nah kito ka rumah - masuaklah Abdul Gafar - rajo mairing d balakang - duduak baselo dalam rumah - dijamu makan Abu Hasan alah sudah minum makan - dibasuah tangan anyo lai - diisok rokok sabatang asok mandulang kaudaro - bakato wazir Abdul Gafar - kalau baranti lapeh panek - barundiak sudah makan - batanyo kami karang mudo - siapo garan namo anak - manjawab Abu Hasan - namo hambo Abu Hasan - bapak ambo sudah mandahulu kini tingga baduo - baduo jo mande kanduang Mandanga kato Abu Hasan - bakato Rajo Harun Alrasyid - hambo banamo Abdullah - kawan iko Mhd. Saleh - kami saudaga dari Mousul - urang musafir mambali galeh - kato rajo ka Abu Hasan - mandanga kato nan bak kian - bapak ambo saudagar pulo - takalo baliau mati - banyak tingga harato pusako - sawah ladang kabun korma - cukuik taranak kambiang unto - toko ado duo buah tatapi sungguah nan bak kian - hambo indak baniago - pitih dibuek basuko hati - dibao kawan samo gadang - bagurau bahabih pitih - pitih dikaruak tiok hari - tidak ado tukuak tambah - pitih baransua habih juo - kawan bamain malak - bansaik tingga badan sorak - kawan galak nan banyak - kawan manangih tatumbuak sorang -
Ka pulau kito ka pulau
Ka pulau koto subarang
bagurau sama bagurau
bansaik tasisiah badan sorang
Hambo jua unto jo kambiang - kapokok manggaleh - dicubo hiduik baru diubah laku nan buruak - manggaleh badikik-dikik - balanjo dihimatkan Insya Allah tolong Tuhan pulang karelahan lamo - ado tasimpan pitih - tabali galeh duo tigo - tatapi sabuah nan tak hilang - suko manolong urang musikin - manjamu urang musyafir - itu bana kasukoan) kalau ado urang tajamu - sajuak fikiran sanang hati. Sadang bakato damikian diminum anggur tiok sadaguik - taraso angek dado kapalo - mabuak kapayang Abu Hasan - bakato suaro lantang - tidak ado pambuhuran - kato indak baagak-agak - karano minum anggur - kato indak bapamatang asa kato dipakatokan mulo-mulo soal
