Agid-agid sa "ma....an", ang "ka....an" pasiboh usáb nga perpekto sa umaabut nga panahón. Hilabihán siláh ka suúd nga alang sa daghan, sibo gayúd silág kahulügan. Apán may kalainan, bisag dyutay ra hinoon. Súmala sa mga unang sinulát ang "ka..." nagkahulugag "butáng" ubús sa panan-awng labíng halapád. Busah ang "ka....an" nagpailáh nga ang suheto maóy "butáng" diín ang kalihokan sa dugukang gilanggikitan anhá mahitabó sa paaging pinaduyás.
Pananglitan: "Kabuhatan úg bungdo ang hawan; katoohan ang tawoh; kakunhuran ang bilíh sa bugás." Sa ató pa, ang hawan "butáng" diín anhá mahitabó ang pagtukud úg bungdo; ang tawoh, sa buhat sa pagtoóh; ug ang bilíh sa bugás, sa pagkunhud. Kiníng pag-isip nga ingóg "butáng" ang suheto, walá panumbalingáh sa porma "ma....an".
Dúnay nanagtooh ngá ang "ka....an" nagkahulugag "mahimoh ang pagbuhat sa ....", diín gipaibabáw ang pagkamahimoh o ang kadunay gahúm kun kusúg sa pagbuhat; kay ilang gitoohan nga ang "ka...." ilhanan sa dagwayng potensyál. Busah matúd pa nilah ang: "katoohan, katindugan, kasugyutan"—nagkahulugag: "mahimong toohan, mahimong tindugan, mahimong sugyutan". Dili kining pagsabutah supak sa itaas, kay kadtóng mahitaboán sa pagtindug kadtóh siyáh usáb mahimong tindugan; ug kinsah ganiy mahitaboán sa pagsugyut, siyáh upúd mahimong sugyutan.
Apán ¿tinuud ba nga ang "ka...." ilhanan sa pagkadunay gahúm sa pagbuhat? Nagtooh akóh nga dili, ubús sa mga katarungang mabasah didtoh sa mga Uluhan IX ug XI. Dasonan ko siláh ning pipiláh ka pagpálandong: "kadakú niyag oloh; katapók gyud úg kinabuhi ang tawoh; katambok baya sa baboy". ¿Nagkahulugan ba gud silág: Dunay gahúm ang iyang oloh, o mahimong
