeleng kinilah dapek Ambun Suri buliah ka adiak Rambun Sati.
Lah salasai dibari makan sanan bakato mande Radjo mano kau upiak anak mande apo sababnjo anak dirimbo siapo mande djo bapak tarangkan malah dianak sanang pulo hati mande katonjo manede Dang Tuanku.
Mandjawab anak nantun mano hambo si Ambun Suri ibu djo bapak tidak takana karano hambo ketek baru baru baumua limo tahun hambo gadang didukuang dunsanak tuan dihambo Gombang Alam kami diusia masuak rimbo apa salahnjo hambo tak tahu hambo gadang dalam rimbo.
Tuan hambo Gombang Alam mantjari api pamanggang buruang kini hilang sahilangnjo bakato sadang manangih takana tuan hilang dirimbo aia mato bak maniak putuih namuah suruik karimbo nak samo mati djo tuannjo.
Mandanga parasaian padja nantun hibo urang dalam usiano sanan bakato Radjo nantun pasanang hati adiak disiko disuruah urang mantjari si Gombang
