(88)
Cacung queralanan selese cung mayap
pigmulan na na pin at inutus agad
caring letrang guintu isulat ilimbag
qñg ba'ping matangcap misinup matuyag.
Pitandanan ya iti carin qñg Palacio
saca inauad na sablang balutan cu
quea ro irampal miras nomang tutu
saca ro pemusni alang picacunu.
Lub nang migmulala sari qñg degulan
caring é pasabing queraclan á ámbar
at ding esmeralda, lacuas la pa naman
lalu no ding rubi macauiling lauan.
Pati cacung iquit lubus aquilala
ing pang̃auili na ning suguing Monarca
caring calacal cung tutung maulaga
siniclaud cu pin caretang bitis na.
At ng̃acung sinabi cacung panigapu
qñg camalan mu pu Monarcang guinu cu
daptan mung buri mu quening catauan cu
ampon queting sabla atiung bandi cu.
Amanung pisiag cu pati queang dimdam
pequibata'na cung anting timan-timan
anti quening sabi á queang timbayan
nung daptan cu iti binang macasubiang.
Mebina cung tutu taung mapang̃ang̃as
nung ting taguinan cu nanu mu mang ditac
queting telaga na at ligud nang ganap
quecao ning Dios Aring sacdal catas.
