Mandanga kato nan bak kian lorong kapado Nangkodoh Baha lalu ditjaliak tabuang nantun tampaklah sanan darah hiduik Allahu Rabbi gadang hatinjo sadjuak rasonjo paratian galak tabahak maso itu:
Lorong dek Kambang Luari bakato injo maso itu: „Manolah tuan Nangkodoh Baha pabilokoh denai kawin elok sugiro malah tuan usahlah di lambek2kan djuo hati basarang gundah djuo”.
Sanan mandjawab Nangkodoh Baha: „Manolah adiak kanduang Kambang Luari salorong tantangan nantun tidak usahlah baguluik bagalosang urang pantjameh gadang kanai bialah lambek asal salamaik tidaklah guno adiak tagamang tantang itu. Urang pantjameh lakeh kanai urang panggamang mati hanjuik kini baitu malah dek adiak bukaklah pakaian nan rantjak nantun deta tukari djo saok kampia badju tukari djo kulit rarok kanakkan sadjo sarawa karok ikolah sabit dengan radjuik sabitkan malah rumpuik untuak kudo usahlah maleh tantang itu kudian buliah adiak kawin”.
Dek urang Kembang Luari dituruik sadjo kato nantun alah dibukak pakaian nan rantjak lalu dilakekkan badju buruak sarawa buruak diambiak sabit dengan radjuik badjalanlah injo pai manjabit rumpuik.
Alah pai injo manjabit rumpuik katanah banto ba-
