Koewé mangkok di dalem tenong, Potong ketoepat atas pelita, Ikan betok lah djadi bengong, Ikan sepat atoer tjerita.
Potong ketoepat atas pelita, Daon kaoeng di dalem tjobék, Ikan sepat atoer tjerita, Ikan baoeng menjadi bék.
Daon kaoeng di dalem tjobek, Bikin goendoe si kajoe djaran, Ikan baoeng mendjadi bék, Ikan loendoe djadi saréan.
Bikin goendoe si kajoe djaran, Bikin biting asalnja lidi, Ikan loendoe djadi saréan, Ikan keting djadi toewidi.
Bikin biting si kajoe djaran, Orang menangkep si toekang laksa, Ikan keting djadi toewidi, Ikan kakap mendjadi djaksa.
Orang menangkep si toekang laksa, Bikin toedoeng tali telepas, Ikan kakap mendjadi djaksa, Ikan lindoeng mendjadi oppas.
Bikin toedoeng tali telepas, Orang mengoeroet di batang soeling, Ikan lindoeng mendjadi oppas, Ikan gerot mendjadi maling.
Orang mengoeroet di batang soeling, Beli opak boengah mengkoedoe, Ikan gerot mendjadi maling, Ikan geropak mendjadi gardoe.
Beli opak boengah mengkoedoe, Alang-alang toemboeh di doelang, Ikan geropak mendjaga gardoe, Ikan sembilang djadi pentjalang.
Alang-alang toemboeh di doelang, Bikin petjoet bekas di raoet, Ikan sembilang djadi pentjalang, Ikan tjoetjoet ďadi sekaoet.
Pantoen karang-karangan
-
2
