dengan tanda-tanda kahormatan, sabagimana jang biasa dipake samboeti datangnja oetoesan-oetoesan dari radja besar. Radja Oewe itoe njataken kagirangannja, oleh kerna KHONGTJOE datang kapadanja; ija berdjandji, bahoewa sigra djoega ija nanti membri pada KHONGTJOE satoe kadoedoekan di dalam masjawarat karadjaän ; ija silaken KHONGTJOE tinggal di dalam satoe roemali bagoes di dalam kota, dan ya sadiaken djoega satoe roemah aken KHONGTJOE berdiam di loewar kota; lain dari itoe ija menantoeken, jang KHONGTJOE nanti dapat bras sariboe karoeng di dalam satahon. Dengan harapan nanti boleh djadi berfaedah di dalam karadjaän, dan nanti dapat perbaiki perkara negri dan kaädaäanja hal rahajat, KHONGTJOE tinggal bersama-sama moeridnja di itoe roemah di dalam kota, dan aken djadi kanjataän, bahoewa ija hargai tinggi tanda kahormatan jang baginda briken kapadanja, ija pergi djoega mengisiïn bebrapa hari lamanja itoe roemah jang di loewar kota. Aken tetapi KHONGTJOE poenja harapan itoe tiada sampe terdjadi, kerna ponggawa-ponggawa, demikianlah djoega baginda poenja goendik bernama LAM TJOE jang sanantiasa ditoeroeti kahendaknja, ada membri pikiran pada baginda, aken djangan membri pangkat kapada KHONGTJOE. Marika itoe berkata, oleh kerna KHONGTJOE soeka mengadaken perkara baroe, ija-orang koewatir, jang KHONGTJOE nanti robahken segala peratoeran jang telah ada. Sebab bagitoe, baginda djadi mendapat lain pikiran aken hal KHONGTJOE, lebih lagi tempo LAM TJOE mendapatken kanjataän, jang hatinja KHONGTJOE tiada mengormati kapadanja. Samantara itoe KHONGTJOE menggoenaken temponja aken menambahi ilmoenja dengan lantaran membatja dan memikiri boenjinja kitab-kitab, sambil membri pengadjaran kapada moeridmoerid. Bentjinja LAM TJOE pada KHONGTJOE ada djadi
