Page:Cosmoglotta A 128 (Sep-Dec 1939).djvu/34

Noi ha examinat li possibilitá continuar li edition de Cosmoglotta B, ma total manca de témpor impedi nos far ti labor. Noi ha pensat reducter it anc a 8 o 4 pagines, ma to vell far presc tam grand labor quam por 16 pagines e pro to noi ha abondonat ti idé.

Li edition de 4 pagines printat oferta un grand avantagie : it posse esser utilisat quam propagande materiale in landes u ancor ne existe li guerre e u li circumstanties permisse it.

Por securar li edition de nor revue, noi va mantener li precie de abonnament a Fr. 4.— sviss. Chascun abonnator, quel desira it por su propaganda, va reciver 12 exemplares de chascun numeró si it apari 4 vezes durant 1940 o 8 exemplares si it apari 6 vezes.

Pro que Cosmoglotta ha aparit solmen 9 vezes vice 12 durant 1939, chascun abonnator posse demandar al Institute Occidental li invia de literatura por li summa de Fr. 1.—, quam compensation, Anc in 1940, si li circumstanties vell impedir nos far aparir 4 vezes nor revue, noi va compensar li mancant numerós per literatura.

Noi memora a nor letores que in ti desfacil témpor, li compra de literatura es un fort auxilie por nor movement. Noi espera que omni coidealistes queles posse for tal expenses va auxiliar nos per ti medie.

Durant 1940, li Occidental-Union va continuar su activitá secun li possibilitás e noi calidmen premersia omni membres queles va payar su contribution.

Li reelection del Senat, quel ne ha posset esser organisat durant 1939, va esser ajornat til pos li guerre. Interim sr. A. Matejka ha esset selectet quam president ad interim per li Central Oficie.

Noi continua reciver novas de nos cardinal coidealistes e particularimen de nor car e venerat mastro sr. E. de Wahl, quel es in bon sanitá (20 dec. 1939). Il presenta a omni coidealistes su max bon desires por 1940, quel regretabilmen il presenti quam un « annu dangerosi ».

Car coidealistes, noi espera que it va esser possibil mantener bon relationes con vos durant 1940 e que ti annu va aportar nos li pace e li tranquilitá quel va permisser nos reprender con nov forties li difusion de nor bell lingue.

Chapelle, 28 dec. 1939.

Fred LAGNEL, Director del Occidental-Union.

N. B. — Pro tecnic cause Cosmoglotta de julí ne hat esset inviat in just témpor e it es juntet con li present n° 128.