Ang masayón kaayoh maóh ang paghatag dihá sa usáh ka iglalanggikit úg nagkalainlaing kahulugan alang sa nagkalainlain niyang kagamitan; duhá, kon duhá may nagkalain nga kagamitan; tolóh, kon tolóh man ugaling kiníh. Giingón ko nga masayón kaayoh, kay wala man siyah magkinahanglag taás nga pagtoón; igo na ang pagpahimulus sa higayón. Masayón, apán dyutay rag ikatabang alang sa kahimoan úg usah ka hinugpong o mausahong kasayuran sa atong pinulungan. Ug kon pangayoan kitág katarungan, nganoh kiníh kun kadtóh ato mang gigamit sa ingón, igo lang kitang moingón nga walá kitáy lagda, maóh gayúd kaná ang naandan.
Pananglitan ang atong "pa" daghag kagamitan, ug sa ingón niana daghan pud ang ihatag kaniyah nga kahulugan, nga sumala lamang sa higayón. Aniay pipiláh nianang mga kagamitanah: "Wala pa mabuhat; gibuhat pa; padak-ih siyáh; paantusah gayúd; makapatagbaw."
¿Usáh kun daghan bay kahulugan sa "pa" dinhá sa itaas? Ang paghatag kaniyag lainlaing kahulugan masayón man, apán dili lagíh subay sa tuyu ug kinaiyah sa kinaadman, kansang tomóng maóh ang paghatag úg kausahan o mausahong paagih kun sistema.
Busah kon buút kitáh makabatóg sistema dinhá sa atong pinulungan, paninguhaon ta ang pagpakakaplag sa kahulugang lintunganay sa "pa" dinhá sa tanan niyang kagamitan, kon ugaling kaná makab-ut man nato. Maoráh usáb ang buhaton ta alang sa ubáng mga iglalanggikit. Waláy sapayán sa kabudlay ug kahago; ang bungah unyá maghinobra.
Mapuslanon kaayoh kining paagihah alang sa Bini-
