Page:Jean Bury - Joyeux rèspleus, 1899.djvu/11

From Wikisource
Jump to navigation Jump to search
This page has been proofread.

— 9 —

A M. HONIN, dè l’Légia
MI COUR

AIR : Gastibelza ou Lèyîz-me Plorer (Defrêcheux).

1

Ji n’ainm’rè pus, ji n’sâreus mâye di m’vèye,
J’a trop soffrou !
Tot côp qu’j’a dis : « Haye, i fât qu’ji rouvèye »
Ji m’a sov’nou !
J’a tant d’né m’cour âx cisses qui n’ainm’ront mâye
Qui j’m’a mâdi !
On m’l’a rindou qui c’n’èsteut pus qu’ine plâye !…
I sônne todis. (Bis.)

2

Ji n’ainm’rè pus ; l’amour est on mystére
Qui m’a trompé !
Ji n’voux pus èsse si flâwe di caractére,
Ji m’a r’happé.
Nou rafiya n’aloum’rè pus m’louqueure,
Mi cour m’èl dit ;
Di nolle goglette i n’ârè mâye pus d’keure
I sônne todis ! (Bis.)

3

Divins les mains d’ine mèchante câcarètte
Mi cour plora …
Ax pîds d’ine aute po quî j’âreus fait n’brètte,
Si song cora.
Rin n’a polou, des sottès brîhes des k’méres
El wérandi,
Et, mâgré tot ! divins les brèsses d’ine mére
I sônne todis ! (Bis.)