༄༅། །ཏེ། འཇུག་པར། རྣམ་རྟོག་མི་མངའ་ཁྱོད་ཀྱིས་སྲིད་མཐའི་བར། །སྐད་ཅིག་དེ་རེ་རེ་ལ་སྤྱོད་སྣ་ཚོགས། །ཇི་སྙེད་སྟོན་པ་དེ་སྙེད་ཛམྦུའི་གླིང༌། །མ་ལུས་རྡུལ་གང་དེ་དག་ལ་གྲངས་མེད། །ཅེས་དང༌། ནམ་མཁའ་ མེད་པས་འདབ་ཆགས་ལྡོག་པར་མི་འགྱུར་གྱི། །འདི་ནི་རང་མཐུ་ཟད་པས་ལྡོག་པར་འགྱུར་དེ་བཞིན། །སློབ་མ་དང་བཅས་རྒྱལ་བའི་སྲས་རྣམས་སངས་རྒྱས་ཀྱི། །ཡོན་ཏན་མཁའ་འདྲ་མཐའ་ཡས་མ་བརྗོད་ལྡོག་པར་འགྱུར། ། དེ་ཕྱིར་བདག་ལྟས་ཁྱོད་ཡོན་འདི་དག་ནི། །ཤེས་པ་དང་ནི་བརྗོད་པར་ནུས་འགྱུར་རམ། །ཞེས་དང༌། བདེ་བར་གཤེགས་པ་མ་ལུས་ཕྱོགས་ཞིང་སངས་རྒྱས་ཡུལ་དག་ན། །ཕྲ་རབ་རྡུལ་གྱི་རྡུལ་རྣམས་བདོག་པར་གྱུར་པ་ཇི་སྙེད་ པ། །བྱང་ཆུབ་མཆོག་རབ་དམ་པར་གཤེགས་པའི་བསྐལ་པ་དེ་སྙེད་དེ། །འོན་ཡང་ཁྱོད་ཀྱི་གསང་འདི་བསྙད་པར་བགྱི་བ་མ་ལགས་སོ། །ཞེས་དང༌། རྒྱན་ལས། ཆོས་ཀྱི་དབྱིངས་ལ་སངས་རྒྱས་ཀྱི། །མཚན་ཉིད་དང་ནི་གནས་ པ་དང༌། །ཕྲིན་ལས་ཟབ་པ་འདི་བཤད་པ། །མཁའ་ལ་ཚོན་གྱིས་རི་མོ་འབྲི། །ཞེས་དང༌། སངས་རྒྱས་རྣམས་ཀྱི་འབྱོར་པ་ནི། །གང་གིས་གང་དུ་ཇི་ལྟར་དང༌། །ཇི་ཙམ་དུས་དང་འཇུག་པ་ནི། བསམ་ཡས་དཔག་ཏུ་མེད་ པར་འདོད། །ཅེས་དང༌། ཟླ་བ་སྒྲོན་མ་ལས། ཇི་ལྟར་ནམ་མཁའ་དེ་བཞིན་དུ། །ང་ཡི་སྐུ་ཡང་བརྗོད་མེད་ཅིང༌། །ཤེས་པར་དཀའ་བར་རབ་ཏུ་བསྟན། །ཞེས་དང༌། རྒྱུད་བླ་ལས། རྒྱུ་མཚན་དྲུག་གི་དང་པོ་ལྔས་ཆོས་སྐུ་བསམ་ གྱིས་མི་ཁྱབ་པ་དང༌། དྲུག་པས་གཟུགས་སྐུ་བསམ་མི་ཁྱབ་ཏུ་བསྟན་པའི་ཕྱིར་ཏེ། ངག་ཡུལ་མིན་ཕྱིར་དོན་དམ་གྱིས་བསྡུས་ཕྱིར། །རྟོག་གནས་མིན་ཕྱིར་དཔེ་ལས་འདས་པའི་ཕྱིར། །བླ་ན་མེད་ཕྱིར་སྲིད་ཞིས་མ་བསྡུས་ཕྱིར། །
