HIKAJAT KHONG HOE TJOE.
Apa jang kedjadian dengen Khong Tjoe dalem itoe bebrapa taon sasoedah abis berkaboeng, tida banjak ditoetoerken, tjoemah soedah kataoean pasti jang di itoe tempo ia banjak fahamken iimoe muziek dan perhatiken hikajat koeno, sedeng pendoedoek di negri Lu (Louwkok) semingkin tare harga padanja, hingga iapoenja kamashoeran moelai djoega ter siar ka loear negri, kerna dalem oesia 28 taon katanja ia telah dioendang oleh radja dari negri Yen (Yankok), jang letaknja di sabiah oetara dari Lu, aken minta Khong Tjoe bantoe beresken satoe oeroesan dalem itoe negri. Aken loeloesken itoe ondangan Khong Tjoe telah pergi ka negri Yen, dimana ia karang rentjana aken merobah oendang-oendang dan adat lembaga rahajat, dan koetika ini pakerdja'an soedah slese, ia balik kombali ka negrinja maski oleh Radja dari Yen diminta berdiam lebih lama. Khong Tjoe bilang ia soedah lakoeken kawadjibannja dengen loeloesken perminta'an itoe radja boeat dateng di negrinja, dan dengen balik kombali di Lu, ia lakoeken kawadjiban aken goena koelawarga dan sobat-sobatnja.
Tapi sebab jang betoel dari Khong Tjoe poenja penampihkan pada perminta'annja radja dari Yen brangkali dari lantaran iapoenja persedia'an boeat bekerdja masih blon slese. Masih ada banjak apa-apa lagi jang ia haroes preksa dan fahamken sablonnja bertindak aken lakoeken itoe pakerdja'an besar jang terkandoeng dalem hatinja. Djoega boleh djadi kerna ia sendiri merasa, temponja blon dateng aken ia tjeboerken diri boeat tjoba slametken manoesia, kerna oesianja masih koerang dari 30. Koetika sampe pada ini oesia, Khong Tjoe berkata, bahoea dalem oesia tigapoeloeh taon ia berdiri djelek (tida sangsi atawa limboeng lagi) atas anggepannja dalem segala oeroesan jang berhoeboeng dengen ilmoe pengatahoean
22
