Sanan bakato Dang Tuanku mano kau upiak ma ngapo disiko mangapo upiak manangih djo sia adiak disiko katonjo Radjo nantun.
Sanan mandjawab Ambun Suri lorong kapado hambo disiko kami baduo badunsanak injo kapatang mantjari api pamanggang buruang nangko sampai kini indak datang kamano garan tuan kanduangan antah ditangkok dek harimau bakato sadang manangih.
Maliek rupo nan bak kian aia mato badarai darai bak maniak putuih pangarang hibo tasisik dalam djatuang laruik tulang mamikiakan.
Sanan bakato Radjo nantun usah adjak barusuah bana turuikkan malah hambo pulang indak elok disiko surang sadjo dalam rimbo marilah kito karumah mande diiriangkan badjalan kaparantian.
Maliek rardjak Ambun Suri tatjangang urang nan banjak rupo sabagal bulan panuah,
Kan jo samaso itu dinaiakkan Ambun kaateh gadjah gadjah babaliak pulang baburu diiriangkan kudo anak mantari urang baburu bahati suto barapo galak sorak sorai mandarap bunji tapak kudo.
Dek lamo lambek kudo badjatan hampia katibo dalam kampuang lah tibo dalam nagari tampak ustano balai sari sarato puntjak maligai sanang hati kasamonjo,
Tibo dilaman ustano turunlah urang kasamonjo turun pulo Radjo nantun anak didukuang turun kabawah turun diateh gadjah sati dibao kadalam ustano
Lorong kapado mande kanduang mande kanduang Rambun Sati jolah Radjo Dang Tuanku mandanga anak dapek dirimbo balari lari tjando kabawah dipandang anak sangaik rantjak bak gamba baru dilukih sarupo bidodari turun dilangik.
