Page:Carduccianelle.djvu/39

From Wikisource
Jump to navigation Jump to search
This page has been validated.
— 37 —

     Quanta mardratte pe’ quacche nziria,
quanta mazzate si so ncrapicciano.
Pe’ mezzo ca sferra ’a pacienza
’e ffacite nfelice cchiù ampressa.
     Nun ’e bbattite: ah, cumpatitele:
so’ piccerille; quanno addeventano
cchiù gruosse penzato ca pure
vanno incontro a patenze cchiù grosse.
     Io cierti vvote penzo, cutisidero
ca quante e quante, pe’ ’na risgrazia,
ancora guaglione tantille,
pe’ sfurtuna, se trovano prive
     d’ ’o pate e ’a mamma, e tanno ’e llacreme
nisciuno ’asciutta, anze è difficele
truvà chi t’aiuta e ’sti tiempe:
chi te spia: tiene famma? vuò pane?
     E quante ’e lloro spisso fernesceno
mmiezo a ’na strata, sotto a ’na cchiesia,
e dormono nterra, iettate,
comme fosseno ’o scarto d’ ’a carne!
     Ah! quanta vote ncoppa a ’nu marmolo
na capa bionda, bella, ’na loppeca
vedite, llà, mmiezo ‘e ppetacce.
cu ’a cascetta ’e cerine a ’nu lato.
     Dorme, riposa, penzate subbeto:
Quant’è carillo! Che faccia d’angelo!
E l’angelo tanno se sonna
forze ’a mamma ca sta ’nparaviso!
     Che suonno forte, ma va ’nu guardia
e cu ’nu pede piglia e ’o fa sosere:
— Nce siente vattenne ’a cca nterra?
N’ata vota ’e scorea chill’uocchie!