( 83 )
Miras itang aldo at capanaunan
queulata'na cu queting pagcabiayan
nan cu mang miguitis suing cacu datang
saguli nang mabie queti qñg sicluban.
Qñg cacung cutcutan migtalaga na cu
minaunang culcul á pagcarinan cu
migquera caguisan niting cacaṇan cu
telaga nang bie qñg Dios á Guinu.
Dapot biñe na rin ing pacalulu na
queang pepa-isip qñg canacu ita
pisulung-sulung cu ing lacad cu queta
qñg nang̃a'ning ilug iquit cung talaga.
Macasalicut va canita ning lung̃o
maba pin mong horas mimisip cung tutu
canitang pampang na ilug á binguit cu
misasabing dili carin pinupus cu.
Sucat ya pin mong manibatan lual
danum iting ilug á carin daralan
batung mang̃aragul ing piraralanan
maustang manibat qñg aliuang lugal.
Nung gaua cu pin mo á metung á balsa
qñg agus ning danum magpaniud talaga
mecacabulad mu miras cu canita
aliuang carinan cacung aquilala.
Mecad macaquit cung mayap qñg caniti
ó queti pupusan ing canacung bie
nung cacu marapat ampon mapaliari
ala ping aliuang cabas na't cayanti.
