II
RAJO SAHARI
Pado malam samalam itu—kanai bius ubek lalok—talalok bujang Abu Hasan—baju dituka baju tidua—basulam baameh ameh—pakaian rajo rajo—batitah Sultan Harun Alrasyid—mano kalian isi ustano—baiak dayang panginang—sarato sikambang tujuah puluah—baitu juo panjago pintu—pado hari barisuak joko tasintak anak bujang—pandang kalian sarupo hambo—sabagai inyo jadi rajo—sambah simpuah di kalian—usah kalian galak-galak—apo katonyo turuikkan—sangko bujang nan tidua—manjadi rajo mamarentah—katonyo usah disanggah—ikuik sagalo parentahnyo—katonyo rajo Bagdad—mandanga titah daulat tuanku—badiam diri isi ustano—sorang tidak bakato—bajalan rajo dibaliak tabia—maintai laku Abu Hasan
Pado maso pagi hari-hari sadang paneh pagi—tarang ustano bakiletan—bacayo sagalo ameh—eja kurisi batabua ameh—salo manyalo intan pudi—tunggak baukia bamego mego—ustano gadang bakalebaranpanuah tabantang kasua manggalo—baaleh tika parmadani—parmadani biludu buatan Parsia—sirah kuniang hijau limbayuang pamandangan—tabanam kaki dipijakkan—tampek gadih tari manari—mahibua hati daulat rajo —lampu barantai ameh suaso—babungo bungo bola rampu ado barangkai duo baleh—bukan sarupo lampu kini tibo malam lampu hiduik sinang hari lampu padam—cahayo marayu hati—raso di dalam sarugo. Lorong kapado Abu Hasan tasintak tidua di kulambu—dalam kulambu tujuah lampih kulambu rumin suto—gamarlapan cahayonyo—heran tacangang Abu Hasan—mamandang kiri kanan—dimano garan badan kini—sadang tacangang-cangang sorang—tibo gadih parawan rancak rancak—manyambah gadih katujuahnyo—disusun jari nan sapuluah—diunjuakkan lutuik nan duo—ampun tuanku rajo kami—rajo daulat dang tuanku—mangkuto nagari Bagdad kalau dibunuah kami
