This page has been validated.
Püra.
Pür sajast sco l'aurora,
Sco ch'ais l'uonda del ovel,
Sco'l solagl cha'l muond indora,
Sco'l zindel stailo del tschel.
Sco la blonda bella spia,
Sco chi ais l'alpina flur,
Sco tuot que ch'intuorn sorria,
Chaunta liber vers l'azur.
Sco tuot que chi s'indormainza
Nella pèsch d'ün Dieu viaint,
Sco tuot que chi ho fidaunza
Nel avegnir celest, riaint.
5 Meg 1868.
Buna.
Chera, bella, sajast buna!
La bunted ais ornamaint,
Ch'ogni bain in se raduna
Chi'ns fo Dieu avair preschaint.
