Page:Józef Gara - Zbiór wierszy o wilamowskich obrzędach i obyczajach.pdf/8

From Wikisource
Jump to navigation Jump to search
This page has not been proofread.
DY FÜRRYD


 WYMYSOJ EJ A ŚTYTŁA MYT KÜLTÜR, GYBRAOJCHIA AN GYWÖNHAJT. DI RAJCHY KÜLTÜR AN GYBRAOJCHIA BRÖCHTA MEJCH CY DAOM DO YCH DOS WUŁD BYŚRAJWA. YCH WÖN Y WYMYSOJ, DÖ BEJCH GYBIÜN AN UFGYWAOCHSA. DOS ŚRAJWA WAJST YM BESTA WI DY ŁAOJT JYŚTER ŁAOWTA AN ETA. YNZER KYNDYN AN DY ENKYLKYNDYN KENA FU DAOM NY FEJŁ, FELAJCHT FUM FERCYŁA FUN AOŁDA ŁAOJTA HON ZY YCHTA GYHIÜT. WIR MÜSA ZICH BYMIN DO YNZER KÜLTÜR AN DY GYBRAOJCHIA DI WIFUŁ HUNDYT JÜR DÖ WIÜN NY GEJN CYGRUND MYT YNZER WYMYSÖJER ŚPRÖCH CYZOMA.
 ETA WU DY WEŁT ŚNEŁ BYFÜR GEJT AN DY ŁAOJT HON YMER WINGIER CAJT, WEŁA WIR DY WÜCUŁN FU YNZUM OBŚTOMA UFZICHIA. DOWER NY FELIYN DY WYMYSÖJER ŚPRÖCH ŚRAW YCH A WÜTYNBICHŁA FIR DI, DI ZICH MYT DER WYMYSÖJER ŚPRÖCH WEŁA BYFOSA. DY JYŚTY EJ DY WYMYSÖJER ŚPRÖCH, DI GEJT SIUN AMAOŁIK CY END, WIR MÜSA ZY WIEN FU YNZER GAONCA MAOCHT. CY DY JYŚT WYŁ YCH MICH CYN JUNGA WENDA, DO ZY DOS WÜTYNBICHŁA Y DY HAOND NAOMA AN WYMYSÖRYŚ ŁIYN. DY JUNGA ŁIYN ZICH GAON FREMDY ŚPRÖCHA, ZY WYSA DO DOS NEJTŁIK EJ Y DAOR CAJT.
 YCH HO A ZYTY ŚTYŁY MANUNG, DO ZICH DY JUNGA AOJ WYMYSÖRYŚ WAON ŁIYN. DY CAJT WYT WAJZA OB DY WYMYSÖJER ŚPRÖCH WYT EJWERŁAOWA. WIR ZUŁA OK NY DY WYMYSÖJER TRAOCHT AN TAONCA WAJZA, ZUNDER AOJ YNZER ŚPRÖCH FÜRŚTEŁA.

Józef Gara