༄༅། །པ་མ་ཡིན་པ་ལྟར་ཤེས་པར་བྱའོ། །གཟུགས་ཀྱི་སྐུ་སངས་རྒྱས་ཀྱི་སྐུ་ཡིན་མོད་ཀྱང་ཆོས་གཟུགས་ཕྱེ་བ་ན་གཟུགས་ཀྱི་ཆ་ཉིད་ནི་སངས་རྒྱས་ཉིད་དུ་རྣམ་པར་མ་བཞག་སྟེ། དྲིན་ལན་གསབ་པའི་མདོ་ ལས། བཅོམ་ལྡན་འདས་གང་སངས་རྒྱས་ལ་སྐྱབས་སུ་མཆི་བ་དེ་གཟུགས་ཀྱི་སྐུ་ལ་སྐྱབས་སུ་མཆི་འམ་ཆོས་ཀྱི་སྐུ་ལ་སྐྱབས་སུ་མཆི། བཀའ་བསྩལ་པ། ཆོས་ཀྱི་སྐུ་ལ་སྐྱབས་སུ་འགྲོ་ཡི་གཟུགས་ཀྱི་སྐུ་ལ་སྐྱབས་སུ་ འགྲོ་བ་ནི་མ་ཡིན་ཏེ་གཟུགས་སངས་རྒྱས་མ་ཡིན་པའི་ཕྱིར་རོ། །གསོལ་པ། གཟུགས་ཀྱི་སྐུ་སངས་རྒྱས་མ་ལགས་ན་ཅིའི་སླད་དུ་གཟུགས་ཀྱི་སྐུ་ལ་ཁྲག་ཕྱུང་བས་མཚམས་མ་མཆིས་པའི་ལས་བགྱིས་པར་འགྱུར། བཀའ་ བསྩལ་པ། གཟུགས་ཀྱི་སྐུ་ནི་ཆོས་ཀྱི་སྐུའི་སྣོད་ཡིན་ཏེ་ཆོས་ཀྱི་སྐུའི་གནས་སོ། །དེ་བས་ན་ཆོས་ཀྱི་སྐུ་ལ་གནོད་པ་བྱས་པས་མཚམས་མེད་པའི་ལས་སུ་འགྱུར་གྱི་གཟུགས་ཀྱི་སྐུ་སངས་རྒྱས་ཡིན་ནས་མཚམས་མེད་པའི་ལས་སུ་འགྱུར་ བ་ནི་མ་ཡིན་ནོ། །ཞེས་སོ། །འདི་ནི་སངས་རྒྱས་མྱ་ངན་ལས་འདས་པའི་སྐུ་གདུང་སངས་རྒྱས་ཀྱི་སྐུ་གདུང་ཡིན་ཡང༌། སངས་རྒྱས་སུ་མི་འཇོག་པ་ལྟ་བུ་སྟེ། སྤྱིར་དྲིན་ལན་གསབ་པ་ཐེག་ཆེན་གྱི་མདོ་ཡིན་མོད་ཀྱང༌། གཟུགས་སྐུ་ ཆོས་སྐུའི་རྟེན་དུ་བཤད་པ་འདི་ནི་ཐེག་དམན་དུ་དེ་བཞིན་གཤེགས་པ་བེམ་ཤེས་གཉིས་ཚོགས་ཀྱི་སྐྱེས་བུར་འཇོག་པ་ལྟར་གསུངས་པ་སྟེ། ཐེག་ཆེན་ཉིད་ཀྱི་ཐུན་མོང་མ་ཡིན་པའི་རྣམ་བཞག་ནི་མ་ཡིན་ནོ། །ཐེག་ཆེན་ཉིད་ཀྱི་དབང་ དུ་བྱས་ན་ཡང་དག་པར་ན་རྫོགས་པའི་སངས་རྒྱས་ནི་ཡིན་མིན་ལས་རྣམ་པར་གྲོལ་བ་ཡིན་ཏེ། ཡིན་མིན་ནི་བློས་བཟུང་བར་ཟད་ལ། སངས་རྒྱས་ཉིད་ལ་བློ་མི་མངའ་ཞིང་སེམས་ཅན་སུའི་བློས་ཀྱང་སངས་རྒྱས་གཞལ་བར་མི་ནུས་པའི་ཕྱིར། འོན་ཀྱང་
