III. DIPANGGUANG PADANG SAWAH BANDANG
Rundiang baraliah sakutiko, aluaran ka si Rajo Ameh, tadorong hati nan cilako, sasa lah tumbuah kamudian; kok tidak balam dilantiang, indaknyo katabang jauah. Balam tu balam disalang, lapeh di jari nan sapuluah, hilang di mato nan duo; kok lai namuah rang diganti, lah buliah utang dibaia, kok tidak namuah rang diganti, lah sansai untuang bagian, badan lah ka mari pai. Tumbuah pikiaran dalam hati, dijalang Pakiah Muhamaik, etan kasumayan banyak; agaklah tibo di sanan, bakato si Rajo Ameh,
”O Tuan Pakiah Muhamaik, dangakan malah dek Tuan! Sabab hambo dek lah tibo, balam tambago lah lapeh, takajuik dek angin lalu, dipusiang limbuku jantan, lah rabah suduang-suduangnyo, buruang Iah lapeh batali, tabang lah samo jo nan lia,”
Bakato Pakiah Muhamaik,
"Kok jo balam lah tapeh, Buyuang cari balam hambo, lieklah hilia jo mudiak, pandanglah kiri jo kanan.”
Manjawab si Rajo Ameh,
"Kok baitu kato Tuan, bajalan hambo sakali.”
Lalu bajalan si Rajo Ameh, hilia sawah mudiak sawah, sampai ka padang ribu-ribu, ka tanjuang ampasan angin, ka lurah samak baluka. Lah pasai inyo dek maliek, Jah pueh mamandang-mandangi, tidak basuo‘nan dicari, bajalan ka ranah sawah bandang, tibo di pangguang rang manggaro. Bakato si Rajo Ameh,
"O Kakak urang nan manggaro, bari luruih hambo batanyo. Hambo kahilangan balam, balam tambago tigo gayo, buni batalun jo angguaknyo, angguak batalun jo buni; balam lah lapeh batali, tabang manggungguang paso-paso, laikoh tampak ka mari?”
Manjawab Bacindai Aluih,
“Mano rang mudo janyo hambo, hambo tak tahu dibalam, mandanga ikolah baru.”
