djinasatnja KHONGTJOE ka pakoeboeran. Sekalian moerid kaboengi KHONGTJOE seperti kaboengi bapa sendiri, sedang TJOE KONG berkaboeng teroes sampe anem tahon lamanja. Kira-kira saratoes moerid ada diriken roemah-roemah di sapoetar koeboeran KHONGTJOE dan tinggal di sitoe bersama sama anak dan istri, hingga dengan bagitoe ija-orang djadi terbitken satoe kampoeng, jang ija-orang namaïn Khongli (artinja kampoeng kaoem Khong). Ija-orang mengataken diri hamba-hambanja KHONGTJOE dan meminta pada TJOE SOE, soepaja TJOE SOE memandang demikian kapada ija-orang; dan dengan soeka sendiri, . aken djadi tandanja hormat kapada KHONGTJOE, ija-orang angkat TJOE SOE mendjadi ija-orang poenja kapala. Sigra djoega orang-orang kampoeng itoe soedah mendapat banjak toeroenan, dan sasoedahnja bebrapa abad berlaloe, toeroenannja orang-orang itoe ada djadi bagitoe banjak, hingga ija-orang poenja tampat mendjadi satoe negri pangkat katiga. Pada moela kali di koeboerannja KHONUTJOE ditaro sadja soewatoe batoe jang tiada pake soerat. Tapi sigra djoega baginda AIJ KONG soeroeh diriken di dekat koeboeran itoe soewatoe roemah pertandaän, soepaja — sabagimana katanja baginda — orang-orang di djeman itoe dan di djeman komoedian, boleh datang ka roemah itoe pada tempo-tempo jang nanti ditantoeken, aken sembahken hormat kapada KHONGTJOE, jang telah memboeka djalan, di mana orang haroes berlakoe, dan telah membri toeladan jang haroes ditoeroet oleh orang sekalian. Di dalam itoe roemah pertandaän, bio, ada ditaro KHONGTJOE poenja gambar dan satoe salinan dari masing-masing kitab karangannja ; djoega ada ditaro ija poenja taboe-taboeän dan kareta jang ija biasa pake berdjalan ka sana-sini, dan lagi bebrapa roepa perabot roemah-tangga jang biasa dipake olehnja. Tempo roemah itoe soedah sadia
