Kasiyahan an pagkadakula kan harong na ito, asin an pagkamugtak nakakaarog sa kadaklan sa Kaporoan, asin natotogdok sa gamping atubang sa sarong sanga kan Pasig na inaapod kan mga taga duman Pagsabangan nin Binondo, na, siring kan kagabsan na silog sa Manila, pinakikinabangan na gayo kan mga nageerok duman. Tara, an sinabi nang salog, kun gayod, parigosan, kun minsan, tapokan nin ati, nogayod, dakopan nin sira, pinagsasakayan asin pinagaagihan nin mga nagdadara o mga naghahatod nin mga strat, asin nagiging inoman, kun pinagmamarhay kan parasakdong intsik. Sukat na gayong pakatalean na sa masolog na ining tubig sa pagilaog, saen sorosorolbod an mga nagraralakaw asin daing pagdanggan an ribok, sa rayong may sarong kilometro igwa nin tulay na kahoy na garaba sa ibong sa laog nin anom na bulan, asin sa ibong man, dai maagihan sa panahon na natatada pa sa laog kan taon. Nin huli kaini, an danay na ining pagkamugtak, kun tiginit, inourawa kan mga kabayo sa pagtagbang sa tubig na iyong dahelan na makilagnan an tawong nariribaraw, na sa laog kan lunadan, nagtotongka okun naghohorophorop dapit sa mga kauswagan kan panahon.
Hababa asin kibadkibad nin kadikit an harong na sakong sinambit, asin kun an siring na kamugtakan gikan sa dai pagatiparo kan nagtogdok na ingeniero, okun baga bunga nin mga linog okun nin makokosog na mga doros, dai nin siisay man na makakapagpatotoo. Halakbang asin alfombrAdong hagyanan, nin mga hidyaw na balustrada, an inaagihan pasiring sa sarong mahiwas na bidang, asin ta maghale sa ibaba, an linalakawan nasa pagoltanan nin mga maceterang may mga burak na nagkakapaturogmad sa mga pinggan na patugmadan na manibaibang kiray asin garo dai maisip na mga guhit.
Mantang dai man nin mga bantay sa tata, okun dai nin sorogoon na maghanap okun maghapot kun baga inanyayahan ka okun dai, masakat kita! Oh ikang nagbabasa sakuya, maging katgay nin boot okun magi man na kaiwal! Kun makadagka saimo an mga togtog, an liwanag okun an makahologan na pinaragkay nin mga kasangkapan sa pagkaon, na mga pinggan asin mga cubiertos, asin boot mong masaksihan kun paano an mga katiripunan duman sa Mutya sa Sirangan (5).
