Di itoe negri, soedah tiga tahon lamanja, ija tida sekali ada dapat lantaran aken merasa tiada senang, dan ija rasa, rahajat poen ada senang hati di bawah perintahnja.
Sasoedah sampe di karadjaän Tin, KHONGTJOE moelai kombali membri adjaran dengan radjin kapada moerid-moerid, dan boewat perkara ini ija ada poenja banjak tempo, kerna orang-orang jang memegang koewasa di itoe tampat, tida ada niatan aken mengatsilken, boewat goena negri, KHONGTJOE poenja kapandean dan kabedjikan, dengan lantaran membriken pada KHONGTJOE soewatoe djabatan ini atawa itoe. Maka KHONGTJOE goenaken sadja temponja aken membatja kitab-kitab sambil pikiri boenjinja itoe dan membri adjaran pada moerid-moeridnja; tempo-tempo ija berdjalan-djalan sama-sama marika itoe, aken hilangken pegalnja badan. Pada soewatoe tempo, sedang berdjalan-djalan, KHONGTJOE berkata pada moerid-moeridnja: “Akoe tiada perdoeli, tjara bagimana poen orang-orang berlakoe kapadakoe. Akoe tiada nanti batalken katjintaänkoe padanja, dengan lantaran kalakoeinnja itoe kapadakoe, hanja sanantiasa akoe soeka berboewat perkara baik aken goenanja, sabagimana jang akoe bisa perboewat. Sekalipoen kerdjainkoe tiada beritsil sabagimana jang boleh diharap dengan pantas olehkoe, akoe nanti dapatlah djoega merasa enak di dalam hati, dari sebab akoe soedah perboewat kaharoesankoe.”
Itoe kaharoesan jang diseboet oleh KHONGTJOE, boekan lain adanja, hanja mengadjarken pengadjaran baik jang terpake di djeman doeloe, dan mengoewarken pengataoeän, dan, dengan lantaran bagitoe, djadi madjoeken hal dilakoekennja peri sopan. KHONGTJOE terangken adjaran itoe dan goenaken segala daja-oepaja jang boleh dipergoenaken olehnja aken masoekken adjaran itoe ka dalam hati moerid-moerid, dan mendatangken rasa pada marika ini, bahoewa hal mendjoendjoeng
