Page:ᱨᱚᱲ ᱥᱟᱬᱮᱥ.pdf/118

ᱟᱢᱟᱜ ᱯᱚᱱᱚᱛ ᱠᱚᱨᱮ ᱵᱤᱥᱛᱤ ᱛᱮᱫᱚ ᱢᱮᱱᱟᱜ ᱠᱚᱣᱟ ᱟᱨ ᱡᱟᱦᱟᱸ ᱡᱟᱦᱟᱸ ᱯᱚᱱᱚᱛᱨᱮ ᱢᱮᱱᱟᱜ ᱠᱚᱣᱟ ᱚᱱᱟ ᱯᱚᱱᱚᱛ ᱯᱟᱹᱨᱥᱤ ᱨᱮᱭᱟᱜ ᱚᱨᱥᱚᱝ ᱥᱟᱱᱛᱟᱲᱤ ᱯᱟᱹᱨᱥᱤ ᱪᱮᱛᱟᱱ ᱨᱮ ᱧᱩᱨ ᱟᱠᱟᱱᱟ ᱾ ᱤᱠᱷᱟᱹᱱ ᱚᱱᱟ ᱢᱟᱬᱟᱝ ᱛᱮ ᱞᱟᱹᱭ ᱜᱟᱱᱚᱜᱼᱟ ᱥᱟᱱᱛᱟᱲᱤ ᱯᱟᱹᱨᱥᱤ ᱫᱚ ᱟᱹᱰᱤ ᱫᱤᱱ ᱫᱷᱟᱹᱵᱤᱡ ᱨᱚᱲ ᱯᱟᱹᱨᱥᱤ ᱞᱮᱠᱟᱛᱮᱜᱮ ᱛᱟᱦᱮᱸ ᱠᱟᱱᱟ ᱾ ᱚᱱᱟ ᱢᱮᱱᱛᱮ ᱟᱵᱚ ᱦᱚᱲ ᱵᱟᱠᱚ ᱚᱞᱮᱫ ᱛᱟᱦᱮᱸᱫ ᱚᱱᱟ ᱫᱚ ᱵᱟᱝ, ᱡᱟᱦᱟᱸ ᱯᱚᱱᱚᱛ ᱨᱮ ᱡᱟᱦᱟᱸ ᱨᱚᱲ ᱠᱚ ᱵᱮᱵᱷᱟᱨᱮᱫᱟ ᱚᱱᱟᱛᱮᱜᱮ ᱚᱞᱫᱚ ᱮᱦᱚᱵ ᱞᱮᱱᱟ ᱾ ᱢᱟᱬᱟᱝ ᱫᱚ ᱨᱳᱢᱟᱱ, ᱚᱱᱟ ᱛᱟᱭᱚᱢ ᱫᱮᱵᱽᱱᱟᱜᱽᱨᱤ, ᱵᱟᱝᱜᱟᱞᱤ ᱟᱨ ᱚᱰᱤᱭᱟ ᱪᱤᱠᱤᱛᱮ ᱾ ᱛᱚᱵᱮ ᱒᱐᱐᱓ ᱥᱟᱞᱮᱨᱮ ᱥᱚᱢᱵᱤᱫᱷᱟᱱ ᱨᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱵᱟᱛᱟᱣᱮᱱᱟ ᱟᱨ ᱚᱱᱟ ᱛᱟᱭᱚᱢ ᱛᱮᱜᱮ ᱠᱮᱱᱫᱨᱚ ᱥᱟᱦᱤᱛᱭᱚ ᱚᱠᱟᱫᱮᱢᱤᱨᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱦᱚᱸ ᱦᱟᱛᱟᱣ ᱮᱱᱛᱮ ᱯᱟᱹᱨᱥᱤ ᱨᱮᱭᱟᱜ ᱪᱟᱨᱪᱟᱫᱚ ᱟᱨᱦᱚᱸ ᱟᱹᱰᱤᱜᱮ ᱞᱟᱦᱟ ᱤᱫᱤᱜ ᱠᱟᱱᱟ ᱾ ᱟᱨ ᱚᱱᱟ ᱛᱮᱜᱮ ᱱᱷᱟᱜ ᱧᱮᱞ ᱧᱟᱢᱚᱜ ᱠᱟᱱᱟ ᱱᱤᱛᱫᱚ ᱥᱟᱱᱛᱟᱲᱤ ᱯᱟᱹᱨᱥᱤ ᱪᱮᱛᱟᱱ ᱨᱮ ᱟᱨ ᱮᱴᱟᱜ ᱯᱟᱹᱨᱥᱤ ᱨᱮᱭᱟᱜ ᱚᱨᱥᱚᱝ ᱛᱤᱱᱟᱹᱜ ᱢᱮᱱᱟᱜᱼᱟ ᱾ ᱱᱚᱶᱟ ᱚᱨᱥᱚᱝ ᱠᱟᱛᱷᱟᱴᱷᱟᱝ ᱫᱚ ᱚᱱᱠᱟᱱᱟ, ᱵᱟᱨᱭᱟ ᱯᱟᱹᱨᱥᱤ ᱢᱤᱫᱴᱟᱹᱝ ᱯᱚᱱᱚᱛ ᱨᱮ ᱛᱟᱦᱮᱸᱱ ᱠᱷᱟᱱ ᱵᱟᱝᱢᱟ ᱨᱚᱲᱚᱜᱚᱜ ᱠᱷᱟᱱ ᱵᱟᱱᱟᱨ ᱨᱮᱜᱮ ᱵᱟᱱᱟᱨᱟᱜ ᱚᱨᱥᱚᱝ ᱫᱚ ᱵᱟᱡᱟᱣ ᱠᱚᱜ ᱜᱮᱭᱟ ᱾ ᱚᱠᱟ ᱟᱹᱲᱟᱹ ᱫᱚ ᱚᱠᱟ ᱨᱚᱲ ᱨᱮᱭᱟᱜ ᱠᱟᱱᱟ ᱚᱱᱟ ᱵᱟᱪᱷᱟᱣ ᱛᱩᱫ ᱦᱚᱸ ᱢᱩᱥᱠᱤᱞ ᱜᱮ ᱟᱹᱭᱠᱟᱹᱣ ᱜᱚᱫᱚᱜᱼᱟ ᱾ ᱟᱨ ᱥᱟᱝᱜᱮ ᱦᱚᱲ ᱱᱤᱛᱦᱚᱸ ᱮᱴᱟᱜ ᱯᱟᱹᱨᱥᱤ ᱛᱮᱜᱮ ᱥᱮᱪᱮᱫᱚᱜ ᱦᱩᱭ ᱟᱵᱚᱱ ᱠᱟᱱᱛᱮ ᱚᱱᱟ ᱯᱟᱹᱨᱥᱤ ᱨᱮᱭᱟᱜ ᱚᱨᱥᱚᱝ ᱫᱚ ᱟᱵᱚᱠᱚ ᱪᱮᱛᱟᱱ ᱨᱮ ᱰᱷᱮᱨᱛᱮᱫ ᱜᱮ ᱧᱮᱞᱚᱜᱼᱟ ᱾ ᱠᱷᱟᱹᱞᱤ ᱥᱮᱪᱮᱫ ᱥᱩᱢᱩᱝ ᱫᱚ ᱵᱟᱝᱟ ᱟᱵᱚᱣᱟᱜ ᱛᱟᱦᱮᱸᱱ ᱵᱟᱧᱪᱟᱣᱚᱜᱼᱜᱮ ᱯᱚᱱᱚᱛ ᱪᱮᱛᱟᱱ ᱨᱮ ᱟᱥᱨᱟ