Permoela'an kata.
Isinja ini boekoe ada tjaboetan dari satoe serie artikel jang soedah dimoeat dalem maandbad Moestika Dharma, moelai dari No. 2 (penerbitan Mei 1932) sampe No. 21 (penerbitan December 1933), dengen kalimat „Penghidoepan dan peladjarannja Nabi Khong Hoe Tjoe.” Seperti soedah diterangken dalem M. D. No. 1, kita poenja toedjoean dengen toelis itoe artikel teroeama ada boeat perkenalken Nabi Khong Hoe Tjoe poenja penghidoepan dan peladjaran pada golongan orang jang blon taoe atawa blon mengarti boekan oentoek achli-achli Khong Kauw jang bisa preksa sendiri boekoe-boekoe jang tinggi. Itpe sebab maka apa jang kita toelis ada serba ringkes, sedeng bagian jang menjaket dengen itoe Nabi poenja peladjaran poen ada djaoe dari sampoerna, kerna tjoemah ditoetoerken saliwatan kapan perloe aken mengasih liat bagimana iapoenja anggepan atawa pikiran atas berbagi-bagi soeal jang dikatemoeken dalem penghidoepannja. Boeat terangken dengen loeas Nabi Khong Hoe Tjoe poenja peladjaran ada perloe diterbitken lagi berbrapa boekoe laen, berikoet djoega salinan dari berbagi-bagi kitab klassiek Tionghoa. Dalem ini boekoe kita tjoemah sakedar hendak oendjoek dengen satjara ringkes dan gampang di mengarti bagimana hikajatnja itoe Nabi, siapa kake mojangnja, penghidoepn dan pakerdja'annja, kapandean dan kasoetjiannja, serta djasa-djasanja bagi manoesia, jang semoea ada perloe dikatoei oleh siapa jang hendak bladjar kenal pada Khouw Kauw atawa Confucianisme.
Lantaran pada masa ini atoeran peladjaran dalem sekola ada laen djaoe dari di djeman doeloe, dan dalem sekola-sekola Barat atawa poen sekola Tiong-
