RABIATUN DIPINANG URANG
Birawari si Marah Jamin - sadang duduak di barando - baduo jo si Upiak Pakan - hari Akaik maso itu - si Marah tidak bakarajo - duduak mangguluang guluang rokok - bakato si Marah ka bininyo - mananyokan si Nurani - anak kanduang tungga babeleng - manjawab si Upiak Pakan - si Nurani bajalan jalan - jo kawan samo gadang - ka Ngalau Kamang Baso - balimo kawannyo - duo urang anak bujang samo samo bakureta - kureta api pukua salapan malapeh lapehkan hati - mandanga kato bininyo - manggauik kapalo Marah Jamin - bakato jo hati mangka, sajauah itu bajalan gadih jo bujang dilapeh - babaua durian jo antimun bacampua api jo rabuak - alamat rusak anak kito - lah banyak didanga anak gadih gadih nan buntiang - ulah anak balapeh unggeh - mandanga kato Marah Jamin - manjawab bininyo - si Nurani anak kito usah disamokan jo nan lain - anak cadiak lai baraka - pandai manjago badannyo tahu hino hima jo malu - mandanga kato demikian - sirah muko Marah Jamin bakato jo dareh - dikau anak bamanjo anak gadang disangko ketek - liyek si Sina anak Mariam - tuo Nurani pado si Sina - kini inyolah baranak - anak di aja manjo - gilo bamain jo bujang bujang - manonton tiok sabanta - asa gambar batuka - inyo ado di dalam - manyamba manggulai indak pandai - mancuci indak pulo - manjahik indak bana - apo tando parampuan - sabuah tidak dipandang urang - patuik bapaknyo mambangih - gadih pagurau panyanyi - tidak ado tingga di rumah - babaju indak balangan tampak katiak jo dado - orok singkek di ateh lutuik tampak batih nan gadang - awak gapuak tinggi gadang - baju samupo anak-anak. Sadang bakato laki bini - ka rumah Mak Saripah - satu tibo galak sanyum - bakato sadang duduak - kunyah siriah dalam kampia - katonyo Mak Saripah - disorongkan siriah di carano - kunyah pulo siriah iko - dikunyah siriah sakapua sorang - bakato Mak Saripah - urang tuo banyak garah
