HIKAYAT KISAH ULAT
Tamsé nabi ban mata uroe, peungeuih nanggroe ban di dônya
Lingka nabi sahbat lapan, ban buleuen trang pudoe rakna
Nabi Muhammad lang-gumilang, sang buleuen trang teungöh peureunama
Ban peureunama meung lôn tamsé, leubèh cit teuma meugeuganda
Sahbat lapan tamsé bintang, hadap janjôngan ban sineuna
Sahbat lapan han tatusoe, ngö lôn hareutoe teubileueng sa
Phôn lôn peugah Abu Bakar, sahbat nyang tuha nabi meulia
Keudua aneuk Katabi, ubak nabi sangat meulia
Keulhèe Usman aneuk Affan, keupeuet Tuan Ali Murtadha
Ban dum sahbat meulintèe nabi, Auf ngön Zubair nam droe nyang ka
Keutujôh Sa'id sahbat nabi, Salman Farisi sidroe nama
Abéh lôn peugah ka ban lapan, ban dum tuan that meulia
Nabi Muhammad nur al-alimin, jeumala al-'alam keumala dônya
Dum na sahbat lapan duek meulingka, nabi teuma teungöhnya
Teuma teuka ureueng sidroe, ureueng lakoe muda balia
Nyankeu sahbat Abu Jeuhai, jijak lanja bak saidina
'Oh trôih keunan ubak nabi, saleuem geubri hôreumat meulia
Assalamu 'alaykum ya rasulullah, sijahtra Allah ateueh gata
Teuma neujaweueb saleuem jinoë, 'ala man ittaba'al huda
Teuma neutanyöng uléh nabi, peue jihajat keunoe teuka
Teuma jiseuôt pantaih-pantaih, kamoe langkah cit bak gata
Jakalèe tajak ya Muhammad, sajan kamoe jinoe geuba
Tajak kalön dum piasan, peureumanyèn indah rupa
Ubak teumpat Abu Jeuhai, patông 'adi sit that meulia
Badanjih sangat indah, meuih meutatah mupeureumata
Patông jipeuduek ateueh teurapan, pudoe intan blèt-blöt cahya
