HIKAJAT BANTA BEURANSAH
Bismillah rahman rahim, beureukat isim nyang meulia
Ulôn puphôn ngon bismillah, ngon nama Allah Po nyang asa
Ngon nama Allah dat nyang kadim, rahman rahim sipheuet meulia
Alhamdulillah pujoe Tuhan, asoe 'alam peuneujeuet dum na
Langèt bumoe asoe 'alam, milék Tuhan laén hana
Nyang peujeuet uroe deungon malam, nyang peujeuet agam deungon
dara.
Qul huwa Allah kufuwan Ahad, dum peue leungkap neukarônya
Asoe laôt asoe darat, hana sisat buet Rabbana
Jeunèh batèe di dalam glé, naleueng awé dalam dônya
Apui angèn neupeuhalé, dum peue hasé, neukarônja
Neupeujeuet énsan ngon lat batat, dum peue leungkap asoe dônya
Neupeujeuet tuleueng deungon urat, neubôh ingat dalam dada
Sigala dum leungkab samat, dalam tubôh manusia
'Oh lheueh pujoe Poku Rabbi, seulaweuet keu Nabi jeunoe lôn ba
Lôn ba seuleweuet keu Muhammad, sabab nèkmat sinan teuka
Keureuna Muhammad geunaséh Allah, dumpeue limpah sinan keuluwa
Ban dum peuncé bak nu Muhammad, sigala nèkmat asoe ceuruga
Jeunèh 'araih ngon keurusi, jeunèh bumi sianika
Laén nibak nyan dum barangri, sinan bak Nabi dum keuluwa
Allahumma salém sali, pang ulèe titi Muhammada
Kakeu habéh haba seulaweuet, han ék lôn peugah panyang raya
Amma bakdu lheueh kuteubah, tango lon peugah saboh calitra
Bak siuroë teukeudi Tuhan, trôn éleuham ateueh hamba
Lôn duek sôsah lôn éh sôsah, Allah-Allah hana reuda
Uroe malam teungeut lôn tan, han lôn tuban dalam dada
Lôn duek sôsah lôn éh sôsah, Allah-Allah hana reuda
Beungoh seupôt sôsah até, sang ka maté nyawong keuluwa
Lôn peuteutap han ék teutap, rôh lôn ingat dum peukara
Leumaih bak até meunoe nyang gèt, hikayat tapeugèt bèk lé rugha
Lôn bloë keureutaih daweuet halé, lôn surat lé seun sibanja
Meung na tulông Rabôn Ibat, cit tôk hajat ban lôn pinta
Keunan lôn jôk nyawong jasad, lôn peuharab dum peukara
Meung h'an meunan bak lôn ingat, han tôk hajat ban lôn cinta
Keureuna lôn ureueng hina that, hana sabat ngon sèedara
Lôn meulakèe ubak Tuhan, beureukat janjôngan Nabi kita
Beureukat keuramat nanggroe Makah, beureukat Madinah nanggroe'
meulia
