sa dai pagkaalo asin sa pagpahiling nin kagalangan okun talagang digdi nagpapahayag nin kalaenan an mga kababayehan?
Daing ibang nagpapataratara sa mga seniora kundi an sarong gurang na babaye, pinsan ni Capitan Tiago, na maugayon an panglawog asin baralagbag na magtaram nin kastila. Dai siyang ibang gibo kundi an pagtangro nin mga tabako asin buyo sa natotolod sa sarong bandeja, asin an paggawgaw kan saiyang kamot tanganing hadokan kan mga filipina, siring na gayo kan ginibo kan mga fraile. Sa katapusan, namorington su makawigay na magtirang, asin kan makamate nin pinaragkay nin napasang pinggan, hidaleng luminuwas na nagngongorobngorob;
“!Jesus! Halat kamo, mga tawong daing kapakanan!”
Asin dai na nagbalik na lumaog liwat.
Kun dapit sa mga lalaki, maribok na marhay su saindang tompok. Su iba sainda mga cadete, na mga maogmang nag-oorolay, alagad sa malihay sanang tingog, sa sarong gilid, pinagtataga-pasikrapan kan saindang mata, asin kun minsdn itinotokdo kan saindang moro an nagkapira katawo duman sa bidang, asin minangirisi sa hilom, alagad, duwa katawong daple, na mga mapuputi su panggubingan, banday su duwang kamot sa likod, magkasi daing girong, sa haralakwas na lakad nagbabalikbalik sa magibongibong na sogod kan kasalahan, siring sa mga nagsasakay na mga nagkakapororinggot sa ibabaw kan sakayan. An bilog na interes asin kadagkahan minagikan sa sarong pangkat na binibilog nin sarong particular asin nin sarong militar, na naghahampangan sa sarong sadit na latok na may mga Arak asin mga biscocho na harale sa Inglaterra.
Su militar sarong magtrang na teniente, halangkaw, makatatakot an panglawog, baga na sarong Duque de Alba, huli sa bilang kan mga Guardia Civil. Kadikit na magtaram, alagad magabat asin gotos an mga tataramon. Saro sa mga fraile iyo an sarong dominicong hagbayon, magayon asin makinang siring kan saiyang salming sa mata na may manggong bulawan, iyo an Cura sa Binondo asin Profesor sa San Juan de Letran. Nababantog na siya sarong matimgas na filosofo, mala ngani ta kan panahbn na idto an mga dominico boot pang makigsokolan sa bakong mga padi dai nanggad siya naoguot
