༄༅། །མ་བརྒྱ་སྟོང་ཕྲག་མང་པོར་བསྒྱུར་བའི་ནད་ཕྱི་མ་ཕྱི་མ་ལ་རིམ་པས་ཡོད་པའི་ཕྱིར། རྒྱུ་དང་འབྲས་བུའི་སྒོ་ནས་སེམས་ཅན་སྤྱིའི་དོན་དུ་བསྔོ་བར་བཤད་ཀྱང་རུང་ངོ༌། །གསེར་གླིང་པས་གཙོ་བོའི་དོན་སོ་དྲུག་གི་ཚེ་བསྔོ་ལེའི་ཚིགས་བཅད་དང་པོ་གསུམ་ གྱིས་བསྔོ་ལེ་མཐའ་དག་བསྡུས་ལ། བཅུ་གཅིག་ཏུ་བཀྲལ་ཚེ་ཚིགས་བཅད་དང་པོ་ཁོ་ནས་བསྡུས་ཏེ་བཤད་དོ། །གཉིས་པ་ངན་སོང་གསུམ་གྱི་སྡུག་བསྔལ་ཞི་བར་བསྔོ་བ་ལ། སྤྱིའི་དོན་དང༌། གཞུང་གི་དོན་ཏོ། །དང་པོ་ལ། དམྱལ་བ་ནི། ན་ར་ཀ་ཞེས་སྡུག་བསྔལ་དྲག་པོས་དམྱལ་ཐག་བཅད་པའི་ཕྱིར་ དམྱལ་བ་ཞེས་བྱའོ། །གནས་ནི། འཛམ་གླིང་འདིའི་འོག་དཔག་ཚད་ཉི་ཁྲི་གཞལ་བ་ན་མནར་མེད་ཀྱི་དམྱལ་བ་ཡོད་ལ། དེའི་སྟེང་ན་གཞན་བདུན་པོ་ཡོད་དེ། མཛོད་ལས། འདི་འོག་སྟོང་ཕྲག་ཉི་ཤུ་ན། །མནར་མེད་པའོ་དེ་ཙམ་མོ། །དེ་ཡི་སྟེང་ན་དམྱལ་བ་ བདུན། །ཞེས་སོ། །དེ་ལ་ཐེག་དམན་གྱི་མངོན་པར་མནར་མེད་ཀྱི་རྒྱ་འཕངས་གཉི་གར་དཔག་ཚད་ཉི་ཁྲི་རེ་ཡོད་ལ། ཐེག་ཆེན་དུ་ནི་ཚད་མེད་དེ་མྱང་འདས་ཆེན་པོར་མཚམས་མེད་བརྒྱད་བྱས་པའི་དམྱལ་བ་པའི་ལུས་ལ་ཡང་དཔག་ཚད་བརྒྱད་ཁྲི་ཡོད་པ་དང༌། ཕལ་ཆེན་ལས་ཐེག་ཆེན་ལ་སྐུར་པ་བཏབ་པའི་དམྱལ་བ་པའི་ལྕེ་ལ་ཡང་དཔག་ཚད་འབུམ་ཡོད་པར་བཤད་པའི་ཕྱིར་རོ། །དབྱེ་བ་ནི། ཐུན་མོང་བ་ལྟར་ན་ཚ་དམྱལ་བརྒྱད། གྲང་དམྱལ་བརྒྱད། ཉི་ཚེ་ཉེ་ཁོར་སྟེ་བཅུ་དྲུག་གོ །སྡུག་བསྔལ་གྱི་ཁྱད་པར་ནི། ཡང་སོས་ སུ་སེམས་ཅན་མཐོང་ཚད་དགྲ་མི་ཤ་པོ་ལྟ་བུར་མཐོང་ཞིང་བླངས་ཚད་མཚོན་དུ་གྱུར་པས་ཕན་ཚུན་བསྣུན་ཏེ་འཆི་ལ། དེ་མ་ཐག་ལས་ཀྱི་རླུང་གྲང་མོའམ་སོས་པར་གྱུར་ཅིག་ཅེས་པའི་སྒྲ་ལས་སྐད་ཅིག་གིས་སོས་ཏེ་ཡང་སྔར་ལྟར་ཁོ་ན་བྱེད་དོ། །ཐིག་ནག་ཏུ་ནི། གཤིན་ རྗེས་ལུས་ལ་ཐིག་ནག་པོ་མཐའ་ཡས་པར་བཏབ་སྟེ་ལྕགས་སྲེག་གི་སོག་ལེ་དང་སྟ་རེ་དང་སྟེའུ་སོག་ལེ་མེ་འབར་བས་གཤག་གཏུབ་གཞོག་ལ། སྟོད་གཤོག་པ་ན་སྨད་ཀྱི་རྨ་འཚོ་ལ། སྨད་གཤོག་པ་ན་སྟོད་སོས་ཏེ་སྡུག་བསྔལ་བའོ། །བསྡུས་འཇོམས་ནི། ལྕགས་
