Tirè rawa indah-indah, di ateuëh khimah jibôh sutra
Ureuëng di sinan meuleula'sin, jikhôdeumat dum patông 'aza
Nabi neungö haba mumeunan, neubeudoih yôh nyan sigra-sigra
Nabi jiba yôh masa nyan, sahbat lapan sajan seureuta
Hingga trôih rab bak khimah, rasulullah nyang that meulia
Lalu jijak ureueng sidroe, ureueng lakoe ubak raja
Saré trôih bak Abu Jeuhai, jidèelat lé yôh nyan jipumeulia
Dèelat teugayô syah alam, Muhammad Amin keunoe teuka •
Jijak kalon dum piasan, sahbat sajan dum seureuta
'Oh jideungö haba meunan, jipeuingat yôh nyan sigra-sigra
Kadeungo hé kawôm Kuréh, ngo beu habéh ban sineuna
Muhammad 'oh trôïh keunoë jijak, kapeutamöng bak khimah meulia
Bèk meulia pi meung saboh, bèk soe beudoih dum na gata
Bèk kahadab bak Muhammad, kapeulikôt dumkeu rata
'Oh ri trôïh Muhammad keunoë, hu meuhô-hô limpah cahya
Ala Ta'ala buka hijab, ateueh muka Muhammad nabi meulia
Cahya Muhammad lang-gumilang, trôih meureuntang hô adara
Tamsé beuneung raja timoh, meunan peunoh cahya muka
Alah bri hibat bak Muhammad, kaphé laknat abéh geumpa
Até mubhôk-bhôk atôt meutat, sabab hibat nabi meulia
Misé uroe teungöh beukah, meunan limpah gilang cahya
Hana sidroë pi meuteuntang, han jeuet jipandang seupôt mata
Misé tapandang bak mata uroe, meunankeu proe bak upama
Sabab hibat Muhammad sidroe, rakyat meukatoe beudoih dum na
