༄༅། །མ་ལ་ཚང་བར་ཡོད་དོ། །ཉེར་འཁོར་བ་ནི། མངོན་པ་ལྟར་ན་ཚ་དམྱལ་བརྒྱད་པོའི་ཕྱོགས་བཞི་པོ་རེ་རེ་ན་མེ་མར་མུར་པུས་ནུབ་ཙམ་གྱི་ས་གཞི་དང༌། རོ་མྱགས་མི་གཙང་བའི་འདམ་འབུ་མཆུ་རྣོན་གྱིས་གང་བ་དང༌། སྤུ་གྲིའི་སོ་ གཏམས་པ་རྩྭ་ལྟར་སྐྱེས་ཤིང་རལ་གྲིའི་ལོ་མ་ཅན་གྱི་ནགས་ཚལ་དང༌། ཁྲོ་ཆུ་ཁོལ་མའི་ཆུ་བོ་རབ་མེད་དེ་ལྷག་པའི་འཁོར་བཞི་བཞི་ཡོད་པས་ཚ་དམྱལ་རེ་རེ་ལ་འཁོར་བཅུ་དྲུག་སྟེ། བརྒྱད་པོ་ཀུན་ལ་ལྷག་བཅུ་དྲུག །མེ་མར་མུར་དང་རོ་མྱགས་འདམ། ། སྤུ་གྲིའི་ལམ་སོགས་ཆུ་བོ་ཡིན། །ཞེས་སོ། །ཚ་དམྱལ་གཙོ་བོ་ལས་ཐར་ཡང་དེ་དག་ཏུ་མེ་མར་མུར་ལ་རྐང་པ་བཞག་པ་ན་རུས་པར་འགྲོ་ལ་བཏེག་པ་ན་ཤ་གསར་པ་གཞོན་ཤ་ཅན་སྐྱེ་བ་དང༌། འདམ་དུ་ཚུད་དེ་འབུ་རྣམས་ཀྱིས་རུས་པ་ཐམས་ཅད་འབུགས་པ་ དང༌། སྤུ་གྲིས་རྐང་པ་གཅོད་ཅིང་བཏེག་པ་ན་སོས་པ་དང་ཤིང་གྲིབ་ལ་འཁོད་པ་ན་ལས་ཀྱི་རླུང་གིས་རལ་གྲི་རྣམས་ལྷུང་བས་ལུས་ཕྱེ་མར་བྱེད་ཅིང་ཡང་སོས་པ་དང༌། འགྱུར་བྱེད་ཀྱི་ཆུ་བོར་ལྷུང་སྟེ་འཚེད་ཅིང་ལྕགས་བསྲེགས་ཀྱི་ཉ་བོ་ཆེ་ཟ་བ་དང༌། གཤིན་ རྗེས་ལྕགས་བསྲེགས་ཀྱི་ཉ་རྒྱ་དང་ལྕགས་ཀྱུས་བཤར་ནས་ལྕགས་བསྲེགས་ཀྱི་གཞིར་རྔོད་པ་རྣམས་ལོ་མཐའ་ཡས་པར་མྱོང་ངོ༌། །ཚེ་ཚད་ནི། མི་ལོ་ལྔ་བཅུ་ལ་ཞག་དང་དེ་སུམ་ཅུ་ལ་ཟླ་བ་དེ་བཅུ་གཉིས་ལོར་བྱས་པའི་ལོ་ལྔ་བརྒྱ་ནི་ལྷ་རྒྱལ་ཆེན་རིས་བཞི་པའི་ ཚེ་ཡིན་ལ། དེ་བཞིན་དུ་གོང་མ་གཉིས་འགྱུར་དུ་བསྒྲེས་པས་སུམ་བཅུ་རྩ་གསུམ་པ་མི་ལོ་བརྒྱ་ལ་ཞག་ཏུ་བྱས་པའི་ལོ་སྟོང༌། འཐབ་བྲལ་བ་ཉིས་བརྒྱ་ལ་ཞག་ཏུ་བྱས་པའི་ལོ་ཉིས་སྟོང༌། དགའ་ལྡན་པ་མི་ལོ་བཞི་བརྒྱ་ལ་ཞག་ཏུ་བྱས་པའི་ལོ་བཞི་སྟོང༌། འཕྲུལ་ དགའ་བ་མི་ལོ་བརྒྱད་བརྒྱ་ལ་ཞག་ཏུ་བྱས་པའི་ལོ་བརྒྱད་སྟོང༌། གཞན་འཕྲུལ་དབང་བྱེད་པ་མི་ལོ་སྟོང་དང་དྲུག་བརྒྱ་ལ་ཞག་ཏུ་བྱས་པའི་ལོ་ཁྲི་དྲུག་སྟོང་རྣམས་སོ་སོའི་ཚེ་ཚད་ཡིན་ལ། དེ་ལས་རྒྱལ་ཆེན་རིས་བཞིའི་ཚེ་ཚད་ལ་ཞག་གཅིག་ཏུ་བྱས་པའི་ལོ་ལྔ་བརྒྱ།
